اقش-تىڭ كولۋمبيا ۋنيۆەرسيتەتىندە قازاق مۋزىكاسىنىڭ كەشى ءوتتى. ءىس-شارانى ۇيىمداستىرۋعا ۋنيۆەرسيتەتتىڭ اعا وقىتۋشىسى كنار ابراحاميان مۇرىندىق بولعان. قازاق حالىق اندەرىن بەس جىلدان بەرى زەرتتەپ جۇرگەن جاس عالىمنىڭ ايتۋىنشا, حالىق اندەرى ءالى كۇنگە كەڭەستىك نۇسقادا ورىندالىپ ءجۇر. كنار حانىم ۇكىلى ىبىرايدىڭ «گاككۋىنىڭ» باستاپقى تۇپنۇسقاسىن كورەرمەنگە تانىستىرىپ, ىرعاعى مەن اۋەزىنىڭ وزگەشەلىگىن ايتتى.
– حالىق كەڭ تانىلعان اندەردىڭ كوبىنە كەڭەستىك وپەرالىق نۇسقالارىن بىلەدى. بىراق وكىنىشكە قاراي, اندەردىڭ باستاپقى كۇيىنەن قالاي وزگەرگەنىن بىلمەيدى. ارينە, ەتنوگرافيالىق كىتاپتار بولعانىمەن, شىن مانىندە, بۇل تاقىرىپ يگەرىلمەي جاتىر. سوندىقتان كومەسكىلەنگەن تولىق نۇسقاسىن جاڭعىرتىپ, تانىستىرسا, مادەني جادقا جاقسى بولار ەدى. قازاقتىڭ عاسىرلار بويى قالىپتاسقان مۋزىكاسىن كەڭەستىك يدەولوگيا بۇرمالاعانىن بۇدان بۇرىن باتىستا مۇلدەم قاراستىرماعان, – دەيدى زەرتتەۋشى كنار ابراحاميان.
مادەني كەشكە جينالعان امەريكالىقتاردىڭ كوبى قازاق دومبىراسىنىڭ كۇمبىرلەگەن قوڭىر ءۇنىن العاش رەت ەستىپ, تاڭداي قاعىسقان. حارريمان ينستيتۋتىنىڭ ديرەكتورى, ۆالەنتينا يزميرليەۆا ءوز سوزىندە:
– دومبىرا ءۇنىن بۇعان دەيىن ەشقاشان ەستىگەن ەمەسپىن. بۇل وتە كەرەمەت ەكەن. مەن مۋزىكالىق ارالۋاندىقتى جاقسى كورەمىن. كەڭەس وداعىنىڭ ەلدىڭ ۇلتتىق مۋزىكاسىن بۇرمالاعانىن, ونى قازاق حالقىنا قارسى قارۋ رەتىندە قولدانعانىن ەستىپ, كوڭىلىمىز ءتۇستى. دەگەنمەن قازىر عالىمداردىڭ وسى ءۇردىستى وزگەرتىپ, مۋزىكانىڭ شىنايى ءمانىن قايتادان اشىپ جاتقانىنا وتە قۋانىشتىمىن, – دەپ اقجارما پىكىرىن ءبىلدىردى.
ايتا كەتەيىك, كولۋمبيا ۋنيۆەرسيتەتىنىڭ پوستكەڭەستىك كەڭىستىكتى زەرتتەيتىن حارريمان ينستيتۋتى قازاق مادەنيەتىن تانۋعا بايلانىستى تەك عىلىمي ەڭبەكتەرمەن عانا شەكتەلمەگەن. وندا قازاق تاريحى مەن ساياساتىنان دارىستەر بەرىلىپ, قازاق ءتىلىن ۇيرەتەتىن كۋرس اشۋ جوسپارلانىپ وتىر.
