فوتو: kris_p_almata
ادۆوكاتتىڭ تۇسىندىرۋىنشە, ادام ولىمىنە اكەلگەن جول اپاتتارى بويىنشا تاراپتاردىڭ تاتۋلاسۋى قىلمىستىق جاۋاپكەرشىلىكتەن بوساتپايدى. زاڭ شارتتى جازا تاعايىنداۋعا تىيىم سالماعانىمەن, سوت تاجىريبەسىندە مۇنداي ىستەردە ول سيرەك قولدانىلادى.
قولدانىستاعى باپ بويىنشا جازا مەرزىمى 7 جىلدان 10 جىلعا دەيىنگى باس بوستاندىعىنان ايىرۋدى كوزدەيدى. الايدا ايىپتالۋشى كەلتىرىلگەن شىعىندى وتەپ, كىناسىن مويىنداسا جانە اۋىرلاتاتىن ءمان-جايلار بولماسا, سوت كوبىنە شامامەن 5 جىل جازا تاعايىندايدى.
سونداي-اق مۇنداي ساناتتاعى سوتتالعاندار ادەتتە قونىس-كولونيالاردا جازاسىن وتەيدى. بۇل مەكەمەلەردەگى ءتارتىپ جالپى كولونيالارعا قاراعاندا جەڭىلىرەك. بۇدان بولەك, تەرگەۋ يزولياتورىندا (سيزو) وتكىزىلگەن ءبىر كۇن قونىس-كولونياداعى ەكى كۇن رەتىندە ەسەپتەلەدى.
جوحار ۋتەبەكوۆتىڭ ايتۋىنشا, سوتتالعان ادام جازا مەرزىمىنىڭ تورتتەن ءبىرىن وتەگەننەن كەيىن قالعان بولىگىن جەڭىلىرەك جازا تۇرىنە اۋىستىرۋدى سۇراپ سوتقا ءوتىنىش بەرە الادى. ەگەر سوت 5 جىل جازا بەلگىلەسە, مۇنداي مۇمكىندىك شامامەن 15 ايدان كەيىن تۋىندايدى.
بۇعان دەيىن سوت وتىرىسىندا قازا تاپقان ەكى ادامنىڭ تۋىستارى ايىپتالۋشى الەكساندر پاكپەن تاتۋلاسقانىن مالىمدەگەن. ال ءۇشىنشى مارقۇمنىڭ تۋىستارىنىڭ ۇستانىمى ازىرگە تىڭدالعان جوق. كەلەسى سوت وتىرىسى 4 ماۋسىمعا بەلگىلەنگەن.
ەسكە سالساق, قايعىلى جول اپاتى 21 ناۋرىز كۇنى الماتى قالاسىنداعى ءال-فارابي داڭعىلى مەن مەڭدىقۇلوۆ كوشەسى قيىلىسىندا بولعان. تەرگەۋ مالىمەتىنشە, 32 جاستاعى كاسىپكەر الەكساندر پاك باسقارعان Zeekr كولىگى قارسى باعىتقا شىعىپ كەتىپ, Mercedes-Benz كولىگىمەن سوقتىعىسقان. سالدارىنان ءۇش ادام كوز جۇمدى.
