ەلوردادا قازاقستانداعى ازەربايجاننىڭ مادەني كۇندەرى اياسىندا ۇلتتىق اكادەميالىق كىتاپحانادا ازەربايجان ادەبيەتىنىڭ بۇرىشى اشىلدى. كىتاپحانا قورى باۋىرلاس ەلدىڭ كلاسسيكالىق جانە زاماناۋي ادەبيەتىمەن, ەل مەملەكەتتىلىگىنىڭ قالىپتاسۋ تاريحىمەن, سالت-داستۇرلەرىنە قاتىستى ماتەريالدارمەن, سونىڭ ىشىندە اقىن, ويشىل مۇحاممەد فيزۋلي, مىرزا فاتالي احۋندوۆ, گۋسەين دجاۆيدي, جازۋشى انار رزاەۆ كىتاپتارىمەن, تاعى باسقا قۇندى دۇنيەلەرمەن تولىقتى. سونداي-اق كىتاپحانالىق-اقپاراتتىق قىزمەتتى ودان ءارى دامىتۋ, حالىقارالىق كىتاپ الماسۋ مۇمكىندىگىن قالىپتاستىرۋ ماقساتىندا ۇلتتىق اكادەميالىق كىتاپحانا مەن ازەربايجان ۇلتتىق كىتاپحاناسى اراسىندا ىنتىماقتاستىق مەموراندۋمىنا قول قويىلدى. ءىس-شارادا قازاقستان جازۋشىلار وداعىنىڭ حاتشىسى, اقىن داۋلەتكەرەي كاپ ۇلى ەكى ەلدىڭ تىعىز ادەبي بايلانىسىن تىلگە تيەك ەتە كەلە, باۋىرلاس ەلدىڭ بەلگىلى قوس قالامگەرىنە قازاقستان جازۋشىلار وداعىنىڭ قۇرمەتتى مۇشەسى كۋالىگىن تابىس ەتتى. رۋحاني شارانىڭ سوڭى ازەربايجاننىڭ حالىق جازۋشىسى ەلميرا احۋندوۆانىڭ «زاريفا جانە گەيدار اليەۆتەر. ماڭگىلىك ماحاببات» اتتى كىتابىنىڭ تۇساۋكەسەر راسىمىنە ۇلاستى.
ادەبي كەشتىڭ تىزگىنىن قولعا العان جازۋشى, مەملەكەتتىك سىيلىقتىڭ لاۋرەاتى الىبەك اسقار باۋىرلاس تۇركى ەلدەرىنىڭ قارقىندى دامىپ كەلە جاتقان رۋحاني بايلانىستارىنا توقتالىپ, قوناقتارعا ءسوز ۇسىندى. العاشقى بولىپ ءسوز العان ازەربايجاننىڭ مادەنيەت ءمينيسترى اديل كەريملي تۋىسقاندىق تاڭباسى مەن كىتاپتىڭ ماڭىزىن ايتتى.
– كەشەدەن بەرى استانادا ازەربايجان كۇندەرى وتە تابىستى ءوتىپ جاتىر. مادەني ءومىرىمىزدىڭ جارقىن ۇلگىسىن كورسەتەتىن قوس كىتاپتىڭ تۇساۋكەسەرىن جاساۋ – ەكى حالىقتىڭ تاريحي, مادەني تۇتاستىعىنىڭ ايعاعى دەپ بىلەمىن. ازەربايجان مەن قازاقستان قانشاما جىلدان بەرى دوستىق قارىم-قاتىناستى بەرىك ساقتاپ كەلەدى. ءبىزدى ورتاق تاريح, ۇقساس مادەنيەت پەن ءداستۇرىمىز جاقىنداستىرادى. بۇگىن ازەربايجاننىڭ حالىق جازۋشىسى ەلميرا احۋندوۆانىڭ «زاريفا جانە گەيدار اليەۆتەر. ماڭگىلىك ماحاببات» كىتابىنىڭ تۇساۋىن كەسىپ وتىرمىز. بۇل جاي عانا ادەبي كىتاپ ەمەس, ىشىنە تولاعاي قازىنا جاسىرعان بىرەگەي دۇنيە, – دەدى مينيستر.
مۇنان سوڭ ارحيۆ, قۇجاتتاما جانە كىتاپ ءىسى كوميتەتى توراعاسىنىڭ ورىنباسارى روللان قۇسپان قوناقتارعا قۇشاعىمىزدىڭ ايقارا اشىق ەكەنىن بايان ەتتى.
– جالپى, وسى ءىس-شارالاردىڭ بارلىعى باۋىرلاس قوس حالىقتىڭ ورتاق تاريحىنىڭ, ورتاق مادەنيەتىنىڭ ۇلگىسىن كورسەتىپ وتىر. كەشەگى ءفيزۋليدىڭ 530 جىلدىعىنا ارنالعان جيناق, بۇگىنگى ازەربايجان ادەبيەتىنە ارنالعان بۇرىشتىڭ اشىلۋى, تۇركى حالىقتارىنا ورتاق تۇلعاسى گەيدار اليەۆ جونىندەگى كىتاپتىڭ تۇساۋكەسەر ءراسىمى ءوتۋى – ءوزارا ىنتىماقتاستىقتىڭ بەلگىسى. مادەني, ادەبي تاراپتىڭ قاي-قايسىسىنان بولسىن, قازاقستاننىڭ باۋىرلاس ەلگە قۇشاعى اشىق. عاسىرلارعا كوش تارتقان ۇلكەن قۇندىلىقتارىمىزدىڭ وقىرماندارى ارتا بەرسىن دەگىم كەلەدى, – دەدى ول.
تامىرى تۇتاس ەكى حالىق وكىلدەرى ءبىر-بىرىنە سۇيىسپەنشىلىك سەزىمىن ءبىلدىرىپ, ءوزارا تىلگە قۇرمەت كورسەتتى. ماسەلەن, قازاقستانداعى ازەربايجان ەلشىسى اگالار اتاموگلانوۆ قازاق تىلىندە وي ءوربىتىپ, قوناقتاردىڭ قوشەمەتىنە يە بولدى.
– قازاقستان مەن ازەربايجاننىڭ سان عاسىرلاردان كەلە جاتقان ورتاق سالت-داستۇرلەرى بار. ەلىمىزدىڭ حالىق جازۋشىسى ەلميرا احۋندوۆانىڭ ۇلتتىق كوشباسشىمىز گەيدار اليەۆتى زەرتتەۋدەگى ەڭبەگى وراسان. كوبىمىز بىلەتىن بۇل تاريحي تۇلعا تۋرالى قانشاما كىتاپ جازىلعان, ال بۇل جيناق ايرىقشا ءتىل, ستيلىمەن ەرەكشەلەنەدى, – دەدى ەلشى.
حالىقارالىق تۇركى مادەنيەتى مەن مۇراسى قورىنىڭ پرەزيدەنتى اقتوتى رايىمقۇلوۆا تۇرىك تىلىندە ءسوز ساباقتاپ, كىتاپ اۆتورىنا اقجارما العىسىن ءبىلدىردى.
– قادىرلى گەيدار اليەۆتەر وتباسىنىڭ باقىتى, قيلى تاعدىرى تەك ازەربايجان ەلىنىڭ جۇرەگىندە ەمەس, بارلىق ادامزات ءومىرىنىڭ مادەني-رۋحاني ومىرىندە ءىز قالدىردى دەپ ويلايمىن. مۇندا ءبىر وتباسىنىڭ باقىتى عانا ەمەس, بارلىق حالىقتىڭ باقىتتى ءومىرى جاتىر. وسىنداي تاماشا وتباسىنىڭ قۇپياسىن, قىر-سىرىن اشىپ, وزگەلەرگە ناسيحاتتاي بىلگەن ەلميرا حانىم احۋندوۆاعا العىسىمدى بىلدىرەمىن, – دەدى اقتوتى رايىمقۇلوۆا.
رۋحاني ءىس-شارا سوڭىندا جازۋشى ەلميرا احۋندوۆا جاڭا جيناقتىڭ تارالىمىن ءوسىرۋ تۋرالى ۇسىنىس ايتىپ, استانا وقىرماندارىمەن ارنايى كەزدەسۋگە دايىن ەكەنىن جەتكىزدى.
