سۋرەتتەردى تۇسىرگەن – ەرلان ومار, «EQ»
مەكتەپ ىشىندەگى مەرەكەلىك اتموسفەرا ءا دەگەننەن اسەرگە بولەدى. الىستان ەستىلگەن وقۋشىلاردىڭ شات-شادىمان كۇلكىسى ءبىزدى بۇيدالاپ اكەلىپ, وتەباي تۇرمانجانوۆ اتىنداعى كابينەتتىڭ الدىنان ءبىر-اق شىعاردى. سويتسەك, 1-سىنىپتىڭ بۇلدىرشىندەرى ەكەن. بالالاردىڭ بىلىمگە دەگەن قۇلشىنىستارى تىلدەرىنەن دە, تۇرلەرىنەن دە كورىنىپ-اق تۇر. مۇعالىم سۇراق قويىپ, وعان وقۋشىلار جامىراي جاۋاپ بەرىپ جاتىر. ءبىز قاشانعى قاراپ تۇرامىز؟ باسىمىزدى يزەپ, كابينەتكە ەنىپ كەتتىك. مۇعالىم سۇراقتار لەگىن جالعاستىرىپ جاتتى. «بالالار, ەلىمىز تاۋەلسىزدىگىن قاي جىلى الدى؟». ءسال عانا ۇنسىزدىك. سودان سوڭ, «1991 جىلى» دەپ ساڭق ەتتى ءلايلا ەسىمدى اقىلدى قىز. «وي جارايسىڭ!» دەستى اتا-انالار. باسقا بۇلدىرشىندەر دە باس قالامىزدىڭ اتاۋىن, رامىزدەردىڭ اۆتورلارىن, ەلىمىزدىڭ قاي مەملەكەتتەرمەن شەكتەسەتىنىن مۇدىرمەي, بىرىنەن سوڭ ءبىرى ايتىپ جاتتى. مۇنىمەن توقتاپ قالماي, بۇلدىرشىندەر ۇلى اقىننىڭ ولەڭدەرىن جاتقا وقىعاندا اجەپتاۋىر اسەرلەنىپ قالدىق. نە دەگەنمەن اباي مەكتەبىنىڭ شاكىرتتەرى عوي. سىنىپ ساعاتىنىڭ اياسىندا وقۋ-اعارتۋ ءمينيسترى عاني بەيسەمباەۆ بەينە جولداۋ ارقىلى بارلىق مەكتەپ وقۋشىلارىن 2023-2024 وقۋ جىلىن ءساتتى اياقتاۋلارىمەن قۇتتىقتادى.
«وسى ايتۋلى وقيعانى العاش رەت ء«بىلىمىم – وتانىما» تاقىرىبىندا جاڭا فورماتتا اتاپ وتەمىز. بۇل – ءبىر جىل اتقارعان جۇمىستى قورىتىندىلاپ, مۇعالىمدەرگە, مەكتەپ ۇجىمىنا, اتا-انالارىڭىزعا العىس ايتۋعا جاسالعان مۇمكىندىك. ويتكەنى سىزدەردىڭ ەڭبەكپەن العان بىلىمدەرىڭىز وتانعا دەگەن سۇيىسپەنشىلىك پەن قۇرمەتتىڭ بەلگىسى. ءبىر جىلدا سىزدەر ەسەيىپ, وقۋدا, شىعارماشىلىقتا, سپورتتا ۇلكەن جەتىستىكتەرگە جەتتىڭىزدەر. سىزدەردى شىن جۇرەكتەن قۇتتىقتايمىن جانە مۇنىمەن توقتاپ قالماۋلارىڭىزدى تىلەيمىن!», دەدى ول.
جيىننىڭ سوڭىنا قاراي سىنىپ جەتەكشىسى وقۋ جىلىن ۇزدىك اياقتاعان وزاتتارعا ماقتاۋ قاعازىن تابىستادى. راسىمەن, ماقتاۋعا تۇرارلىق وقۋشىلار. وسى ساتتە كوزىمنىڭ قيىعىمەن اتا-انالارعا قارادىم. ءبارى دە سۇيكىمدى جىميىپ وتىر. بالاڭ جاقسى دەسە جانىڭ سۇيسىنەدى, جامان دەسە جانىڭ كۇيەدى دەگەن وسى عوي, شىركىن.
سىنىپ ساعاتىنىڭ سوڭىنا قاراي 11-سىنىپ وقۋشىلارىمەن جۇزدەسكىم كەلدى. جۇزدەستىم دە. تۇلەكتەر «مەن. مەكتەپ. ۇستاز» دەگەن تاقىرىپتا ەسسە جازىپ جاتىر ەكەن. ولاردى كورىپ, «ارمانىمنىڭ ءبارىن جازسام, داپتەرگە سىيماس ەدى» دەگەن قوجانىڭ بەينەسى كوز الدىما كەلدى. سودان 11 ءا سىنىبىنىڭ وقۋشىسى, التىن بەلگى يەگەرى تاجىكەنوۆا ارۋجانننىڭ پىكىرىن بىلدىك.
«مەنىڭ بويىمدا ءدال قازىر قيماستىق, ساعىنىش, ءۇمىت, قوبالجۋ سىندى ارالاس سەزىمدەر بولىپ جاتىر. ويتكەنى پارتالاس قۇربى-قۇرداستارىمدى قيمايمىن. ودان بولەك مەكتەپتەگى قىزىقتى ساتتەردى دە ەندى تەك ساعىنىشپەن ەسكە الاتىنىمىز قيىن. مەكتەپ دەگەن بۇل – جاي عانا مەكەمە ەمەس, ول ءبىزدىڭ جىلى ساتتەرگە تولى ىستىق ۇيامىز ءارى تۇلعا رەتىندە قالىپتاستىرعان ۇلكەن وتباسىمىز. ۇلتتىق بىرىڭعاي تەستىلەۋدىڭ دە ۋاقىتى جاقىنداعان سايىن قوبالجىپ ءجۇرمىز. بىراق مەن وزىمە سەنىمدىمىن. ويتكەنى 9-سىنىپتان باستاپ بولاشاق ماماندىعىمدى تاڭداپ قويعام. بۇيىرسا ەۋرازيا ۇلتتىق ۋنيۆەرسيتەتىنىڭ ساۋلەت ونەرى ماماندىعىنا تالاپتانىپ وتىرمىن», دەيدى ا.تاجىكەنوۆا.
جاس تالاپكەرلەرگە الداعى سىناقتاردان ءساتتى ءوتۋىن تىلەيمىز!
