«سلوۆاكيا – قازاقستاننىڭ ەۋروپالىق وداقتاعى سەنىمدى سەرىكتەسى. قازاقستان پرەزيدەنتى قاسىم-جومارت توقاەۆ سلوۆاكيا رەسپۋبليكاسىمەن جان-جاقتى ستراتەگيالىق ارىپتەستىكتى دامىتۋعا ەرەكشە ءمان بەرەدى. ءبىزدىڭ ەلدەرىمىزدە ونەركاسىپتى, اۋىل شارۋاشىلىعىن, جوعارى بىلىكتى ادامي كاپيتالدى دامىتۋ, سونداي-اق قولايلى گەوگرافيالىق جاعداي سالالارىندا كوپتەگەن ۇقساستىق بار. مۇنىڭ ءبارى قازاقستان – سلوۆاكيا قاتىناستارىن ودان ءارى نىعايتۋعا بەرىك نەگىز بولادى», دەپ باسا ايتتى و.بەكتەنوۆ.
«ەكى مەملەكەتتىڭ باسشىلارى مەن پرەمەر-مينيسترلەر كەزدەسۋلەرى – جوبالاردى جۇزەگە اسىرۋدىڭ جۇمىلدىرۋشى قۇرامداس بولىگى. ءبىز تاۋار اينالىمىن ارتتىرۋعا عانا ەمەس, بىرلەسكەن ءوندىرىس ورىندارىن قۇرۋعا دا مۇددەلىمىز», دەپ اتاپ ءوتتى ر.فيتسو.
وتكەن جىلى ەكى ەل اراسىنداعى تاۋار اينالىمى 140 ملن دوللاردى قۇرادى, وسى جىلدىڭ 4 ايىندا ءوزارا ساۋدا كولەمى 46%-عا ارتتى. ساۋدا قۇرىلىمىن ءارتاراپتاندىرۋ جانە تاۋارلار مەن كورسەتىلەتىن قىزمەتتەر ءتۇرىن ودان ءارى كەڭەيتۋ شارالارىنىڭ ماڭىزدىلىعى اتاپ ءوتىلدى.
قازاقستان ورگانيكالىق ءوندىرىس سالاسىندا بىرلەسكەن كاسىپورىندار قۇرۋ جانە تاجىريبە الماسۋ, حالىقارالىق نارىقتارعا تۇراقتى شىعۋدى قامتاماسىز ەتەتىن ءتيىمدى كولىك-لوگيستيكالىق باعىتتاردى دامىتۋ ارقىلى اۋىل شارۋاشىلىعى سالاسىنداعى ىنتىماقتاستىقتى تەرەڭدەتۋگە مۇددەلى.
ەل ۇكىمەتىنە وتاندىق تاسىمالداۋشىلار تاراپىنان كەلىپ تۇسكەن وتىنىشتەردى ەسكەرە وتىرىپ, ولجاس بەكتەنوۆ ترانزيتتىك جۇك تاسىمالداۋعا رۇقسات بەرۋ كۆوتاسىن ودان ءارى ۇلعايتۋ ماسەلەسىن قاراۋعا باستاماشى بولدى.
تاراپتار جان-جاقتى ءوزارا ءتيىمدى ىنتىماقتاستىقتى نىعايتۋعا جانە روبەرت فيتسونىڭ قازاقستانعا رەسمي ساپارى بارىسىندا قول جەتكىزىلگەن ۋاعدالاستىقتاردى تولىق جۇزەگە اسىرۋعا نيەتتى ەكەنىن جەتكىزدى.
كەلىسسوزدەر قورىتىندىسى بويىنشا پرەمەر-مينيسترلەر «قازاقستان – سلوۆاكيا» بيزنەس-فورۋمىنا قاتىستى.
ەكى ەلدىڭ ىسكەر توپتارىنىڭ وكىلدەرى ءوزارا قىزىعۋشىلىق تۋدىراتىن جاڭا سالالار بويىنشا قارىم-قاتىناس ورناتۋ ماسەلەلەرىن تالقىلادى. قازاقستاندا سلوۆاك بيزنەسى دەنساۋلىق ساقتاۋ, ەنەرگەتيكا, تاماق ونەركاسىبى جانە تاعى باسقا سالالارعا بەلسەندى تۇردە قاتىسۋدا.
ولجاس بەكتەنوۆ ءوز سوزىندە ينۆەستورلار مەن سلوۆاكيالىق ىسكەر توپ وكىلدەرىن جوبالاردى بىرلەسىپ جۇزەگە اسىرۋعا شاقىردى. ونەركاسىپ, ەنەرگەتيكا, اۋىل شارۋاشىلىعى, اسكەري-ونەركاسىپتىك كەشەن سياقتى جانە باسقا دا ىنتىماقتاستىق پەن ەكونوميكالىق دامۋعا نەگىز بولاتىن ۇزاقمەرزىمدى بايلانىستاردى جانداندىرۋدىڭ پەرسپەكتيۆالى باعىتتارى ايقىندالدى. قازاقستان جۇزەگە اسىرىپ جاتقان سۋ سەرىكتەستىگى باستاماسى اياسىندا سۋ رەسۋرستارىن باسقارۋ سالاسىندا تاجىريبە الماسۋ ماڭىزدى, سوعان سايكەس, سۋ شارۋاشىلىعى ينفراقۇرىلىمىن جاڭعىرتۋ, زاماناۋي يرريگاتسيالىق جانە تاعى باسقا دا جۇيەلەردى ەنگىزۋ كوزدەلگەن.
سونداي-اق قازاقستاندا IT ماماندار ءۇشىن جاسالعان جاعدايعا نازار اۋدارىلدى. Astana Hub حالىقارالىق تەحنوپاركى بۇگىندە 1,5 مىڭنان استام ستارتاپتى, ونىڭ ىشىندە Google, Microsoft سياقتى باسقا دا الەمدىك تەحنولوگيالىق كوشباسشىلاردى قولدايدى. سلوۆاكيانىڭ يننوۆاتسيالىق IT سەكتورى تسيفرلىق ەكوجۇيەگە نەگىزدەلگەن ستارتاپتاردى ىسكە اسىرۋعا شاقىرىلدى.
فورۋم جۇمىسىن اياقتاي وتىرىپ, قازاقستان مەن سلوۆاكيا پرەمەر-مينيسترلەرى جان-جاقتى ءوزارا ءتيىمدى ارىپتەستىكتى ساپالى تۇردە كەڭەيتۋگە بەرىك ۇستانىمدارىن ءبىلدىردى.
