روزا باعلانوۆا اتىنداعى «قازاقكونتسەرت» مەملەكەتتىك اكادەميالىق كونتسەرتتىك ۇيىمىنىڭ «حالىق قازىناسى» ۇلتتىق ونەر ورتالىعى كورەرمەنگە قوياندى, كوكجار, قاراوتكەل سىندى تاعىلىمى مول تاريحي جارمەڭكەلەردى جاڭعىرتقان جاڭا فورماتتاعى ء«بىزدىڭ جارمەڭكە» دۋماندى كەشىن وتكىزدى. القيسساسى بەلگىلى كۇيشى جانعالي ءجۇزبايدىڭ باتاسىمەن باستالعان سارابدال جيىن ساحنا ساڭلاقتارىنىڭ مازمۇندى ونەرىمەن جالعاستى. ءداستۇرلى ونەردىڭ بارلىق ءتۇرىن قامتىعان شوۋ-كونتسەرتتە دەلەبەسى قوزباعان كورەرمەن سيرەك.
كەشتە قازاقستاننىڭ ەڭبەك سىڭىرگەن قايراتكەرلەرى قۇماربەك قالقاتاي, ارداق بالاجانوۆا, ەلمۇرا جاڭابەرگەن, ايگۇل ەلشىباەۆا, راۋشان ورازباەۆا, ايزات قارابەكوۆا, نۇربولات ارزاماس ۇلى, مادەنيەت قايراتكەرلەرى تولعانباي سەمباەۆ, ەربولات شالدىبەكوۆ, مادەنيەت سالاسىنىڭ ۇزدىگى پەريزات تۇراروۆا, «دارىن» جاستار سىيلىعىنىڭ لاۋرەاتتارى اسقار مۇقيات, كۇنسۇلۋ تۇرىكپەن, ارداق ەلەۋسىز, حالىقارالىق بايقاۋلاردىڭ لاۋرەاتتارى اقەركە تاجىباەۆا, دىنيسلامبەك جايلاۋباي, ءبىرجان ايتاحمەتوۆ, ءاليحان دۇيسەنباي, ۆەنەرا تابىس, داريا بەكپەنبەتوۆا, اياۋلىم قاماجان ونەر كورسەتتى. سونىمەن قاتار «استانا سازى» مەملەكەتتىك فولكلورلىق ءانسامبلى مەن «بىرلىك» ءان-بي ءانسامبلى ونەرلەرىن ورتاعا سالىپ, كورەرمەننىڭ ىقىلاسىنا بولەندى.
جەتىسۋ ءداستۇرلى ءان مەكتەبىنىڭ وكىلى, بەلگىلى ءانشى ارداق بالاجانوۆا قارا دومبىرانىڭ شاناعىنان ساز قۇيقىلجىتىپ, كومەيىنەن كەستەلى ءۇن توكسە, ىلە-شالا نۇرعيسا تىلەنديەۆتىڭ «اققۋ» كۇيى تارتىلىپ, تىزىلگەن ءبيشى قىزداردىڭ ونەرىمەن ۇيلەسىم تاپتى. مۇنان سوڭ كۇيشىلەر قايرات ايتباەۆ پەن ەدىل باسىعاراەۆ كۇي تارتىسقا ءتۇسىپ, بوي شىمىرلاتتى. ال ايگۇل ەلشىباەۆانىڭ ەرەكشە داۋىسى كورەرمەندى باۋراسا, دومبىرا مەن قوبىزدىڭ كۇي تارتىسىنا تەبىرەنگەن جۇرت قوشەمەتىن
ءبىلدىردى.
ەلەۋلى جارمەڭكەدە ەستى ونەر عانا ايگىلەندى, قۇنارلى تۋىندىلار عانا قۇلاق قۇرىشىنا جەتتى. ورتالىقتىڭ ونەر مايتالماندارى كورەرمەن نازارىنا ۇلتىمىزدىڭ اۋەلەگەن بىرەگەي اندەرىن, كۇمبىرلەگەن كۇي مەن جىر جاۋھارلارىن, ءتول ونەرىمىزدىڭ ۇزدىك ۇلگىلەرىن پاش ەتتى.
