فوتو: اشىق دەرەككوز
حالىققا قىزمەت كورسەتۋ ورتالىقتارىنا جۇرگىزىلگەن مونيتورينگ ناتيجەسىندە بيۋدجەتكە تۇسەتىن تابىس 10,6 ملرد تەڭگەدەن 91,3 ملرد تەڭگەگە دەيىن ۇلعايدى.
حقكو-نىڭ بىرنەشە مامانى 2011 جىلدان بەرى جاڭارماعان جۇيە ارقىلى زاڭ شەڭبەرىنەن تىس ارەكەتتەرىن جۇزەگە اسىرىپ كەلگەن.
ولار جۇيەگە جالعان دەرەك ەنگىزىپ, جالعان قۇجات تاپسىرۋعا جاعداي تۋعىزىپ, جەمقورلىققا جول بەرگەن.
«كومپيۋتەرلەرگە قاشىقتان قول جەتكىزۋ ارقىلى تۇلعالاردى اۋىستىرۋ جانە ەمتيحان ناتيجەلەرى ارقىلى جۇرگىزۋشى كۋالىكتەرىن بەرۋ پروتسەسىندە ەلەۋلى جەمقورلىق تاۋەكەلدەرى انىقتالدى. ماسەلەن, 2022 جىلى 9,4 مىڭ اۆتوكولىكتى تىركەگەنى ءۇشىن 10,6 ملرد تەڭگە جينالدى, 2023 جىلى زاڭداستىرۋدى ەسكەرە وتىرىپ, 10,2 مىڭ اۆتوكولىكتى تىركەگەن كەزدە 91,3 ملرد تەڭگە ءتۇستى. اتالعان تاۋەكەلدەردى جويۋ ناتيجەسىندە وتكەن جىلى بيۋدجەتكە تۇسكەن ءتۇسىم 9 ەسە ۇلعايدى», دەلىنگەن انتيكور حابارلاماسىندا.
سونداي-اق اگەنتتىك تەكسەرۋ ناتيجەسىندە زاڭسىز جۇرگىزۋشى كۋالىگىن الۋ جاعدايلارىن ازايتۋ ماقساتىندا جۇيەنى اۆتوماتتاندىرۋدى جۇزەگە اسىرعان. قوعامدىق باقىلاۋ ءۇشىن بەينەتىركەۋ ەنگىزىلدى. ەمتيحانداردى قايتا تاپسىرۋ راسىمدەرى دە رەتتەلدى. ونى قايتا تاپسىرۋ سانى ەكى رەتكە شەكتەلىپ, ال وتە الماعان جاعدايدا 3 ايدان كەيىن نەمەسە تىيىم سالىنعان زاتتاردى پايدالانعان جاعدايدا 6 ايدان كەيىن تەست تاپسىرادى.
ايتا كەتەيىك, 2023 جىلعى جەلتوقساندا حقكو قىزمەتكەرلەرىن جەمقورلىق سۋبەكتىلەرىنە جاتقىزۋعا قاتىستى زاڭناماعا ماڭىزدى تۇزەتۋلەر ەنگىزىلدى. بۇل وزگەرىستەر 2025 جىلدىڭ قاڭتار ايىنان باستاپ كۇشىنە ەنەدى.
«وتىنىمدەردى رەسىمدەۋ جانە قاراۋ كەزىندە دەرەكتەردى تۇزەتۋ مۇمكىندىگى الىنىپ تاستالدى. ەندى تەك اكىمشىلىك پوليتسيا كوميتەتى وزگەرىس ەنگىزە الادى. وتىنىمدەردى تىركەۋ ءراسىمى جەڭىلدەتىلدى. بۇل ءۇشىن تەك جسن ەنگىزۋ قاجەت, ال قالعان دەرەكتەر باسقا اقپاراتتىق جۇيەلەردەن اۆتوماتتى تۇردە تولتىرىلادى. بۇل رەتتە جۇيەنىڭ ءوزى ەكىنشى دەڭگەيدەگى بانكتەردىڭ تۇبىرتەكتەرىن, مىندەتتى تولەمدەرىن جانە ايىپپۇلدارىن تولەۋدى تەكسەرەدى», دەپ ءتۇسىندىردى اگەنتتىكتىڭ ءباسپاسوز قىزمەتى.
