ۇلتتتىق بانك نارىقتى ارتىق اقشادان تازالاپ جاتىر

ساراپشىلار جىلدىڭ تىنىش اياقتالاتىنىن بولجاپ وتىر. ترەيدەرلەردىڭ ورتاشا كۇتۋلەرى (Apecon, Investing) ءبىر دوللار ءۇشىن 512-520 تەڭگە «جايلى دالىزدە» تۇر. بۇل رەتتە ۇلتتىق بانك نارىقتىڭ وزىنە تەڭگەنىڭ پايداسىنا قالىپتاسىپ وتىرعان تەپە-تەڭدىكتى تابۋعا مۇمكىندىك بەرە وتىرىپ, ارالاسپاۋ ساياساتىن ۇستانۋدى جالعاستىرۋدا.

كەشە  KASE بيرجاسىندا قر ۇلتتىق ۆاليۋتاسى دا جوعارىلاپ, سەسسيانى ءبىر دوللار ءۇشىن 507,25 تەڭگە بەلگىسىمەن اياقتادى (4,8 تەڭگە نىعايدى). سوڭعى اپتادا دوللار 2,47%, ءبىر ايدا - 3,71%, ال ءۇش ايدا - 6,3% ارزاندادى.

دوللاردىڭ ورتاشا باعامى دۇيسەنبىگە قاراعاندا 0,98% -عا تومەندەدى. ءىس جۇزىندە بارلىق تالداۋشىلار قازىرگى ديناميكا - كەزدەيسوق كۇش الۋ ەمەس ەكەنىن ايتىپ جاتىر. ولار ۇلتتىق بانكتىڭ قاتاڭ اقشا-كرەديت ساياساتىنىڭ زاڭدى ناتيجەسى  دەگەنگە كوبىرەك دەن قويىپ تۇر.

«تەڭگەدەگى كىرىستىلىك ينفلياتسيانى جاباتىن جاعدايدا ۆاليۋتا ساتىپ الۋعا دەگەن قىزىعۋشىلىق تابيعي تۇردە تومەندەيدى», دەيدى  قازاقستان قارجىگەرلەر قاۋىمداستىعى.

ساراپشىلار  قاراشاداعى بيرجاداعى ساۋدا-ساتتىق «دوللاردىڭ تۇراقتى ۇسىنىسى» بەلگىسىمەن وتكەنىن ايتىپ جاتىر.  سالىق اپتاسى ەكسپورتتاۋشىلاردى جانە كۆازيمەملەكەتتىك سەكتوردى بيۋدجەتكە ەسەپ ايىرىسۋ ءۇشىن تابىستى بەلسەندى ساتۋعا ماجبۇرلەدى. ەڭ قىزۋ كۇندەرى, 19 جانە 28 قاراشادا ساۋدا-ساتتىق كولەمى 400 ملن دوللاردان اسىپ, تەڭگەگە قۋاتتى قولداۋ كورسەتتى.

ۇلتتىق بانك مۇنى ەكى فاكتوردىڭ ۇيلەسىمىمەن تۇسىندىرەدى.

ىشكى نارىقتاعى بەلسەندىلىكتىڭ ارتۋى جانە بازالىق مولشەرلەمەنىڭ 18 پايىزعا دەيىن كوتەرىلۋىنە بايلانىستى ءىرى پورتفەلدىك ينۆەستيتسيالاردىڭ اعىنى.

سونداي-اق, ۇلتتىق بانك توراعاسىنىڭ ايتۋىنشا, مولشەرلەمەنىڭ كوتەرىلۋى تەڭگەلىك قۇرالداردى شەتەلدىك ينۆەستورلار ءۇشىن تارتىمدى ەتتى.

«لوندونداعى, نيۋ-يوركتەگى, ءابۋ-دابيدەگى ينۆەستيتسيالىق قورلار دوللاردى تەڭگەگە اينالدىرادى, ءبىزدىڭ وبليگاتسيالارىمىزدى ساتىپ الادى. بۇل نارىقتاعى دوللار ۇسىنىسىن ارتتىرادى», دەيدى ۇلتتىق بانك توراعاسى.

ۇلتتىق بانكتىڭ اقپاراتى بويىنشا, پورتفەلدەر كولەمى ايتارلىقتاي ءوستى, بۇل نارىققا قوسىمشا دوللار بەرىپ, تەڭگە باعامىن كۇشەيتتى.

تەڭگەنىڭ دوللارعا باعامى نىعايا ءتۇستى جانە 2 جەلتوقسانداعى ساۋدا-ساتتىقتان كەيىن 507,96 تەڭگە بەلگىسىنە جەتتى. قاراشادا ءوسىم 3,3%-عا جەتتى. بۇل جىل باسىنان بەرگى ەڭ جوعارعى ءوسىم.

قارجى ساراپشاسى  ەرلان يبراگيمنىڭ ايتۋىنشا, جوعارى بازالىق مولشەرلەمە تەك قانا دامىعان نارىقتاردا ناتيجەسىن بەرەدى. ال بىزدەگى قازىرگى جاعدايدىڭ الىپساتارلىق كوبىنەسە قىسقا مەرزىمدى سيپاتى باسىم.   ونىڭ ايتۋىنشا, ۇلتتىق بانكتىڭ قولىندا تەڭگە باعامىن ءبىراز ۋاقىتقا دەيىن ۇستاپ تۇراتىن رەسۋرس بار. بىراق كەيبىر جاعدايلار بۇعان ساقتىقپەن قاراۋ كەرەكتىگىن كورسەتەدى.

ء«بىز مۇنى  2014 جىلعى دەۆالۆاتسيانىڭ الدىنداعى جاعدايدار كەزىندە بايقاپ قالدىق. سول كەزدە ۇلتتىق بانك  تەڭگە باعامىن ۇستاپ تۇرىپ, كەنەتتەن قۇنسىزداندىرا سالدى. ناتيجەسىندە ول كۇرت قۇلدىراۋعا اينالدى.وكىنىشكە وراي, مەنىڭ بولجامىم كوڭىلدى ەمەس. قارسى وينايتىن ىرگەلى فاكتورلار تىم كوپ. مەن مۇنى كوپشىلىككە قولجەتىمدى دەرەكتەرگە, ماكرو جانە ميكروەكونوميكا مەن باسقا دا قارجىلىق پاندەردى بىلۋگە, سونداي-اق كوپتەگەن قارجىلىق جاعدايلارعا نەگىزدەلگەن بولجامدارعا سۇيەنىپ ايتىپ تۇرمىن», دەيدى ساراپشى.

ساراپشىنىڭ ايتۋىنشا, ۆاليۋتا باعامىن بولجاۋ قازىر مۇمكىن ەمەس.

«تەڭگەنىڭ بۇگىنگى جاعدايى قۇرىلىمدىق وزگەرىستەر ءۇشىن ۋاقىت ۇتۋعا مۇمكىندىك. ەگەر ونى جىبەرىپ السا باعام قايتادان ەكونوميكانىڭ وسال تۇستارىنىڭ ايناسىنا اينالادى. ەگەر وسى ءسات رەفورمالاردىڭ باستاپقى نۇكتەسىنە اينالسا, تەڭگە  سىرتقى كۇيزەلىستەردىڭ قىسپاعىنان شىعادى» دەيدى ساراپشى.

 الماتى