13–15 قاراشا كۇندەرى ەلوردادا شىعارماشىل وقۋشىلار اراسىندا XI رەسپۋبليكالىق «اقبەرەن» ونەر بايقاۋى ءوتتى. ەلىمىزدىڭ ءار وڭىرىنەن 123 وقۋشى باق سىناعان ءىس-شارا جاس دارىنداردىڭ ونەرى مەن ءبىلىمى انىقتالاتىن ەرەكشە الاڭعا اينالدى.
بايقاۋدىڭ سالتاناتتى اشىلۋ راسىمىندە ءماجىلىس دەپۋتاتى, ايتىسكەر اقىن امانجول ءالتاي قاتىسۋشىلاردى قۇتتىقتاپ, جاس ۇرپاقتىڭ ۇلتتىق مادەنيەتتى دامىتۋداعى رولىنە زور سەنىم ءبىلدىردى.
«تالاپتىڭ تۇلپارىن مىنگەن, تالانتتىڭ تۇعىرىنا قونعان, ءبىلىمنىڭ شىراعىن جاققان سىزدەردەي جالىنداعان جاستارمەن بىرگە بولعانىمىزعا قۋانىشتىمىز. قازاقستاننىڭ جارقىن بولاشاعى سىزدەردىڭ قولدارىڭىزدا», دەدى ول.
جاس ونەرپازدار «شەشەندىك, بىلگىرلىك سايىسى», «اقىندار ءمۇشايراسى», «كوركەم ءسوز وقۋ», «ەسسە جازۋ», «ۇلتتىق اسپاپتا ونەر كورسەتۋ», «اقىندار ايتىسى» سەكىلدى التى اتالىم بويىنشا ءوزارا تالاسقا ءتۇستى. ۇزدىك وقۋشىلاردىڭ جىگەرىن شىڭداعان بىرەگەي جوبادا قازىلار القاسىنىڭ توراعاسى اقىن جانات اسكەربەكقىزى جاس تالانتتارعا شىعارماشىلىق تابىس تىلەدى.
«ابايدىڭ «ادام بالاسى اقىل, ءبىلىم, ار, مىنەزبەن وزادى» دەگەن ءسوزى ەشقاشان ءمانىن جوعالتپايدى. بۇگىن وسىندا جينالعان تالاپتى وقۋشىلاردىڭ ونەرى مەن ءبىلىمىنىڭ كۋاسى بولدىق. قاناتتارىڭىز تالماسىن!», دەدى جانات اسكەربەكقىزى.
بايقاۋ قورىتىندىسىندا ەڭ ۇزدىك 6 قاتىسۋشى وقۋ-اعارتۋ مينيسترلىگىنىڭ باس جۇلدە اتالىمدىق ديپلومىمەن, 12 جەڭىمپاز ءى دارەجەلى ديپلومىمەن, 18 جۇلدەگەر II دارەجەلى ديپلومىمەن جانە 30 قاتىسۋشى III دارەجەلى ديپلومىمەن ماراپاتتالدى. سونىمەن قاتار بارلىق قاتىسۋشىعا ەستەلىك سىيلىقتار تاپسىرىلدى.
