بايقاۋعا قازاقستان, ازەربايجان, ارمەنيا, بەلارۋس, قىرعىزستان, رەسەي, تاجىكستان جانە وزبەكستاننان كەلگەن اۆياتسيا ۇيىمدارىنىڭ وكىلدەرى قاتىسۋدا. بۇل – ءوز سالاسىنىڭ ۇزدىك ماماندارى, ولار شىنايى جۇمىس جاعدايىنا بارىنشا جاقىنداتىلعان تەوريالىق جانە پراكتيكالىق سىناقتاردان وتۋدە.
مۇنداي اۋقىمدى بايقاۋ سوڭعى جەتى جىلدا العاش رەت وتكىزىلىپ وتىر — الدىڭعىسى 2018 جىلدىڭ ناۋرىزىندا سانكت-پەتەربۋرگ قالاسىندا وتكەن بولاتىن. بيىلعى شارا بۇكىل ەۋرازيا ايماعىنداعى اۆياتسيا سالاسى ءۇشىن ماڭىزدى وقيعاعا اينالىپ, اەروناۆيگاتسيا سالاسىنداعى ماماندار مەن ساراپشىلاردى ءبىر كاسىبي الاڭدا توعىستىردى.
بايقاۋدىڭ قازىلار القاسى اۋە قوزعالىسىن باسقارۋ سالاسىندا ۇلكەن تاجىريبەسى بار, «ەۋرازيا» ۇيلەستىرۋ كەڭەسىنە مۇشە ەلدەردىڭ تانىلعان كاسىبي ماماندارى مەن ساراپشىلارىنان قۇرالعانىن ەرەكشە اتاپ وتكەن ءجون.
بايقاۋ ءتورت كەزەڭنەن تۇرادى. ءبىرىنشى كۇنى كوماندالار الدىن الا دايىندالعان ءۇي تاپسىرمالارىن — اۋە قوزعالىسىن ۇيىمداستىرۋ سالاسىنداعى وزەكتى تاقىرىپتارعا ارنالعان جوبالارىن ۇسىندى. قاتىسۋشىلار ءوز يدەيالارىنىڭ ءمانىن اشىپ, تاڭدالعان باعىتتاردىڭ ماڭىزدىلىعىن تۇسىندىرۋگە تىرىستى. ەكىنشى كەزەڭدە تەوريالىق ءبىلىم دەڭگەيى مەن اعىلشىن ءتىلى ءبىلىمى تەكسەرىلدى. ءۇشىنشى كەزەڭدە ديسپەتچەرلىك ترەناجيوردا پراكتيكالىق تاپسىرمالار ورىندالدى. ءتورتىنشى تۋر — توسىنسىي-بايقاۋى, وندا قاتىسۋشىلاردىڭ سترەسسكە توزىمدىلىگى مەن ستاندارتتى ەمەس جاعدايدا جەدەل شەشىم قابىلداۋ قابىلەتى باعالانادى.
رەسەي قۇراماسىنىڭ مۇشەسى الەكساندر لوماكيننىڭ ايتۋىنشا, بارلىق كوماندالار اۋە قوزعالىسىن ۇيىمداستىرۋ جۇيەسىندەگى وزەكتى ماسەلەلەرگە ارنالعان قىزىقتى جوبالاردى ۇسىندى. تاقىرىپتار قاتارىندا — ۇشقىشسىز اۋە اپپاراتتارىن پايدالانۋ, اۋىسىم بارىسىندا قىزمەتكەرلەردىڭ شارشاۋىن باقىلاۋ جانە سالانىڭ قازىرگى زامانعى سىن-قاتەرلەرىن كورسەتەتىن باسقا دا باعىتتار بولدى. ول ءار ەلدىڭ ماماندارى قانداي ماسەلەلەرگە تاپ بولىپ جاتقاندىعىن جانە ولاردىڭ شەشۋ جولدارىن ءبىلۋ وتە قىزىقتى بولعاندىعىن اتاپ ءوتتى.
قازاقستان قۇراماسىنىڭ وكىلى تيمۋر ناۆرۋزوۆ ناۆيگاتسيا سالاسىنىڭ قارقىندى دامىپ كەلە جاتقاندىعىن تىلگە تيەك ەتتى. قاتىسۋشىلاردىڭ پرەزەنتاتسيالارى بۇگىنگى كۇنى جاساندى ينتەللەكتىنى ەنگىزۋ, ۇشقىشسىز ۇشۋ اپپاراتتارىنىڭ دامۋى, اۋە كەڭىستىگىنىڭ قۇرىلىمىن جەتىلدىرۋ جانە باسقا دا ماڭىزدى باعىتتار بويىنشا بەلسەندى جۇمىس جۇرگىزىلىپ جاتقانىن كورسەتتى. ونىڭ ايتۋىنشا, بۇل — كۇن سايىن ءجۇرىپ وتىراتىن ۇدەرىس, ال مۇنداي بايقاۋلارعا قاتىسۋ بولاشاق كاسىبي قىزمەتتە پايدالى بولاتىن داعدىلاردى دامىتۋعا كومەكتەسەدى.
بايقاۋ بارىسىندا كوماندالىق جۇمىس, سترەسسكە توزىمدىلىك جانە شەشىم قابىلداۋداعى دالدىككە ەرەكشە نازار اۋدارىلادى — بۇل ناقتى جاعدايلاردا ديسپەتچەر ماماندىعى ءۇشىن اسا ماڭىزدى قاسيەتتەر. بايقاۋدىڭ نەگىزگى ماقساتتارى — ءوڭىردىڭ ەڭ مىقتى ديسپەتچەرلەرىن انىقتاۋ, قاتىسۋشىلار اراسىنداعى تاجىريبە الماسۋ مەن كاسىبي دايارلىق دەڭگەيىن ارتتىرۋ, اقب سالاسىنداعى زاماناۋي تەحنولوگيالار مەن وزىق تاجىريبەلەردى كورسەتۋ, سونداي-اق اۋە قوزعالىسىنىڭ قاۋىپسىزدىگى مەن تيىمدىلىگىن ارتتىرۋ ماقساتىندا حالىقارالىق ىنتىماقتاستىقتى نىعايتۋ.
ءوتىپ جاتقان بايقاۋ — بۇل تەك جارىس قانا ەمەس, سونىمەن قاتار كادرلىق الەۋەتتى دامىتۋ مەن قاتىسۋشى ەلدەر اراسىنداعى كاسىبي بايلانىستاردى نىعايتۋداعى ماڭىزدى قادام. ول مامانداردى دايارلاۋدىڭ جوعارى ستاندارتتارىن كورسەتىپ, قازاقستاننىڭ ەۋرازيا ايماعىنداعى ازاماتتىق اۆياتسيا سالاسىنداعى جەتەكشى ەل رەتىندەگى بەدەلىنىڭ ارتىپ كەلە جاتقانىن دالەلدەيدى.
ايتا كەتۋ كەرەك, الماتىداعى ازاماتتىق اۆياتسيا اكادەمياسى بايقاۋدىڭ تەڭ ۇيىمداستىرۋشىسى عانا ەمەس, سونىمەن قاتار وڭىردەگى اۆياتسيا سالاسىنا ماماندار, سونىڭ ىشىندە اۆياديسپەتچەرلەردى دايىندايتىن جەتەكشى وقۋ ورىندارىنىڭ ءبىرى بولىپ تابىلادى. اكادەميانىڭ وقۋ باعدارلامالارى حالىقارالىق ستاندارتتارعا ساي كەلىپ, زاماناۋي اۋە قوزعالىسى جاعدايىندا ءتيىمدى جۇمىس ىستەي الاتىن جوعارى بىلىكتى كادرلاردى دايارلاۋعا باعىتتالعان.
بايقاۋ جەڭىمپازدارى بۇگىن انىقتالادى. سوڭعى كۇنى ءتورت كەزەڭنىڭ قورىتىندىلارى شىعارىلىپ, ءبىلىم دەڭگەيى, كاسىبي داعدىلارى مەن ساپالارىن جوعارى دەڭگەيدە كورسەتكەن ەڭ ۇزدىك ديسپەتچەرلەردىڭ ەسىمدەرى اتالادى.
الماتى