سونىمەن قاتار جاڭادان قابىلدانعان استانا دەكلاراتسياسى ۇيىمنىڭ بۇدان كەيىنگى جۇمىسىنا تىڭ سەرپىن بەرەتىنى ءسوزسىز. قىسقاسى, سامميت قورىتىندىسىنان كۇتەر جاقسىلىعىمىز كوپ.
تاعى ءبىر ايتا كەتەرلىگى, قۇرىلعانىنا شيرەك عاسىرعا جۋىقتاعان ۇيىمنىڭ «بەستىكتەن» ۇلعايىپ, «وندىققا» اياق باسقانى. ياعني ۇيىمنىڭ قاتارى ارتىپ, كەرەگەسى كەڭەيىپ جاتىر. بۇل وڭىردە قالىپتاسقان سىن-قاتەرلەرگە ورتاق كواليتسيا اياسىندا توسقاۋىل قويىپ, الدىن الۋعا بارىنشا مۇمكىندىكتەر اشپاق. سەبەبى بۇگىندە ۇيىمعا مۇشە ەلدەر اۋماعىندا الەم حالقىنىڭ 45 پايىزى تۇرىپ جاتىر.
سونداي-اق بۇل ايماقتا الەمدىك ەكونوميكانىڭ دا ۇلەسى 25 پايىزعا جۋىق, ساۋدا-ساتتىقتىڭ 15 پايىزى وسى ەلدەردىڭ اينالىمىندا ءجۇر. سوندىقتان وسىنشا ادامي رەسۋرستار مەن ساياسي سالماققا يە, ەكونوميكالىق الەۋەتى زور ۇيىمنىڭ جاھاندىق احۋالدارعا ىقپال ەتۋ مۇمكىندىگى دە از ەمەس, وڭ اسەر ەتۋگە بارىنشا مۇددەلى.
بۇل جەردە مەملەكەت باسشىلارى مەن بەدەلدى حالىقارالىق ۇيىمدار جەتەكشىلەرىنىڭ باسىن ءبىر ارناعا توعىستىرىپ, قاۋىپسىزدىك, شەكارا, ەكونوميكا, ەكولوگيالىق ماسەلەلەر سىندى سالالاردا وزەكتى دە ماڭىزدى كەلىسىمدەرگە استانادا قول جەتكىزۋ – ءسوزسىز قازاقستاننىڭ ۇلكەن جەتىستىگىن ايشىقتاپ تۇر. ۇيىمعا توراعالىق ەتكەن ءبىر جىل ىشىندە قازاقستان بىرقاتار ماڭىزدى جارقىن باستاما ۇسىنىپ, ەلدەر اراسىنداعى ىدىراپ بارا جاتقان ىنتىماق پەن بىرلىكتىڭ كۇش الىپ, بەرىك ورنىعۋىنا سەپتەسە الدى.
جالپى العاندا جەر-جاھاندا قاقتىعىستار ءورشىپ, گەوساياسي احۋال السىرەگەن تۇستا الەمگە ىقپالى بار كوشباسشىلاردى ءبىر دوڭگەلەك ۇستەل باسىنا جيناپ, ديالوگ ورناتۋ – جاقسىلىقتىڭ نىشانى. بۇل – ءبىر مەزەتتە بىرنەشە مەملەكەتتىڭ بىرلەسە وتىرىپ, وزەكتى ماسەلەلەردى شەشە الاتىنىنىڭ جارقىن كورىنىسى ءارى ۇلگىسى. الگىندە ايتىپ وتكەن دۇنيەجۇزى حالقىنىڭ 40 پايىزىن قۇرايتىن شىۇ مۇشە ەلدەرگە الەمدىك ىشكى جالپى ءونىمنىڭ 3/1-ءى تيەسىلى ەكەنى ۇلكەن ءرول وينايدى.
بىلتىر قازاقستاننىڭ استانا دەكلاراتسياسى مەن شىۇ جۇمىسىن جەتىلدىرۋ تۋرالى باستاما كوتەرگەنىن بىلەمىز. ارينە, مۇنداي قادام ۇيىمىشىلىك ءوزارا كەلىسىمنەن بولەك, سىرت ەلدەرمەن دە ارىپتەستىكتى نىعايتۋعا جول اشىپ, ءتيىمدى جاعداي تۋعىزباق.
ۇيىمنىڭ الەمدەگى بەدەلى زور. اسىرەسە وزگە حالىقارالىق ۇيىمدار اراسىندا دا سالماققا يە. وعان قوسا قازاقستان توراعالىعى تۇسىندا وسى بەدەلدى ۇستاپ قالۋعا جاردەم بەرەر ماڭىزى زور ءتۇرلى تاقىرىپتاعى 100-دەن استام ءىس-شارا ۇيىمداستىرىپ ۇلگەردى. اتقارىلعان جۇمىستار دا ناتيجەلى. اسىرەسە قازاقستان باسشىسىنىڭ «ادىلەتتى الەم مەن كەلىسىمدى جاقتايتىن دۇنيەجۇزىلىك بىرلىك تۋرالى» باستاماسىن ايرىقشا اتاپ وتكەن ءجون. بۇل باستاما حالىقارالىق اۋقىمداعى تۇراقسىزدىققا تۇساۋ سالماق.
وساما بين دجاۆايد,
ء«ال-جازيرا»
تەلەارناسىنىڭ ءتىلشىسى
(پاكىستان)
