شاكارىم ۋنيۆەرسيتەتىنىڭ رەكتورى دۋمان ورىنبەكوۆ كوپشىلىكتى «سوڭعى قوڭىراۋ» مەرەكەسىمەن قۇتتىقتاي كەلە, ۋنيۆەرسيتەت بازاسىنان اشىلعان «Shakarim High School» مەكتەبىنىڭ باسقا ءبىلىم بەرۋ نىساندارىنان ايىرماشىلىعىنا توقتالدى.
– «Shakarim High School» مەكتەبى – زاماناۋي تالاپتارعا ساي قۇرىلعان, بولاشاققا باعىتتالعان جاڭا فورماتتاعى ءبىلىم ورداسى. مەكتەبىمىزدىڭ العاشقى وقۋ جىلى قازاقتىڭ بەس ارىسىنىڭ ءبىرى, ۇلى ويشىل, فيلوسوف, اقىن شاكارىم قۇدايبەردى ۇلىنىڭ 165 جىلدىق مەرەيتويىمەن تۇسپا-تۇس كەلۋى ەرەكشە تاريحي ءارى رۋحاني مانگە يە بولدى. سوندىقتان مەكتەبىمىز تەك ءبىلىم بەرۋ مەكەمەسى عانا ەمەس, ۇلتتىق قۇندىلىقتاردى دارىپتەيتىن رۋحاني ورتالىققا اينالىپ وتىر. قازىر مەكتەبىمىز ءۇشىنشى وقۋ جىلىن تابىستى جالعاستىرىپ كەلەدى. بۇگىندە 10–11 سىنىپتاردا 136 وقۋشى ءبىلىم الادى. بيىلعى وقۋ جىلىندا بىرنەشە وقۋشىمىز «التىن بەلگى» مەن «ۇزدىك اتتەستاتقا» ۇمىتكەر بولدى. بۇل – ۇستازدار مەن وقۋشىلاردىڭ جۇيەلى ەڭبەگىنىڭ ناتيجەسى. باستى ماقساتىمىز – الەمدىك دەڭگەيدە ويلايتىن, كوپتىلدى, ءبىلىمدى, ۇلتتىق قۇندىلىقتاردى بويىنا سىڭىرگەن تۇلعا قالىپتاستىرۋ. بۇگىندە مەكتەپ تەك ءبىلىم بەرەتىن ورىن عانا ەمەس, وقۋشىنىڭ قابىلەتىن اشاتىن, ومىرگە بەيىمدەيتىن ورتا بولۋعا ءتيىس. سوندىقتان بالالارعا اكادەميالىق بىلىممەن قاتار سىني ويلاۋ, تسيفرلىق ساۋات, زەرتتەۋشىلىك, كوشباسشىلىق, كوماندادا جۇمىس ىستەۋ داعدىلارىن دامىتۋعا باسىمدىق بەرەمىز, – دەدى رەكتور.
بۇل زامانۋي تالاپقا تولىقتاي ساي مەكتەپتەگى 10–11 سىنىپتا 136 وقۋشى ءبىلىم الادى. 2025–2026 وقۋ جىلىندا «Shakarim High School» مەكتەبىنىڭ 7 وقۋشىسى «التىن بەلگىگە», 7 وقۋشى «ۇزدىك» اتتەستاتقا ءتامامداپ جاتىر.
– مەكتەبىمىزدىڭ باستى ەرەكشەلىگى – ۋنيۆەرسيتەت بازاسىندا قۇرىلۋى. بۇل وقۋشىلارعا عىلىممەن ەرتە جاستان اينالىسۋعا مۇمكىندىك بەرەدى. شاكارىم ۋنيۆەرسيتەتىنىڭ پروفەسسورلىق-وقىتۋشىلىق قۇرا-مى, جاس عالىمدارى مەن PhD ارنايى ءدارىس وتكىزىپ, عىلىمي زەرتحانالاردا پراكتيكالىق ساباقتار ۇيىمداستىرادى. وسى ارقىلى وقۋشىلار عىلىم مەن ءبىلىمنىڭ بايلانىسىن تەرەڭ تۇسىنەدى. بيىل 68 تۇلەك مەكتەبىمىزدەن قانات قاققالى وتىر, – دەيدى مەكتەپ ديرەكتورى باقىت سەيىتقاليەۆا.
شاكارىم ۋنيۆەرسيتەتى 2024 جىلى اباي وبلىسى كولەمىندە 221 ءبىلىم ۇزدىگىنە «شاكارىم ءبىلىم گرانتى» سەرتيفيكاتىن بەرسە, بيىل وبلىسىمىزدىڭ 434 «التىن بەلگى» ۇمىتكەرىنە سەرتيفيكات تابىستادى.
سەمەي
