كەزدەسۋ بارىسىندا مۇناي-گاز سالاسىنداعى ىنتىماقتاستىقتى دامىتۋ, سونىڭ ىشىندە بىرلەسكەن جوبالاردى جۇزەگە اسىرۋ جانە ينۆەستيتسيالىق ءوزارا ءىس-قيمىلدى كەڭەيتۋ ماسەلەلەرى قارالدى.
تاراپتار ەكىجاقتى ىنتىماقتاستىقتىڭ دامىپ كەلە جاتقانىن جانە بۇعان دەيىن قول جەتكىزىلگەن ۋاعدالاستىقتاردىڭ جۇزەگە اسىرىلىپ جاتقانىنا توقتالدى. اتاپ ايتقاندا, بيىلعى ناۋرىز ايىندا ەنەرگەتيكا مينيسترلىگى مەن «شەلل قازاقستان» كومپانياسى اقتوبە وبلىسىنداعى «جاڭاتۇرمىس» ۋچاسكەسىندە گەولوگيالىق بارلاۋ جۇمىسىن جۇرگىزۋگە ارنالعان كەلىسىمشارتقا قول قويدى.
پرەمەر-ءمينيستردىڭ ءبىرىنشى ورىنباسارى ەلىمىزدە گەولوگيالىق بارلاۋ قىزمەتىن كەڭەيتۋ باعىتىندا جۇمىس جۇيەلى تۇردە جۇرگىزىلىپ جاتقانىن اتاپ ءوتىپ, «جاڭاتۇرمىس» جوباسىن جەتىلدىرىلگەن مودەلدىك كەلىسىمشارت شەڭبەرىندە جۇزەگە اسىرۋدىڭ وزەكتىلىگىنە توقتالدى.
سونىمەن قاتار جۇزدەسۋ بارىسىندا قاراشىعاناق جانە قاشاعان جوبالارىن جۇزەگە اسىرۋ ماسەلەلەرى قوزعالدى. تاراپتار وندىرىستىك كورسەتكىشتەردىڭ تۇراقتىلىعىن قامتاماسىز ەتۋ جانە جوبالاردى ءارى قاراي دامىتۋ قاجەتتىگىن اتاپ ءوتتى.
سونداي-اق «شەلل» كومپانياسىنىڭ ەلىمىزدىڭ باتىس وڭىرلەرىندەگى الەۋمەتتىك ماڭىزى بار جوبالاردى قارجىلاندىرۋ ماسەلەسىنە ەرەكشە نازار اۋدارىلدى.
كەزدەسۋ سوڭىندا تاراپتار ۇزاقمەرزىمدى ىنتىماقتاستىقتى ودان ءارى نىعايتۋعا نيەتتى ەكەنىن جەتكىزدى.
