فوتو: اشىق دەرەككوز
پرەزيدەنت قاسىم-جومارت توقاەۆ ازەربايجاننىڭ Azal كومپانياسىنا تيەسىلى ۇشاقتىڭ اپاتقا ۇشىراۋىنان زارداپ شەككەن ادامداردى قۇتقارۋ كەزىندە ەرلىك, كاسىبيلىك جانە ازاماتتىق جاۋاپكەرشىلىك تانىتقانى ءۇشىن ءبىر توپ قازاقستاندىقتى مەملەكەتتىك ناگرادالارمەن ماراپاتتادى.
ولاردىڭ اراسىندا تجم وكىلدەرى, مەديتسينا ماماندارى, پوليتسەيلەر, «ماڭعىستاۋ وڭىرلىك ەلەكتروتوراپتىق كومپانياسى» اكتسيونەرلىك قوعامىنىڭ جۇمىسشىلارى جانە اقتاۋ اۋەجايىنىڭ قىزمەتكەرلەرى بار.
مەملەكەت باسشىسىنىڭ جارلىعىمەن ماڭعىستاۋ وبلىسى پوليتسيا دەپارتامەنتىنىڭ كريميناليسى ايبەك الىباەۆ باۋىرجان مومىش ۇلى اتىنداعى ءىى دارەجەلى «ايبىن» وردەنىمەن, ماڭعىستاۋ وبلىسى توتەنشە جاعدايلار دەپارتامەنتى باسقۇدىق اۋىلى №12 ءورت ءسوندىرۋ ءبولىمىنىڭ كومانديرى سەرىبولات وڭعار, ماڭعىستاۋ وبلىسى توتەنشە جاعدايلار دەپارتامەنتى اۆاريالىق-قۇتقارۋ جۇمىستارى جانە ءورت ءسوندىرۋ قىزمەتىنىڭ №12 ءورت ءسوندىرۋ بولىمشەسىنىڭ ءورت ءسوندىرۋشىسى-قۇتقارۋشىسى ولجاس بايتورە, قورعانىس مينيسترلىگى 30153 اسكەري بولىمشەسىنىڭ الىس جەتەكتى راديوماركەر پۋنكتىنىڭ ءبولىم باستىعى (اۋىسىم باستىعى) نۇرلان بوتاعارين, ماڭعىستاۋ وبلىسى توتەنشە جاعدايلار دەپارتامەنتى اۆاريالىق-قۇتقارۋ جۇمىستارى جانە ءورت ءسوندىرۋ قىزمەتىنىڭ №1 ماماندىرىلعان ءورت ءسوندىرۋ بولىمشەسىنىڭ اعا ءورت ءسوندىرۋشىسى-قۇتقارۋشىسى مارلەن ساركەنوۆ راقىمجان قوشقارباەۆ اتىنداعى ءىىى دارەجەلى «ايبىن» وردەنىمەن, ماڭعىستاۋ وبلىستىق كوپسالالى اۋرۋحاناسىنىڭ ورتالىق مەڭگەرۋشىسى باقىتجان قويبەكوۆ پەن اقتاۋ حالىقارالىق اۋەجايى مەديتسينالىق پۋنكتىنىڭ مەڭگەرۋشىسى يرينا كوچەرگينا «قۇرمەت» وردەنىمەن ماراپاتتالدى.
«ەرلىگى ءۇشىن» مەدالىمەن ماڭعىستاۋ وبلىستىق جەدەل جانە شۇعىل مەديتسينالىق جاردەم ستانتسياسىنىڭ فەلدشەرى تيمۋر قيساەۆ, قر توتەنشە جاعدايلار مينيسترلىگى اپاتتار مەديتسيناسى ورتالىعىنىڭ ماڭعىستاۋ وبلىسى بويىنشا فيليالىنىڭ دارىگەرى وسپان ورازبەكوۆ, «قازاەروناۆيگاتسيا» رمك اقتاۋ فيليالىنداعى «ۆىشكا» ديسپەتچەرلىك پۋنكتىنىڭ ديسپەتچەرى ياروسلاۆ تولستيكوۆ, «ماڭعىستاۋ وڭىرلىك ەلەكتروتوراپتىق كومپانياسى» اق اقتاۋ ەلەكتر جەلىلەر اۋدانىنىڭ شەبەرى نۇرالى شوپانوۆ, قر توتەنشە جاعدايلار مينيسترلىگى اپاتتار مەديتسيناسى ورتالىعىنىڭ ماڭعىستاۋ وبلىسى بويىنشا فيليالىنىڭ جۇرگىزۋشى-سانيتارى قوجابەك اللابەرگەنوۆ, ماڭعىستاۋ وبلىسى توتەنشە جاعدايلار دەپارتامەنتى «جەدەل قۇتقارۋ جاساعىنىڭ» قۇتقارۋشىسى ماناس باگيتوۆ, «قازاۆياقۇتقارۋ» اق ەكىنشى ۇشقىشى الىشەر ەستەمەس, «قازاۆياقۇتقارۋ» اق اۋە كەمەسىنىڭ كومانديرى اسحات قۇداباەۆ, قر توتەنشە جاعدايلار مينيسترلىگى اپاتتار مەديتسيناسى ورتالىعىنىڭ ماڭعىستاۋ وبلىسى بويىنشا فيليالىنىڭ فەلدشەرى زامانبەك قۇبايدۋللاەۆ ماراپاتتالدى. اقتاۋ حالىقارالىق اۋەجايىنىڭ قىزمەت باستىعىنىڭ ورىنباسارى بەكبولات جۇماعۇلوۆ, قر ادىلەت مينيسترلىگى «سوت ساراپتامالارى ورتالىعى» ماڭعىستاۋ وبلىسى بويىنشا فيليالىنىڭ مامانى ەلدار ورازاليەۆ, قر توتەنشە جاعدايلار مينيسترلىگى اپاتتار مەديتسيناسى ورتالىعىنىڭ ماڭعىستاۋ وبلىسى بويىنشا فيليالىنىڭ پسيحولوگى جان ەسەن «ەرەن ەڭبەگى ءۇشىن» مەدالىنىڭ يەگەرى اتاندى.
سونىمەن قاتار 51 ادامعا پرەزيدەنتتىڭ العىسى جاريالاندى.
