بۇعان دەيىن «تازا قازاقستان» رەسپۋبليكالىق اكتسياسى اياسىندا سىبە كولىنىڭ اينالاسى, اقباۋىر تاريحي ورنى قوقىستان تازارتىلدى. كەيبىر ازاماتتاردىڭ مادەني ساناسى جوعارى بولىپ, كۇل-قوقىس شاشپاي جۇرسە, قاپ-قاپ قوقىس جينالماس ەدى. وكىنىشتىسى, جاعاجايلاردى, كورىكتى تابيعات اياسىن بوس شولمەك, پوليەتيلەن بوتەلكە سىندى زياندى زاتتار باسىپ كەتكەن. مۇنىڭ ءبارىن ادەتتەگى ءبىر رەتتىك سەنبىلىكتە تازالاپ الۋ مۇمكىن ەمەس ەدى. بيىلعى ايدان ايعا سوزىلىپ جاتقان «تازا قازاقستان» اكتسياسى تابيعاتتىڭ تازارۋىنا شىنايى سەپتىگىن تيگىزدى. تازالىق جۇمىستارىنان بولەك وبلىس اۋماعىندا مىڭداعان كوشەت وتىرعىزىلدى.
بۇل جولى شىبىندى كول اۋماعىن تازارتۋدىڭ بىردەن ءبىر سەبەبى, كانيكۋل باستالا سالا بۇل ماڭدا جازعى وقۋشىلار لاگەرى ۇيىمداستىرىلادى. قالاعا تاياۋ جەر بولعاندىقتان, تابيعاتتان سايا ىزدەگەندەر دە شىبىندى كولىن بەتكە الادى.
– «تازا قازاقستان» اكتسياسى باستالعالى بەلسەنە قاتىسىپ ءجۇرمىز. بىلاي بىلىنبەيتىن شىعار, جول بويىندا, وزەن-كولدەردىڭ جاعالاۋىندا قوقىس وتە كوپ. سونىڭ ءبارىن شاشاتىن – ءوزىمىز. ايتارىم, تابيعاتتا دەمالدىڭىز با, قوقىستارىڭىزدى الىپ كەتىڭىزدەر! تازالىقتى وزىمىزدەن باستايىق, – دەيدى ەكولوگيالىق اكتسيالارعا بەلسەنە قاتىسىپ جۇرگەن سايات جاقىپ.
ۇلان اۋدانىندا ۇيىمداستىرىلعان تازالىق اكتسياسىنا 50 شاقتى ادام قاتىستى. ولاردىڭ ىشىندە ستۋدەنتتەر, مەكتەپ وقۋشىلارى, جاستار ۇيىمدارىنىڭ مۇشەلەرى, ەكو-بەلسەندىلەر, ەرىكتىلەر بار. كونتسەرتتىك باعدارلامالارمەن باستالعان اكتسياعا شەتەلدەن كەلگەن سپورتشىلار دا بەلسەنە اتسالىستى.
– قازاقستاننىڭ, سونىڭ ىشىندە شىعىس قازاقستاننىڭ تابيعاتى ەرەكشە كوركەم. وسىنداي سۇلۋلىقتى اربىرەۋىمىز ايالاي ءبىلۋىمىز كەرەك. ايالاۋ دەگەنىمىز, وپ-وڭاي, قولىڭداعى قوقىستى دالاعا تاستاما. بار بولعانى – سول. ءوزىم بۇگىنگى اكتسياعا قاتىسقانىما قۋانىپ تۇرمىن. ۇيىمداستىرۋشىلارعا راحمەت, – دەيدى ستوكگولمنەن كەلگەن سپورتشى يوگان مارتەنسون.
ايتا كەتەيىك, اينالدىرعان ەكى ساعات ىشىندە سپورتشىلار عانا 50 قاپ قوقىس جيناپ, كول اينالاسىن ايناداي تاپ تازا ەتتى. ءىس-شارا سوڭىندا ورتاعا ۇيىلگەن قاپتار ارنايى ورىنعا اپارىپ توگىلدى. ال اكتسياعا قاتىسقانداردىڭ بارىپ قايتۋىن ۇلان اۋدانى اكىمدىگى ۇيىمداستىردى.
شىعىس قازاقستان وبلىسى,
ۇلان اۋدانى
