سۋرەتتى تۇسىرگەن – ك.گاسيموۆ
تالانتتى ونەرپازدىڭ سيقىرلى سازعا تولى كەشى «استانا وپەرا» تەاترىنىڭ كۇلاش بايسەيىتوۆا اتىنداعى كامەرالىق زالىندا ءوتتى.
جەتىگەن – كونەدەن كەلە جاتقان كوپىشەكتى مۋزىكالىق اسپاپ. ونىڭ جاسالۋى دا, ويناۋ ءادىسى دە كۇردەلى. ەرتەدە حالقىمىز جەتىگەننىڭ ىشەگىن اتتىڭ قىلىنان تاعىپ, تيەكتىڭ ورنىنا اسىقتار پايدالانىلعان دەسەدى. اسپاپتىڭ قۇلاق كۇيىن وسى اسىقتاردى ءارلى-بەرلى جىلجىتىپ كەلتىرگەن.
جالپى, جەتىگەنگە ارناپ جازىلعان شىعارمالار وتە از. ءبىر جاعىنان, جەتىگەندە وينايتىن كاسىبي مۋزىكانتتار دا ساناۋلى. سول ساناۋلىلاردىڭ بىرەگەيى دەپ قاراكوزدى ايتۋعا بولادى. ول جەتىگەندى شەبەر ويناپ قانا قويماي, ونىڭ رەپەرتۋارىن جاڭا تۋىندىلارمەن بايىتىپ, كونە مۋزىكالىق اسپابىمىزدى تىڭدارمانعا تانىمال ەتۋگە سۇبەلى ۇلەس قوسىپ جۇرگەن ونەرپاز.
كونتسەرت بارىسىندا دارىندى مۋزىكانتتىڭ جەتىگەنمەن ورىنداعان شىعارمالارىندا حالقىمىزدىڭ اڭىز-اڭگىمەلەرىندە ايتىلاتىن وقيعالار, جىل مەزگىلدەرى اۋەزدى سازبەن ايشىقتى ورنەكتەلگەن. جەتىگەننىڭ اسەم ءۇنى دە وزگەشە, تىڭداعان ادامدى بىردەن ەلىتىپ اكەتەدى. سونداي-اق ساحنادا جەتىگەنمەن بىرگە سازسىرناي, سىبىزعى, شەرتەر, ادىرنا, دومبىرا, قوبىز سەكىلدى اسپاپتارىمىزعا جازىلعان تاماشا تۋىندىلار وينالدى. «سارىارقا» حالىق مۋزىكالىق ءانسامبلى مۇشەلەرى ورىنداعان شىعارمالار تىڭدارماننىڭ قۇلاق قۇرىشىن قاندىردى.
قاراكوز گاسيموۆانىڭ تاعى ءبىر قىرى – كومپوزيتورلىعى. ونىڭ «كوك بورىلەر», «اڭىز دالا», «ارىن», «كوكتەم اۋەنى», «سىرلى دالا», «جىبەك جولى» اتتى تۋىندىلارى ونەرسۇيەر قاۋىمعا جاقسى تانىس. ونەر كەشىندە كومپوزيتوردىڭ «سەنىم», «اناما», «شارىن شاتقالى», «تۋعان جەر», « ۇلى دالا» سەكىلدى شۇرايلى شىعارمالارى دا ورىندالدى.
