جاڭا ءۇي العان ادامداردىڭ قۋانىشىندا شەك جوق. بۇل ۇيلەردىڭ العاشقى 53-كە قاراعاندا ارتىقشىلىعى دا بار – وت جاعاتىن پەشى ۇيدە ەمەس, دالادا, ءۇي ىرگەسىندە ورنالاستىرىلعان. سونىمەن بىرگە ۇيلەردىڭ كەڭدىگى بۇرىنعىعا قاراعاندا 8 شارشى مەترگە ارتىق.
ءسويتىپ, جاڭا «بىرلىك» شاعىن اۋدانىنا سالىنباقشى 700 ءۇيدىڭ 100-ءنىڭ كىلتى تاپسىرىلدى. پرەزيدەنتتىڭ تاپسىرماسى كەزەڭ-كەزەڭمەن ورىندالىپ كەلەدى. دەمەۋشىلەردىڭ قولداۋىمەن قالعان ۇيلەردىڭ قۇرىلىستارى دا قىزۋ جۇرگىزىلىپ كەلەدى. سونىمەن بىرگە مۇندا مەكتەپ, بالاباقشا, ەمحانا, دارىگەرلىك بەكەتتەر قۇرىلىسى دا جۇرگىزىلەدى. بالاباقشانىڭ قابىرعالارى قازىردىڭ وزىندە كوتەرىلىپ قالعان. مۇندا كەلەتىن اۆتوبۋس باعىتتارى دا كوبەيگەن.
ءۇي العانداردىڭ ءبىرى – ناتاليا ناۋمەنكونىڭ وتباسى. قايتىس بولعان قىزىنىڭ ءۇش بالاسىن ءوسىرىپ وتىرعان كەيۋانا بيىل ۇيلەرىن سۋ باسىپ, دالادا قالعاندا كوز جاسىنا يە بولا الماعانىن ايتادى. ء«ۇي سالىپ بەرەمىز, دالادا قالدىرمايمىز» دەگەن سوزگە قۋانعانىمىزبەن, ول ءۇي قاشان بىتەدى, جاز بويى قايدا تۇرامىز دەگەن ۋايىمنان ارىلا المادىم. ەندى, مىنە, جازدىڭ باسىندا-اق تاماشا ۇيگە قونىستاندىق. بالالاردىڭ ويناۋىنا اۋلاسى قانداي كەڭ. پرەزيدەنتكە ايتار العىسىم شەكسىز, ۋادەسىن ءدال ۋاقىتىندا ورىندادى. ەندى جاز بويى ءۇيىمىزدى وزىمىزگە ىڭعايلايمىز. جەرىمىزگە توپىراق العىزىپ, كوشكىندەر دە وتىرعىزا باستايمىز, جاڭا ۇيدە جاڭا ءومىرىمىزدى باستايمىز», دەيدى ول قۋانىشىن جاسىرا الماي.
بۇدان بۇرىن جازعانىمىزداي, «زيكستو» اق كومەك رەتىندە ءۇي جيھازدارى مەن تۇرمىستىق تەحنيكالار اپەرۋگە ۋادە بەرگەن. مىنا ۇيگە دە توڭازىتقىش, گازپليتا, كىر جۋاتىن ماشينا جانە جيھاز سىيلاپتى. ەڭ قاجەتتى تۇرمىستىق زاتتار. ەندى بالالار كەڭ ءۇيدىڭ بۇرىشتارىن وزدەرىنە مەنشىكتەۋگە جانتالاسىپ جاتىر.
ارينە, كەيبىر ۇيلەر ءالى تولىق اياقتالماعان. مىسالى, اناتولي زيلگە بەرىلگەن ءۇيدىڭ ىشكى جۇمىستارى ءالى 2-3 كۇندىك جۇمىستى تالاپ ەتەدى ەكەن. باقىتقا بولەنگەندەردىڭ ءبىرى – كۋمينوۆتار وتباسى. ەرلى-زايىپتى ەكەۋى عانا تۇراتىن بۇلاردىڭ قۋانىشىندا دا شەك جوق. ايتۋلارىنا قاراعاندا, بۇرىنعى تۇرعان ۇيلەرى 65 شارشى مەتر ەكەن. ءارى ول ءۇي بالەن جىلعى ەسكى كورىنەدى. ەندى 90 شارشى مەترلىك حان سارايىنداي ۇيگە ءتۇسىپ تۇر. ء«ۇي بىزگە قاتتى ۇنادى, تىنىسى كەڭ, جارىق. ەندى تەزىرەك ءۇيدىڭ ءىشىن قالىپقا كەلتىرىپ, جيھازدار مەن تۇرمىستىق تەحنيكالارىمىزدى ورنالاستىرۋعا كىرىسەمىز. بىزگە تەز ارادا ءۇي سالىپ بەرگەن جانداردىڭ بارىنە العىسىمىز شەكسىز», دەيدى ءۇي يەسىنىڭ زايىبى سۆەتلانا كۋمينوۆا.
رۋستام قوجاحمەتوۆ ەسىمدى جاس جىگىت تە تاماشا ۇيلەردىڭ بىرىنە كىردى. ء«وز باسىم مىناداي ءۇي الارمىن دەپ ويلاعان جوقپىن. جايناعان, جارقىراعان ءۇي مەنىڭ ەكى بالام مەن جارىمدى دا قۋانتىپ جاتىر. بالالارىم ءبىر بولمەدەن ەكىنشىسىنە جۇگىرىپ, ويناپ كەتتى. پرەزيدەنتكە, ونىڭ تاپسىرماسىن ورىنداعان ۇكىمەت پەن جەرگىلىكتى بيلىككە شىن جۇرەكتەن العىسىمدى ايتامىن», دەدى ول. بوتاگوز ايتماعانبەتوۆا ويقالادا 20 جىل تۇرعاندارىن ايتتى. ء«ۇيىمىزدىڭ ىشىنە سۋ كىرىپ كەتكەندە, بۇل دۇنيەدەگى باقىتسىز جان جالعىز ءبىز سەكىلدى كوردىك. بىراق ەل تاستامادى, پرەزيدەنتتىڭ ءوزى كەلىپ, ءۇي بەرەمىز, ۋايىمداماڭىزدار, دالادا قالدىرمايمىز دەگەن ەدى, ەندى, مىنە, سول كىسىنىڭ ءسوزىنىڭ شىندىعىنا كوزىمىز جەتىپ وتىر. العىسىم شەكسىز. باسقا دا قولداۋ بىلدىرگەندەرگە, دەمەۋشىلەرگە شىن جۇرەكتەن العىس ايتامىن», دەدى ول تولقىپ تۇرىپ.
وسى ۇيلەر 40 كۇندە دايىن بولعان ەكەن. العاشقىسىمەن قوسقاندا 40 كۇندە بارلىعى 100 ءۇي پايدالانۋعا بەرىلدى. ەڭ باستىسى ءۇي ەڭ قاجەتتى دۇنيەلەرىمەن تولىققان.
سولتۇستىك قازاقستان وبلىسى
