10 مامىر كۇنى رەسەيدىڭ مادەني استاناسى سانكت-پەتەربۋرگ قالاسىندا جولاۋشىلار اۆتوبۋسى مويكا وزەنىنە باتىپ, ءۇش ادام اجال قۇشقانى ءمالىم. وسى ءبىر توتەنشە جاعداي كەزىندە اۋىر اپاتقا تاپ بولعانداردى شۇعىل قۇتقارۋعا ۇمتىلعاندار ىشىندە جەرلەسىمىز ەرحان احانوۆ تا بار.
– ءبىرىنشى شىنجىردان ۇستاپ داعىستان ەلىنىڭ ازاماتى تومەن تۇسە باستادى, سوڭىنان مەن ەردىم. ءبىز سۋدىڭ تۇبىنە سىرعىعاندا, اۆتوبۋس جۇرگىزۋشىسى ەسىكتى اشۋعا ۇمتىلدى. بىراق تالپىنعانىمەن تۇك تە شىقپاعان سوڭ, قاسىمداعى جىگىت ەكەۋىمىز ەسىكتى اشىپ ۇلگەرگەنىمىزدە وزگە جىگىتتەر دە كومەككە جەتتى. وزدەرىڭىز بىلەتىندەي, ءبىزدىڭ قازاق جىگىتتەرى كومەك بەرۋگە ارقاشان دايىن تۇرادى, – دەيدى ەرحان احانوۆ.
ەرحان حالىقتىق قۇتقارۋشىلارمەن بىرگە جۇرگىزۋشىنى, ەگدە جاستاعى ەر مەن ايەلدى سۋدان الىپ شىعىپ, العاشقى مەديتسينالىق كومەك كورسەتكەن. جەرلەسىمىز بۇل ەرلىگىن باتىرلىق ەمەس, كادىمگى ازاماتتىق بورىشىم دەپ ەسەپتەيدى.
ايتا كەتەيىك, وسى وقيعادان سوڭ «قۇتقارۋداعى ەرلىگى ءۇشىن» مەدالمەن 15 ازامات ماراپاتتالعان. ادام تاعدىرى ءۇشىن پوتسەلۋەۆ كوپىرىنەن مۇزدى سۋعا سەكىرگەن باتىرلارعا سانكت-پەتەربور قالاسىنىڭ گۋبەرناتورى الەكساندر بەگلوۆ ارنايى كەلىپ سالالىق ماراپاتتى تابىستادى. قۇتقارۋشىلار اراسىنداعى ەڭ جاسى – 25-تەگى قازاق بالاسى ەرحان احانوۆ تۋرالى رەسەي فەدەراتسياسىنىڭ بۇكىل اقپارات قۇرالدارى جازدى.
