فوتو: بولات شايحينوۆ
ايتا كەتسەك, باق وكىلدەرى سوت زالىنا كىرە المادى. جۋرناليستەر ءۇشىن مونيتور ارقىلى تىكەلەي كورسەتىلىم ۇيىمداستىرىلدى.
الدىن الا وتىرىس بارىسىندا پروكۋرور بىرنەشە مالىمدەمە جاسادى:
- قۋاندىق بيشىمباەۆ پەن سالتانات نۇكەنوۆا اراسىنداعى نەكە رەسمي تىركەلمەگەن;
- بيشىمباەۆ سالتانات نۇكەنوۆانىڭ بارلىق تەلەفون قوڭىراۋلارىن باقىلاپ, وعان جۇمىس ىستەۋگە تىيىم سالىپ, قارجى جاعىنان تاۋەلدى ەتكەن;
- ايەلىن قىزعانعان بيشىمباەۆ وعان جۇيەلى تۇردە فيزيكالىق زورلىق-زومبىلىق كورسەتكەن;
- 2023 جىلعى ناۋرىز ايىنىڭ ورتاسىندا بيشىمباەۆ نۇكەنوۆانى سوققىعا جىققان;
- سالتانات نۇكەنوۆا اعاسىنا شاعىمداندى. ول ونى بيشىمباەۆپەن اجىراسۋعا كوندىردى, بىراق نۇكەنوۆا اجىراسۋدان باس تارتتى;
- 2023 جىلدىڭ جازىندا بيشىمباەۆ نۇكەنوۆاعا استانادان الماتىعا كوشۋدى ۇسىندى. ول زورلىق-زومبىلىق توقتايدى دەگەن ۇمىتپەن كەلىستى. الايدا كۇيەۋى كۇش كورسەتۋدى جالعاستىرعان.
پروكۋروردىڭ ايتۋىنشا, قاستاندىق جاسالعان كۇنى قۋاندىق بيشىمباەۆ پەن سالتانات نۇكەنوۆا كونتسەرتتە بولعان. اراداعى جانجال سول جەردە باستالىپ, مەيرامحانادا جالعاستى. نۇكەنوۆا بيشىمباەۆتان كەتكىسى كەلەتىنىن ايتتى, بۇل تۋرالى اعاسىنا دا حابارلاعان.
بيشىمباەۆ ماس كۇيىندە نۇكەنوۆانى سوققىعا جىعىپ, باسىنا زاقىم كەلتىردى, كەيىن ونى اياعىمەن تەپكىلەي باستادى. جابىرلەنۋشى مەيرامحاناداعى بولمەلەردىڭ بىرىندە جابىلدى, بىراق بيشىمباەۆ ەسىكتى سوعىپ, وعان قايتادان قول كوتەرگەن.
مەملەكەتتىك ايىپتاۋشى اتاپ وتكەندەي, نۇكەنوۆا بىرنەشە رەت ەسىن جيىپ, ءوز-وزىنە كەلگەن, الايدا ەكس-مينيستر ونى ۇرىپ-سوعۋدى جالعاستىرعان.
