سۋرەت: kazgazeta.kz
وسى جىلى مادەنيەت جانە اقپارات مينيسترلىگى مەن جازۋشىلار وداعى بىرلەسىپ, «جاڭا قازاقستاننىڭ ادەبي-تانىمدىق پانوراماسى» اتتى جوبا ۇيىمداستىردى. اتالعان بىرەگەي جوبا – جاس اقىن-جازۋشىلاردى قولداۋعا جانە قالامگەرلەر شىعارماشىلىعىن دامىتۋعا باعىتتالعان ىرگەلى باستاما. جوبانىڭ نەگىزگى ماقساتى رەتىندە شىعارماشىل جاستاردىڭ ادەبي الەۋەتىن ارتتىرۋ, قوعامداعى ءرولىن كۇشەيتۋ, ۇلتتىق ادەبيەتتىڭ جاڭا باعىتتارىن قالىپتاستىرۋ كوزدەلگەن. شىنىندا, بىرەگەي باستاما قالام ۇستاعان تالانتتاردىڭ قاناتىنا دىم بۇركىپ, ورامدى ويلانۋعا, شەبەرلىككە, جازۋعا ىنتالاندىرادى. اتاپ ايتساق, ەلىمىزدىڭ ءار وڭىرىنەن 20 جاس قالامگەر ىرىكتەلىپ, بايقاۋ شارتى بويىنشا وزىنە تيەسىلى وبلىستار مەن قالالاردى ارالاپ, ۇلى دالانىڭ قىر-سىرىن, جۇمباعى مەن تىلسىمىن تۋىندىعا اينالدىرعان. اتالعان باعدارلاما اياسىندا ارىپتەستەرىمىز جانىبەك ءاليماننىڭ «التىن تۇڭعيىق», باقىتبەك قادىردىڭ «جايلاۋكول» كىتابى, سونىمەن بىرگە سايان ەسجاننىڭ «جايىق جىرلارى», عىلىمنۇر كادىربايدىڭ «تاۋ ىشىندە», ايدىن بايىستىڭ «التىن قازىق», ءبىرجان احمەردىڭ «مىڭ بوياۋلى مەكەن», ەسبول نۇراحمەتتىڭ «قىزىلجار داپتەرى», الىشەر راحاتتىڭ «كۇز. جەل. بۇلتتار. عاجايىپ», ءاليحان جاقسىلىقتىڭ «ەسكى ۆوكزالدىڭ جولاۋشىلارى», قۋانىش جازاي ۇلىنىڭ «جىر-داريا», مارلەن عيلىمحاننىڭ «توبەلەر ستيحياسى» – بارلىعى 20 جاس اقىن-جازۋشىنىڭ جاڭا جيناقتارى جارىق كوردى.
«ادەبي پانوراما» – ۇلتتىق ادەبيەتتىڭ ىلگەرىلەۋىنە سەرپىن بەرىپ, بولاشاققا قۇندى مۇرا قالدىرۋعا ۇيىتقى بولاتىنى تالاسسىز. ىرگەلى جوبا ەلدىڭ مادەنيەتى مەن ادەبيەتىنىڭ جاڭا بيىككە كوتەرىلۋىنە ىقپال ەتەرىنە سەنىمىمىز مول.
