كورنەكتى اقىن, قازاقستاننىڭ ەڭبەك سىڭىرگەن قايراتكەرى, حالىقارالىق «الاش» ادەبي سىيلىعىنىڭ لاۋرەاتى ارمان قانيدىڭ تۋعانىنا 70 جىل تولىپ وتىر. اتالعان مەرەيتويعا وراي پاۆلودار وبلىسى اكىمدىگىنىڭ قولداۋىمەن, وبلىستىق مادەنيەت, ارحيۆتەر جانە قۇجاتتاما باسقارماسىنىڭ ۇيىمداستىرۋىمەن «تولقىن-تولقىن جىر تۋار بىزدەن كەيىن» اتتى رەسپۋبليكالىق جىر ءمۇشايراسى بولىپ ءوتتى.
وسى ءىس-شاراعا اقىن, اباي اتىنداعى مەملەكەتتىك سىيلىقتىڭ لاۋرەاتتارى سەرىك اقسۇڭقار ۇلى, عالىم جايلىباي, ءماجىلىس دەپۋتاتى جاناربەك ءاشىمجان سىندى زيالى قاۋىم وكىلدەرى قاتىستى. قازاقستان جازۋشىلار وداعى استانا قالالىق فيليالىنىڭ ديرەكتورى, اقىن داۋلەتكەرەي كاپ ۇلى مودەراتورلىق ەتكەن كەشتە العاشقى ءسوز تىزگىنىن پاۆلودار وبلىستىق مادەنيەت, ارحيۆتەر جانە قۇجاتتاما باسقارماسىنىڭ باسشىسى مەدەت الپىسباي ۇلى الىپ, تاعىلىمدى جيىندى اشىپ بەردى.
«ارمان اعا – ءبىز ءۇشىن ءتىرى, ارامىزدا جۇرگەن ازامات. ويتكەنى عالىمنىڭ ارتىندا قالعان حاتى ولمەيتىنى ايقىن. اقىندى ەسكە الۋ ماقساتىندا جىلدا ايماقتىق ءمۇشايرا ءوتىپ تۇرادى. سىزدەرگە جانە وسى ءىس-شارانى وتكىزۋگە ۇيىتقى بولعان ۇلتتىق كىتاپحانا ۇجىمىنا مىڭ العىس», دەگەن مەدەت مىرزا كىتاپحانا قورىنا ءماشھۇر-ءجۇسىپ كوپەي ۇلىنىڭ 10 تومدىعىن تارتۋ ەتتى.
سونىمەن قاتار ءىس-شارا بارىسىندا ارمان قانيدىڭ ولەڭدەر جيناعىنىڭ تۇساۋى كەسىلدى. جيناققا دەمەۋشىلىك جاساعان – پاۆلودار وبلىستىق ءماسليحاتىنىڭ دەپۋتاتى, كاسىپكەر اسىلبەك تۋعانباي ۇلى. كىتاپتىڭ تۇساۋكەسەرىندە اقىندار سەرىك اقسۇڭقار ۇلى مەن عالىم جايلىباي, ءماجىلىس دەپۋتاتى جاناربەك ءاشىمجان, اقىننىڭ جان جارى باقىت احانبايقىزى كىتاپتىڭ لەنتاسىن قيدى.
«ارماننىڭ ورنى مەن ءۇشىن بولەك, ول – كۇرەسكەر اقىن. ماعجانداردىڭ الپىسىنشى, جەتپىسىنشى جىلعا جەتكەن جاڭعىرىعى سەكىلدى. ون بەس جاسىنان جىر جازىپ, ازاماتتىعىمەن تانىلعان, كەرەكۋدە ادەبي ورتا جاساعان ادام. انا جۇرتىنان قاراساڭ – جاياۋ مۇسا, اتا جۇرتىنان قاراساڭ – ءمادي, مىنە, وسىنداي ەكى تەكتىدەن تۋعان اقىن. ارمان قانيدىڭ ەكىنشى عۇمىرى ەندى باستالدى. الاش قالاي جاساسا, ارمان قاني دا سولاي جاساي بەرەدى», دەدى اقىن سەرىك اقسۇڭقار ۇلى.
سونىمەن قاتار قالامداس دوسى عالىم جايلىباي اقىننىڭ بولمىس-بەدەرى جونىندە ايتىپ ءوتتى.
«ارمان قاني – قازاق ءۇشىن ۇلكەن ۇعىمعا اينالعان ازامات. تەكتىلەردىڭ قانىنان جارالعان اقىن ار, نامىس, ۇيات دەگەن ۇعىمدارمەن ءومىر ءسۇردى. ارمانمەن ءبىزدى كوپ دۇنيە بايلانىستىرادى. 2001 جىلى اقىننىڭ ءبىر كىتابىنا العىسوز جازدىم ءارى «قازاق ادەبيەتى» گازەتىنە «كەرەكۋدە ارمان دەگەن اقىن بار» اتتى ماقالام شىقتى. سولايشا ارمانمەن ءومىرىنىڭ سوڭعى كۇنىنە دەيىن بىرگە جۇردىك. تۋعان جەرىندە اقىن سىيلى بولىپ ءوتتى, قالامگەر ىنىلەرىنىڭ ءبارى قۇرمەت تۇتىپ, جاقسى ءسوزىن اياعان جوق», دەدى ول.
بۇدان سوڭ «تولقىن-تولقىن جىر تۋار بىزدەن كەيىن» جىر ءمۇشايراسىنىڭ جەڭىمپازدارىن ماراپاتتاۋ سالتاناتى ءوتتى. جىر دوداسىنا عالىم جايلىباي, سەرىك اقسۇڭقار ۇلى, داۋلەتكەرەي كاپ ۇلى, جارقىنبەك امانتاي جانە جۇمابەك سمانوۆ باستاعان ايتۋلى اقىندار قازىلىق ەتتى. مۇشايراعا ەلىمىزدىڭ ءار وڭىرىنەن 40 جاسقا دەيىنگى 30 اقىن قاتىستى. دودادا امانجول شامكەنوۆ اتىنداعى ارنايى جۇلدە ءبىرجان احمەرگە, مۇزافار الىمباەۆ اتىنداعى ارنايى جۇلدە ايدانا سەگىزباەۆاعا, جۇلدەلى 3-ورىن ولجاس قاسىمعا بۇيىردى. ال 2-ورىندى ايبەك ورالحان, 1-ورىندى جۇلدىزاي ىسقاق السا, باس جۇلدەنى الپىسباي قونشى يەلەندى.
ولەڭ وقىلعان ورەلى كەشتە ءماديدىڭ «قارقارالى» جانە جاياۋ مۇسانىڭ «اق سيسا» اندەرى شىرقالىپ, كورەرمەنىن كەرەمەت اسەرگە بولەدى. سونىمەن قاتار س.تورايعىروۆ اتىنداعى وبلىستىق كىتاپحانا مەن بۇقار جىراۋ اتىنداعى ادەبيەت جانە ونەر مۋزەيىنىڭ قورىنداعى اقىننىڭ ءومىرى مەن شىعارماشىلىعىنا قاتىستى كىتاپتار, جادىگەرلەر قويىلعان مازمۇندى كورمە ۇيىمداستىرىلدى.
