ۋنيۆەرسيتەت عىلىمي جۇمىس ناتيجەلەرىن كوممەرتسيالاندىرۋدى قولداۋ ماقساتىندا «Jana asu» گرانتتارىن بولەدى. بيىل اشىق بايقاۋعا جوعارى وقۋ ورنىنىڭ عالىمدارى 50 جوبا جولداعان.
– قازىرگى تاڭدا وتاندىق عىلىمنىڭ الدىنداعى باستى ماسەلە – عالىمداردىڭ عىلىمي-تەحنيكالىق قىزمەتى ناتيجەلەرىن كوممەرتسيالاندىرۋ. مەملەكەت باسشىسى ءوندىرىس پەن عىلىم تىعىز بايلانىستا جۇمىس ىستەۋى كەرەگىن ۇنەمى ايتىپ كەلەدى. عىلىمي جەتىستىكتەردىڭ بارلىعى حالقىمىزدىڭ ءال-اۋقاتىن, ءومىر دەڭگەيىن جاقسارتۋعا ءتيىس. سوندىقتان ءبىز بىلتىردان بەرى ۋنيۆەرسيتەت ەسەبىنەن كوممەرتسيالاندىرۋعا الەۋەتى بار عىلىمي جوبالار مەن يدەيالاردى قولداۋعا باعىتتالعان «JANA ASU» جوباسىن باستادىق. بيىل گرانتتار سانىن كوبەيتتىك ءارى بۇل ءداستۇردى بولاشاقتا جالعاستىرۋدى جوسپارلاپ وتىرمىز. ۋنيۆەرسيتەتتى عىلىمي-زەرتتەۋ ۋنيۆەرسيتەتىنە اينالدىرۋ اياسىندا ءىرى كومپانيالارمەن ىنتىماقتاستىققا جانە قولدانبالى عىلىمدى دامىتۋعا, سونداي-اق عالىمدارىمىزدىڭ عىلىمي ازىرلەمەلەرىنىڭ ناتيجەلەرىن وندىرىسكە ەنگىزۋگە كوپ كوڭىل بولىنەدى, – دەدى ۋنيۆەرسيتەت رەكتورى ەرلان سىدىقوۆ.
مەملەكەتتىك ەلتاڭبانىڭ اۆتورى, ۋنيۆەرسيتەتتەگى ساۋلەت كافەدراسىنىڭ وقىتۋشىسى جانداربەك مالىبەكوۆ يننوۆاتسيالىق كيىز ءۇيدىڭ مودۋلدىك ۇلگىسىن جاساۋدى جوسپارلاپ وتىر. ول كۇن باتارەيالارىمەن, بايلانىسپەن, ينتەرنەتپەن جانە باسقا دا مۇمكىندىكتەرمەن تولىق جابدىقتالادى. عالىمنىڭ پىكىرىنشە, زاماناۋي كيىز ءۇي تۋريستەر, اۋىل شارۋاشىلىعى قىزمەتكەرلەرى, توتەنشە جاعداي جانە باسقا دا سالانىڭ قىزمەتكەرلەرى اراسىندا ۇلكەن سۇرانىسقا يە بولادى. اسىرەسە توتەنشە جاعدايلاردا پايدالانۋعا مۇمكىندىك بار.
كولىك-ەنەرگەتيكا فاكۋلتەتىنىڭ وقىتۋشىسى نۇرجان بولاتوۆ كوپقاباتتى عيماراتتاردا قوقىستى باسقارۋدىڭ يننوۆاتسيالىق جۇيەسىن ازىرلەپ جاتىر. عالىم قالدىقتاردى جيناۋ, سۇرىپتاۋ جانە عيماراتتىڭ تومەنگى دەڭگەيىنە تاسىمالداۋ ءۇشىن قوقىس شىعارۋدىڭ دەمونستراتسيالىق مودەلىن قۇرۋدى جوسپارلاپ وتىر. عىلىمي يدەيا قالدىقتاردى سۇرىپتاۋعا جانە وندىرىستىك كاسىپورىنداردا ەكىنشى مارتە شيكىزات رەتىندە قولدانۋعا مۇمكىندىك بەرەدى.
ۋنيۆەرسيتەت عالىمى اسىلتاس قالتەنوۆا قازاق ءتىلىن شەتەلدىكتەر ءۇشىن بارىنشا قولجەتىمدى جاساۋعا نيەتتى. ول اعىلشىن تىلىندە سويلەيتىندەر ءۇشىن قازاق تىلىندەگى نەگىزگى ديالوگتەر ۇسىنىلاتىن «Sana» ءموبيلدى قوسىمشاسىن ازىرلەۋگە كىرىستى. اسىلتاس ءوز يدەياسىن ۋنيۆەرسيتەت گرانتىنىڭ كومەگىمەن جۇزەگە اسىرادى.
جاراتىلىستانۋ فاكۋلتەتىنىڭ وقىتۋشىسى قازبەك دۇيسەمباەۆتىڭ ەكولوگيالىق جوباسى دا وقۋ ورداسىنىڭ قارجىلاي گرانتتىق قولداۋىنا يە بولدى. عالىم الما اعاشتارىنىڭ ساڭىراۋقۇلاق اۋرۋلارىن پتسر تەستى ارقىلى تەز ءارى ءدال انىقتاۋدىڭ جولىن تاپتى.
عالىم مۇراتبەك ارپابەكوۆ پەن ماگيسترانت كارىم مازمانوۆ تسيفرلىق مامانداردى جۇمىسقا قابىلداۋدىڭ يننوۆاتسيالىق پلاتفورماسىن ازىرلەدى. ولار كومپانيالاردىڭ كادرلاردى ىرىكتەۋ ۇدەرىسىن جەڭىلدەتۋگە جانە جاقسارتۋعا نيەتتى.
– ءبىزدىڭ جوبا شاعىن جانە ورتا بيزنەستى قولداۋعا مۇمكىندىك بەرەدى. 100-دەن اسا بيزنەس وكىلدەرىنىڭ اراسىندا ساۋالداما جۇرگىزدىك. ولاردا ماركەتپلەيس ارقىلى كوپ ماماندارعا قولجەتىمدىلىك بار بولعانىمەن, اۆتوماتتاندىرىلعان جۇمىسقا قابىلداۋ ماسەلەلەرى تۋىندايدى, ماماننىڭ جۇمىس ساپاسىن تەكسەرۋ قاراستىرىلماعان. ءبىز جاساندى ينتەللەكت كومەگىمەن مامانداردىڭ جۇمىس ساپاسىن 3 كەزەڭدە تەكسەرەتىن بولامىز, – دەيدى كارىم مازمانوۆ.
ۋنيۆەرسيتەتتىڭ اعا وقىتۋشىسى نۇرزادا امانگەلدى قازاقشا ىم-يشارا ءتىلىن تانۋدىڭ العاشقى اۆتوماتتى جۇيەسىن قۇرۋ بويىنشا بىرەگەي جوبانى جالعاستىرۋعا مۇمكىندىك الدى. جوعارى وقۋ ورنى عالىمعا ەكىنشى رەت اقشالاي گرانت ءبولدى. عىلىمي جوبا جاساندى ينتەللەكتكە نەگىزدەلگەن جانە سويلەۋ مەن ەستۋ قابىلەتى بۇزىلعان ادامدارعا باعىتتالعان. ونىڭ عىلىمي جوباسىن دۇنيەجۇزىلىك بانك تە قولدادى.
ايتا كەتەيىك, ەۋرازيا ۇلتتىق ۋنيۆەرسيتەتى «Jana asu» ىشكى گرانتىن 2022 جىلى بەكىتتى. وتكەن جىلى 4 عالىم بايقاۋ جەڭىمپازى اتانىپ, گرانت يەگەرى بولعان ەدى.
