فوتو: قورعانىس مينيسترلىگى
قورعانىس مينيسترلىگىنىڭ مالىمەتىنشە, 1 ماۋسىمداعى جاعداي بويىنشا قارۋلى كۇشتەردى, سونداي-اق ۇقك شەكارا قىزمەتىن, مەملەكەتتىك كۇزەت قىزمەتىن جانە توتەنشە جاعدايلار مينيسترلىگىن جاساقتاۋ جوسپارى تولىق كولەمدە ورىندالعان.
باس شتابتىڭ ۇيىمداستىرۋ-جۇمىلدىرۋ جۇمىستارى دەپارتامەنتىنىڭ مالىمەتىنشە, جاڭا شاقىرىلعان ساربازداردىڭ باسىم بولىگى جاس ساربازدار كۋرسىن اياقتاپ ۇلگەرگەن. ولار جالپى اسكەري جارعىلاردى مەڭگەرىپ, ساپتىق جانە اتىس دايىندىعىنىڭ نەگىزدەرىن وقىپ, قارۋ-جاراقتىڭ تاكتيكالىق-تەحنيكالىق سيپاتتامالارىمەن تانىسقان.
قازىرگى ۋاقىتتا مەرزىمدى قىزمەتتەگى ساربازدار اسكەري ومىرگە بەيىمدەلىپ, ءوز مىندەتتەرىن اتقارۋعا كىرىسكەن. نەسيە مىندەتتەمەلەرى بار اسكەري قىزمەتشىلەر زاڭناماعا سايكەس تولەمدەرىن كەيىنگە قالدىرۋ مۇمكىندىگىن پايدالانىپ جاتىر. سونىمەن قاتار, ولاردىڭ ءبىر بولىگى قىزمەتتى اياقتاعاننان كەيىن مەملەكەتتىك ءبىلىم بەرۋ گرانتتارىنا ارنالعان كونكۋرسقا قاتىسپاق.
ەل وڭىرلەرىندە اكىم ورىنباسارلارىنىڭ باسشىلىعىمەن قالالىق جانە اۋداندىق اسكەرگە شاقىرۋ كوميسسيالارى جۇمىسىن جالعاستىرىپ جاتىر. نەگىزگى كۇش ۇلتتىق ۇلان بولىمشەلەرىن جاساقتاۋعا باعىتتالعان, جوسپارعا سايكەس ونىڭ قاتارىنا 7 مىڭنان استام جاس شاقىرىلماق.
ازاماتتارعا شاقىرۋ SMS-حابارلامالار جانە eGov پورتالى ارقىلى ەلەكتروندى فورماتتا, كەلۋ كۇنىنە كەمىندە ءۇش كۇن قالعاندا جىبەرىلەدى. ەلەكتروندى حابارلاما رەسمي شاقىرۋ مارتەبەسىنە يە. شاقىرتۋ العان ازاماتتار اسكەرگە شاقىرۋ پۋنكتىنە كەلۋگە مىندەتتى, ال دالەلدى سەبەپسىز كەلمەگەن جاعدايدا اكىمشىلىك, ال اسكەردەن جالتارعان جاعدايدا قىلمىستىق جاۋاپكەرشىلىك قاراستىرىلعان.
جالپى كوكتەمگى اسكەرگە شاقىرۋ اياسىندا قارۋلى كۇشتەر مەن باسقا دا اسكەري قۇرىلىمدارعا 18 بەن 27 جاس ارالىعىنداعى 21 مىڭنان استام ازامات شاقىرىلادى.
ەسكە سالا كەتەيىك, 2014 جىلدان بەرى قازاقستاننىڭ 900-دەن استام اسكەري قىزمەتشىسى بۇۇ ميسسيالارىنا قاتىسقان.
