پرەمەر-ليگا ويىندارىنىڭ 25-تۋرىندا شىمكەنتتىڭ «ورداباسى» كومانداسى ءوز الاڭىندا قاراعاندىنىڭ «شاحتەرىن» قابىلداپ, قارسىلاستارىنان 3:1 ەسەبىمەن باسىم ءتۇستى. ماڭىزدى ءۇش ۇپايىنا قول جەتكىزگەن «ورداباسى» چەمپيوناتتىڭ اياقتالۋىنا ءبىر تۋر قالعاندا تۋرنير كەستەسىندە ەكىنشى ورىندا كەلە جاتقان ەلوردانىڭ «استاناسىنان» باقانداي التى ۇپايعا وزىپ, ءوز تاريحىندا تۇڭعىش رەت ەل چەمپيونى اتاندى!
قاجىمۇقان اتىنداعى ورتالىق ستاديوندا وتكەن كەزدەسۋدىڭ العاشقى مينۋتتارىنان باستاپ الاڭ يەلەرى ويىن تىزگىنىن ءوز قولىنا الىپ, ءبىرىنشى تايمنىڭ نەبارى 30-مينۋتىنا دەيىن ماتچ تاعدىرىن شەشىپ تاستادى. كەزدەسۋدىڭ ءتورتىنشى مينۋتىندا ايبار جاقسىلىقوۆ ويىننىڭ ەسەبىن اشسا, ارادا سەگىز مينۋت وتكەندە «ورداباسىنىڭ» وزبەكستاندىق شابۋىلشىسى شاحبوز ۋماروۆ ەسەپتى ەسەلەدى – 2:0. ال 27-مينۋتتا ۋكراينالىق ارتەم بەسەدين «ورداباسىنىڭ» ءۇشىنشى گولىن سوعىپ, كومانداسىنا جەڭىس سىيلادى. ەكىنشى تايمدا قاراعاندىلىقتاردىڭ جالعىز جۇبانىش گولىن تەمۋر چوگادزە سوقتى.
وسىلايشا, ەل بىرىنشىلىگىندە العاش رەت توپ جارعان «ورداباسى» كلۋبى ەندى كەلەسى جىلعى ۋەفا چەمپيوندار ليگاسىنىڭ ىرىكتەۋ كەزەڭىندە ونەر كورسەتەدى.
