بيىل ۇلاندىقتارعا جالپى سانى 1300-گە جۋىق ءبىلىم گرانتى بەرىلسە, سونىڭ ىشىندە 15 سەرتيفيكات وسى سالتاناتتى راسىمدە تابىستالدى. سونىمەن قاتار «سينەرگيا» ۋنيۆەرسيتەتىنىڭ وكىلدەرى وفيتسەر-ماگيسترانتتارعا قوسىمشا 5 گرانت ءبولدى.
سەرتيفيكاتتاردى ىشكى ىستەر ءمينيسترىنىڭ ورىنباسارى – ۇلتتىق ۇلاننىڭ باس قولباسشىسى اڭساعان بالتابەكوۆ تابىستادى. ول بۇل جوبانىڭ جاس اسكەري قىزمەتشىلەردىڭ بولاشاعى ءۇشىن ۇلكەن مۇمكىندىك ەكەنىن اتاپ ءوتتى:
«بيىلعى شاقىرىلىمداعى 400 ۇلاندىق سارباز, ونىڭ ىشىندە ەلوردالىق بريگادانىڭ 48 وكىلى ەلىمىزدىڭ جوعارى وقۋ ورىندارىندا تەگىن ءبىلىم الۋعا مۇمكىندىك بەرەتىن سەرتيفيكاتتارعا يە بولدى. بۇل – جاي عانا ماراپات ەمەس. بۇل – سىزدەردىڭ قىزمەتتەگى ۇلگىلى تارتىبىڭىزگە, بىلىمگە دەگەن ۇمتىلىسىڭىزعا جانە جوعارى ناتيجەلەرىڭىزگە بەرىلگەن باعا. مەملەكەت جاستارعا, اسكەر مەكتەبىنەن ابىرويمەن وتكەن ازاماتتارعا سەنىم ارتادى. سەنىم ۇدەسىنەن شىعىپ, ساپالى ءبىلىم الىپ, ەل دامۋىنا ۇلەس قوسىپ, كەيىنگى بۋىنعا ۇلگى بولاتىنىڭىزعا سەنەمىن», دەدى ا. بالتابەكوۆ.
ايتا كەتسەك, اسكەر مەن ەلىمىزدىڭ جوعارى وقۋ ورىندارى اراسىنداعى سەرىكتەستىك 2023 جىلدان بەرى جۇزەگە اسىپ كەلەدى. كەلىسىمگە سايكەس, مەرزىمدى اسكەري قىزمەتىن ابىرويمەن وتكەرگەن ازاماتتار مەملەكەتتىك ءبىلىم گرانتىنا قول جەتكىزە الادى. بۇعان قوسا, بايقاۋ جەڭىمپازدارىنا شاكىرتاقى, جاتاقحانادا تەگىن تۇرۋ جانە اسكەري كافەدراعا كونكۋرستان تىس قابىلدانۋ قۇقىعى بەرىلەدى.
بيىل قۇقىقتىق ءتارتىپ اسكەرى قاتارىنداعى ءتورت مىڭعا جۋىق مەرزىمدى قىزمەت ساربازى بايقاۋعا قاتىسۋعا ءوتىنىم بەردى. ولاردىڭ ىشىنەن جاۋىنگەرلىك دايىندىق, ءتارتىپ پەن ارنايى تاپسىرمالاردى ورىنداۋ كورسەتكىشتەرى بويىنشا ۇزدىك ناتيجە كورسەتكەندەر جەڭىمپاز اتاندى. گرانتتاردىڭ ءبولىنۋىن قورىتىندى رەيتينگ ايقىندادى.
سولاردىڭ ءبىرى – 5573 اسكەري ءبولىمنىڭ اسكەري قىزمەتشىسى سۇڭعات ءشامشى: «قىزمەت پەن وقۋ بارىسىنداعى جەتىستىكتەرىم ماعان وسى مۇمكىندىكتى بەردى. ەندى ءبىلىمىمدى جالعاستىرىپ, ەل يگىلىگى ءۇشىن قىزمەت ەتكىم كەلەدى» دەپ ءوز قۋانىشىمەن ءبولىستى.
ايتا كەتەيىك, قازىرگى ۋاقىتتا ەلىمىزدىڭ 70-تەن استام جوعارى وقۋ ورنى بايقاۋ جەڭىمپازدارىن قابىلداۋعا قاتىستى مەموراندۋمدارعا قول قويعان. ءبىلىم گرانتتارىن تابىستاۋ ءراسىمى قۇقىقتىق ءتارتىپ اسكەرى قاتارىندا قىزمەت ەتۋدىڭ بەدەلىن ارتتىرىپ قانا قويماي, جاس ساربازداردىڭ جەكە جانە كاسىبي دامۋىنا كەڭىنەن جول اشاتىن ماڭىزدى ىنتالاندىرۋ تەتىگىنە اينالدى.
