ورمان القابىنا تونەتىن باستى قاۋىپتىڭ ءبىرى – ءورت. بىلتىر ايماقتا بولعان الاپات ءتىلسىز جاۋ 10 گەكتارعا جۋىق اۋماقتى كۇلگە اينالدىردى. توتەنشە جاعدايلاردىڭ باسىم بولىگى استىق ەگەتىن شارۋاشىلىقتاردىڭ ەگىس القاپتارىن تازارتۋ ماقساتىندا سابان ورتەۋىنەن تۋىندايدى. ماسەلەن, جۋىردا شال اقىن اۋدانىنداعى «اسار-سەۆەر» جشس وتكەن جىلعى قالدىقتاردى جاعۋ كەزىندە ءورت شىعارىپ, شارۋاشىلىققا اكىمشىلىك ايىپپۇل سالىندى.
وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسى باستىعىنىڭ مىندەتىن اتقارۋشى ەرلان ءتاشىموۆتىڭ مالىمەتىنشە, بىلتىر ءورت قاۋپى جوعارى ماۋسىمدا 1 015 رەيد جۇرگىزىلگەن. سونىڭ ناتيجەسىندە تۇتانا باستاعان 29 ءورتتىڭ الدىن الۋ مۇمكىن بولدى. ەرەجە بۇزعان تۇلعالارعا 37 حاتتاما تولتىرىلىپ, 1 ملن 157 مىڭ تەڭگە ايىپپۇل وندىرىلگەن.
سونىمەن قاتار ءتىلسىز جاۋدىڭ الدىن الۋ ماقساتىندا بىلتىر 993,5 شاقىرىم مينەرالدى بەلدەۋ تارتىلدى. تەرەڭدىگى 50–70 سم, ەنى 5–10 مەتر بولاتىن بۇل جولاقتار ءورتتىڭ ورمانعا تارالۋىنا توسقاۋىل بولادى. دەگەنمەن ولاردى ۇنەمى باقىلاپ, ءوسىپ كەتكەن شوپتەر مەن قۋراعان قالدىقتاردان تازارتىپ وتىرۋ قاجەت. ويتكەنى داۋىل ايداعان قالىڭ ءورت كەلىپ جەتسە, تازارتىلماعان بەلدەۋدەگى ءشوپ-شالام دا تۇتانىپ, جالىن ورمانعا لاپ قويۋى مۇمكىن. سوندىقتان قارا توپىراعى عانا قالاتىنداي ەتىپ, بەلدەۋلەردى تۇراقتى تۇردە كۇتىپ ۇستاۋ ماڭىزدى. بىلتىر بۇل جۇمىس 26 900 شاقىرىم اۋماقتا جۇرگىزىلگەن.
قازىر ورمان شارۋاشىلىقتارىنىڭ ماتەريالدىق-تەحنيكالىق بازاسى بىرتىندەپ نىعايىپ كەلەدى. بىلتىر وڭىردەگى ورمان شارۋاشىلىقتارىنىڭ ورتكە قارسى دايىندىق دەڭگەيى 10 بالدىق جۇيە بويىنشا 6,9 بالعا باعالاندى. بۇگىندە ايماقتا 21 ءورت ءسوندىرۋ كولىگى, 13 ستانسا, 129 تراكتور جانە 27 ءورت ءسوندىرۋ كەشەنى ساقاداي ساي تۇر.
بيىل قولعا الىنعان «اۋىل قۇتقارۋشىلارى» باعدارلاماسى اياسىندا وبلىستىڭ 11 نۇكتەسىندە ارنايى توپتار قۇرىلىپ, 78 ادام ءورت ءسوندىرۋ تاسىلدەرىنە ماشىقتاندى. بۇل جاساقتار نەگىزگى كۇش جەتكەنگە دەيىن ءتىلسىز جاۋدىڭ بەتىن قايتارۋعا سەپتىگىن تيگىزەدى.
جاسىل ورماندى ورتتەن قورعاپ, ونىڭ كولەمىن ارتتىرۋ – تابيعاتقا دەگەن جاناشىرلىق پەن ەلدىك جاۋاپكەرشىلىكتىڭ ماڭىزدى كورىنىسى.
سولتۇستىك قازاقستان وبلىسى
