فوتو: اشىق دەرەككوزدەن
قازاق ۇلتتىق ونەر ۋنيۆەرسيتەتىنىڭ ەۋرازيالىق سيمفونيالىق وركەسترى بەرليندە ونەرلەرىن كورسەتتى. بىرىڭعاي ستۋدەنتتەردەن قۇرالعان شىعارماشىلىق ۇجىم گەرمانيادا وتكەن «Young Euro Classic» فەستيۆالى اياسىندا كونتسەرت بەرىپ, كوپتىڭ ىقىلاسىنا بولەندى.
دومبىرا شاناعىنان قوڭىر كۇيلەرىمىزبەن قاتار موتسارتتىڭ ايگىلى «تۇرىك مارشى» اۋەلەدى. سەگىز جىگىت ەرەكشە سازدى سيمفونيالىق وركەسترمەن ورىنداعاندا اۋەن ارلەنە ءتۇستى. 200 جىلدان استام تاريحى بار «Konzerthaus» عيماراتى كلاسسيكا مەن ۇلتتىق اسپاپتاردىڭ ۇندەسۋىنەن ەرەكشە كۇيگە بولەنگەن. شيرەك عاسىرلىق مەرەيتويىن تويلاعان مۋزىكا فەستيۆالىنە قازاقستان دەلەگاتسياسى ەكى ساعاتتىق باعدارلامامەن بارعان.
– ءبىز دومبىرادا تەك كۇي عانا ەمەس, بۇكىل شەتەلدىك شىعارمالاردى دا ورىنداۋعا بولاتىنىن كورسەتكىمىز كەلەدى. ال ەكىنشى ورىنداعان شىعارمامىزدى ايتاتىن بولساق, ول – نۇرعيسا تىلەنديەۆتىڭ «ماحامبەتى». بۇل تۋىندى قازاق ۇلتتىق وركەسترىنىڭ ءانۇرانى دەپ ەسەپتەيمىز. مۇنىمەن قازاقتىڭ باي مۋزىكاسىن شەتەلگە تانىستىرۋدى مۇرات تۇتتىق. قازاقتىڭ كۇيىن, فيلوسوفياسىن ءارتۇرلى شىعارمالارىمىز ارقىلى تىڭدارمانعا تانىتتىق دەپ ويلايمىن,– دەيدى «شابىت» دومبىرا ءانسامبلىنىڭ مۇشەسى كەنجەبەك ءادىلوۆ.
ماڭىزى مول شارادا ستۋدەنتتەرىمىزدىڭ ونەرىنە نەمىس تىڭدارماندارى ءتانتى بولعاندارىن جاسىرمادى. وركەستر شەتەلدىكتەردى تامساندىرىپ قانا قويماي, ولاردىڭ قازاق مۋزىكاسىنا دەگەن قىزىعۋشىلىعىن ارتتىرا ءتۇستى.
