تۇساۋكەسەر كەزدەسۋىندە ۇندىستاندىق حامپي كونەرۋدى (فيدە رەيتينگىندە 7-ورىندا) قاپى قالدىرعان ءبيبىسارا (№6) ەكىنشى تۋردا قىتاي شەبەرى چجۋ تسزينەرمەن (№4) تەڭ ءتۇستى. جارىس ەرەجەسىنە ساي كلاسسيكالىق شاحماتتان وتكەن ءار باسەكەدەن سوڭ جەڭىمپاز مىندەتتى تۇردە انىقتالۋعا ءتيىس. سول سەبەپتى «ارماگەددون» فورماتىمەن قوسىمشا پارتيا وينالىپ, بۇل باسەكەدە جەرلەسىمىز باسىمدىق تانىتتى.
ءۇشىنشى تۋردا ب.اساۋباەۆا 20 جاستاعى ديۆيا دەشمۋكحپەن (№11) كەزدەستى. كەزىندە جاسوسپىرىمدەر مەن جاستار اراسىنداعى جارىستاردا جاسىنداي جارقىلداپ, الەمدىك دودالاردا سان مارتە التىننان القا تاققان ءۇندىستاننىڭ اسا دارىندى شاحماتشىسى ەرەسەكتەر دوداسىندا دا ءوزىنىڭ مىقتىلىعىن مويىنداتىپ ۇلگەردى. ديۆيا – ازيا چەمپيونى, شاحماتشىلار وليمپياداسىنىڭ جەڭىمپازى. بۇل سايىستا دا تەڭ ەسەپ تىركەلدى.
«ارماگەددوندا» دا جەڭىمپاز انىقتالمادى. ونداي جاعدايدا جەڭىس قارا فيگۋرالارمەن ويناعان ويىنشىعا بەرىلەتىنى بەلگىلى. بۇل رەتتە دەشمۋحتىڭ باعى جاندى.
ءتورتىنشى كەزدەسۋىن ءبيبىسارا تسزيۋي ۆەنتسزيۋنگە (№3) قارسى وتكىزدى. 2018 جىلى الەم چەمپيونى اتانعان 35 جاستاعى قىتاي شاحماتشىسى ءالى دە تۇعىردان تايعان جوق. سوڭعى سەگىز جىل ارالىعىندا ءوز اتاعىن بەس مارتە ءساتتى قورعادى. كوماندالىق الەم چەمپيوناتى مەن شاحماتشىلار وليمپياداسىندا ەكى رەت دارا شىقتى. مىنە, وسىنداي اتاعى جەر جارعان حاس شەبەردى ب.اساۋباەۆا «ارماگەددوندا» ۇتتى.
بەسىنشى تۋردا ءبارى كەرىسىنشە بولدى. ءبيبىسارا ۋكراينالىق اننا مۋزىچۋكتان قوسىمشا پارتيادا ۇتىلدى. وسى ساتسىزدىكتەن كەيىن ديۆيا دەشمۋكحتى العا جىبەرىپ, ەكىنشى ورىنعا سىرعىپ ءتۇستى. كوپ كەشىكپەي ءبيبىسارا قايتا كوش باستادى. ەكىنشى كەزەڭدەگى العاشقى باسەكەسىندە ول حامپي كونەرۋدى تاعى دا ۇتتى. بۇل جولى «ارماگەددوندا» ايلاسىن اسىردى. قازىر قازاق گروسسمەيستەرىنىڭ قورجىنىندا 9,5 ۇپاي بار. ەكىنشى ورىنداعى ديۆيا دەشمۋكحتىڭ ودان ءبىر ۇپايى كەم.
