جيىندا پرەزيدەنت ءارحيۆىنىڭ ديرەكتورى ءاليا مۇستافينا ءسوز الىپ, ءارحيۆتىڭ وتكەن تاريحى مەن بۇگىنگى احۋالى جونىندە اتاپ ءوتتى. سونداي-اق ول پرەزيدەنت ءارحيۆىنىڭ 30 جىلدىعىنا ارنالعان مەرەيتويلىق پوشتا ماركاسىن شىعارۋ بۇل وتكەنگە قۇرمەت جانە ونى ناسيحاتتاۋعا ۇمتىلىستىڭ كورىنىسى ەكەنىن تىلگە تيەك ەتتى.
«مەرەيتويلىق پوشتا ماركاسىن شىعارۋ ءارحيۆتىڭ «ۇلتتىق ارحيۆ قورى جانە ارحيۆتەر تۋرالى» زاڭىندا بەكىتىلگەن قۇجاتتىق مۇرانى قالىپتاستىرۋدا ءرول اتقاراتىن ستراتەگيالىق اقپاراتتىق رەسۋرستاردىڭ ءبىرى رەتىندەگى ەرەكشە مارتەبەسىن كورسەتەدى», دەگەن ءا.مۇستافينا پوشتا ماركاسىن شىعارعان «قازپوشتا» باسشىسى اسەل جاناسوۆا مەن ۇجىمىنا زور العىسىن ءبىلدىردى.
مەرەيتويلىق پوشتا ماركاسىن شىعارۋ وتاندىق ارحيۆشىلەردىڭ جۇمىسىنا دەگەن ۇلكەن ىقىلاستىڭ بەلگىسى دەۋگە بولادى. ويتكەنى وتاندىق پوشتا ماركاسى العاش رەت ارحيۆ سالاسىنا ارنالىپ وتىر. ماركا 1 قازاننان باستاپ اينالىمعا شىعادى. جالپى تيراجى 5 مىڭ دانانى قۇرايدى. پوشتا ماركالارىنداعى سۋرەتتەر – ماڭىزدى تاريحي وقيعالار مەن جەتىستىكتەردىڭ شەجىرەسى. ارنايى مورتابانمەن بەلگىلەنگەننەن كەيىن كوللەكتسيالىق قۇندىلىققا يە بولادى, ارحيۆتە ساقتالعان تاريحي, ماڭىزدى قۇجاتتار سياقتى ەستە قالارلىق نىسانعا اينالادى. پرەزيدەنت ارحيۆىنە ارنالعان العاشقى مەرەيتويلىق ماركا ەلىمىزدىڭ دامۋ تاريحىن زەرتتەۋشىلەر مەن فيلاتەليستەردىڭ توپتامالارىندا لايىقتى ورىن الىپ, ناعىز سيرەك كەزدەسەتىن قۇندىلىققا اينالاتىنى ءسوزسىز.
الماتى
