ەلوردادا ازەربايجاننىڭ قازاقستانداعى مادەني كۇندەرى اياسىندا «مۇحاممەد فيزۋلي. عازالدار, حاسيدالار – 530 ولەڭ جولى» اتتى جيناقتىڭ تانىستىرىلىمى بولىپ ءوتتى. ءىس-شاراعا ەكى ەلدىڭ ءبىر توپ زيالى قاۋىم وكىلدەرى مەن مادەنيەت قايراتكەرلەرى قاتىستى. تۇساۋكەسەر تىزگىنىن قولعا العان ازەربايجان جازۋشىلار وداعىنىڭ مۇشەسى, اقىن, جازۋشى يلحام فاحمي شىعىس جۇلدىزىنىڭ جىرلارىن جاتقا وقىپ, قوناقتارعا سوزدەن مارجان شاشتى.
ءىس-شارادا العاشقى بولىپ ءسوز العان مادەنيەت جانە اقپارات مينيسترلىگى قۇجاتتاما جانە كىتاپ ءىسى كوميتەتىنىڭ توراعاسى رۋستام ءالي قوس حالىقتىڭ رۋحاني تۇبىرىنە ءۇڭىلىپ, مادەني بايلانىسىن اتاپ ءوتتى.
– ءبىز ازەربايجان مەن قازاقستان باۋىرلاس ەلدەر دەيمىز. بۇل جاي عانا ءسوز ەمەس, ەكى ەلدىڭ تامىرى تەرەڭ تۋىستىعىنىڭ دالەلى. قوس حالىقتىڭ ادەبي, مادەني ورتاق دۇنيەلەرى مول, سولاردىڭ قاتارىندا «قورقىت اتا كىتابى», ماحمۇد قاشقاريدىڭ «ديۋاني لۇعات ات-تۇرك», ءجۇسىپ بالاساعۇني مەن يمادەددين ءناسيميدىڭ فيلوسوفيالىق ەڭبەكتەرىن ايتۋعا بولادى. ال تۇركى ءتىلىنىڭ جەر جۇزىنە تانىلۋىنا ۇلەس قوسقان, ازەربايجان حالقىنىڭ كلاسسيك اقىنى مۇحاممەد ءفيزۋليدىڭ بۇل جيناعىن تۇركى مادەنيەتى جانە مۇراسى قورى شىعارىپ وتىر. اقىن مۇراسىن ناسيحاتتاۋدا بۇل ەڭبەكتىڭ ورنى ەرەكشە,– دەدى ول.
ازەربايجان مادەنيەت ءمينيسترىنىڭ كەڭەسشىسى ولەگ اميربەكوۆ ءوز سوزىندە مۇحاممەد فيزۋلي شىعارماشىلىعى حاقىندا, ەكى ەلدىڭ باۋىرلاستىعىن ەرەكشە اتاپ ءوتتى. حالىقارالىق تۇركى مادەنيەتى مەن مۇراسى قورىنىڭ پرەزيدەنتى اقتوتى رايىمقۇلوۆا جارىققا شىعىپ وتىرعان جيناقتىڭ ماڭىزىنا توقتالدى.
– بۇگىنگى تاڭدا ۇيىمىمىز تۇركى مادەنيەتىنىڭ مۇرالارىن ىلگەرىلەتۋ بويىنشا بىرقاتار جوبالاردى ىسكە اسىرىپ جاتىر. تۇركى حالىقتارىنىڭ باي مۇراسى مەن مادەنيەتىن ساقتاۋ, قورعاۋ جانە جاڭعىرتۋ ءبىزدىڭ قورىمىزدىڭ باستى ميسسياسى. بيىلعى 25 قاڭتاردا ازەربايجان رەسپۋبليكاسىنىڭ پرەزيدەنتى, اسا قۇرمەتتى يلحام گەيدار ۇلى اليەۆ مۇحامەد ءفيزۋليدىڭ 530 جىلدىعىن تويلاۋ تۋرالى جارلىققا قول قويعان بولاتىن. بۇل ءوز كەزەگىندە ءفيزۋليدىڭ مۇراسىن ناسيحاتتاۋ بارىسىنداعى جاڭا مۇمكىندىكتەرگە جول اشادى دەپ ويلايمىن, – دەدى اقتوتى رايىمقۇلوۆا.
رۋحاني ءىس-شارادا ازەربايجان اكتەرلەرى گۋسەيناگا اسلانوۆا مەن دجالى نوۆرۋز شايىردىڭ قازىنالى جىرىنان ءۇزىندى وقىپ, كورەرمەن جۇرەگىنە مەيىرىم مەن ۇندەستىك ءدانىن ەكتى.
مۇنان سوڭ ءسوز العان بەلگىلى ادەبيەتتانۋشى, قالامگەر, مەملەكەتتىك سىيلىقتىڭ لاۋرەاتى ساۋىتبەك ابدراحمانوۆ ابايدىڭ فيزۋلي ەسىمىن شىعىس اقىندارىنىڭ ىشىنەن العاشقى بولىپ اتاپ, مەدەت تىلەگەنىن تىلگە تيەك ەتتى. سونىمەن قاتار تۇڭعىش كلاسسيكالىق پروزا ازەربايجاندا ەرتە كەزدەن قالىپتاسقانى مەن قوس حالىقتىڭ مادەني بىرلىگى جونىندە ايتتى.
شارادا ن.گانجاۋي اتىنداعى ازەربايجان ۇلتتىق عىلىم اكادەمياسىنىڭ مەڭگەرۋشىسى فارانگيز ازيزوۆا «تۇركى الەمىندەگى فيزۋلي شىعارماشىلىعىنىڭ مانىنە» توقتالسا, اقىن كىتابىنىڭ كەڭەسشىسى, ادەبيەتتانۋشى ديدار قۇلكەنوۆ «قازاقستانداعى فيزۋلي شىعارماشىلىعىنىڭ تانىلۋى» تۋراسىندا جان-جاقتى بايان ەتتى.
مادەني كەشتە فيزۋلي جىرلارى ازەربايجاننىڭ تانىمال اسپابى مۋگام ارقىلى سازدى اۋەنمەن شىرقالىپ, كورەرمەندەر ىقىلاسىنا بولەندى.
