فوتو: ۆيدەوسكرين
«رەسپۋبليكالىق اۆتوجولدارعا سۋ تاسقىنى قاۋپى تونگەن 396 ۋچاسكە, 68 كوپىر جانە 650 سۋ وتكىزۋ قۇبىرى انىقتالدى. قاۋىپتى جول بويلارىندا تاۋلىك بويى كەزەكشىلىك جانە كۇندەلىكتى پاترۋلدەۋ ۇيىمداستىرىلدى. سۋ تاسقىنى باستالعالى جەدەل شارالار قابىلدانىپ, بارلىق وڭىردە ينەرتتى جانە باسقا دا ماتەريالدار دايىندالدى. قازىرگى ۋاقىتتا 100 مىڭ تەكشە مەتر قۇم, 40 مىڭ تەكشە مەتر تاس, 325 مىڭ تەكشە مەتر قيىرشىق تاس, 75 مىڭ تەكشە مەتر قۇم-قيىرشىق تاس قوسپاسى جانە 150 مىڭ دانا قۇم سالىنعان قاپ دايىندالدى», دەدى عالىمجان وتەنباەۆ.
ايتۋىنشا, ەرىگەن سۋلاردى وتكىزۋ جانە اۆتوجولدار بويىنداعى سۋ وتكىزۋ قۇبىرلارى 100%-عا تازارتىلعان.
سپيكەردىڭ سوزىنشە, بۇگىن, ياعني 7 ساۋىردە 5 وبلىس اۋماعىنداعى رەسپۋبليكالىق ماڭىزى بار اۆتوجولداردا, اتاپ ايتقاندا اتىراۋ, سولتۇستىك قازاقستان, اقمولا, پاۆلودار, قوستاناي وبلىستارىندا جالپى ۇزىندىعى 3430 مەتر بولاتىن جولدا 9 سۋ باسۋ فاكتىسى تىركەلدى.
