فوتو: كولىك مينيسترلىگى
بۇگىندە 431 زاۋىتتىڭ 382-ءسى, ياعني 89 پايىزى تەكسەرۋدەن ءوتتى. استانا, شىمكەنت قالالارى جانە الماتى, جەتىسۋ, قوستاناي, پاۆلودار, اقتوبە وبلىستارىنداعى بارلىق جۇمىس ىستەپ تۇرعان ابز تولىق قامتىلعان. ينسپەكتسيا قورىتىندىسى بويىنشا بىرقاتار ابز-عا قىزمەتىن جەتىلدىرۋ جونىندە ناقتى ۇسىنىستار بەرىلدى. بۇل – زاۋىتتاردىڭ قاجەتتى ساپا دەڭگەيىنە جەتۋىنە مۇمكىندىك بەرەدى. قالعان زاۋىتتار دا تەكسەرىلەدى.
مينيسترلىكتىڭ مالىمەتىنشە تەكسەرۋ بارىسىندا اسفالت-بەتون زاۋىتتارى جانە زاۋىت زەرتحانالارىنىڭ قولدانىستاعى نورماتيۆتىك قۇجاتتاردىڭ تالاپتارىنا سايكەستىگى جان-جاقتى زەردەلەندى. اسىرەسە, ساپا قىزمەتىنە جاۋاپتى مامانداردىڭ بولۋى, جول قۇرىلىسى ماتەريالدارىن ساقتاۋ-تاسىمالداۋ ەرەجەلەرى ماسەلەلەرىنە ەرەكشە نازار اۋدارىلدى. سونداي-اق, ساپانى باقىلاۋ بويىنشا تەحنولوگيالىق رەگلامەنتتەردىڭ بار-جوعى باعالاندى.
