«بيىل ازاماتتىق قورعاۋ ورگاندارىنا 28 جىلعا تولىپ وتىر. 1995 جىلى 19 قازاندا توتەنشە جاعدايلار جونىندەگى مەملەكەتتىك كوميتەتى ەلدىڭ تابيعي جانە تەحنوگەندىك سيپاتتاعى توتەنشە جاعدايلار جانە ازاماتتىق قورعانىس سالاسىنداعى ۋاكىلەتتىك بەرىلگەن ورتالىق اتقارۋشى ورگان رەتىندە قۇرىلعان ەدى. وسى ۋاقىت ارالىعىندا ازاماتتىق قورعاۋ جۇيەسى ايتارلىقتاي وزگەرىستەرگە ۇشىرادى. ورتالىق اتقارۋشى ورگانداردىڭ قۇرىلىمىن جەتىلدىرۋ شەڭبەرىندە مكجس كوميتەت, اگەنتتىك, مينيسترلىك بولدى. كەيىننەن ءىىم جۇيەسىندە بولدى, ودان ءارى 2020 جىلى پرەزيدەنتتىڭ تىكەلەي تاپسىرماسىمەن دەربەس مينيسترلىك رەتىندە قايتا قۇرىلدى. بارلىق كەزەڭدە توتەنشە جاعدايلاردى جويۋ قىزمەتى كاسىبي تۇردە دامىپ, قۇتقارۋ بولىمشەلەرىمەن تولىقتىرىلدى», دەدى س.ءشارىپحانوۆ.
سونىمەن قاتار سالا باسشىسى 1995-2023 جىلدار ارالىعىندا ەلىمىزدە 1,5 ملن-نان اسا توتەنشە جاعداي تىركەلىپ, ءورت سوندىرۋشىلەر مەن قۇتقارۋشىلاردىڭ كاسىبيلىگى مەن جەدەلدىگىنىڭ ارقاسىندا 413 مىڭعا جۋىق ادام قۇتقارىلعانىن ايتتى. «ەلىمىزدىڭ ءار ايماعىندا تىركەلگەن توتەنشە جاعدايلاردا ءبىزدىڭ ماماندار 380 مىڭعا جۋىق ادامدى ەۆاكۋاتسيالاپ, 70 مىڭنان اسا زارداپ شەككەن ادامعا مەديتسينالىق كومەك كورسەتتى. وكىنىشكە قاراي, ءوز مىندەتىن اتقارۋ كەزىندە 69 قىزمەتكەرىمىز قازا تاپتى».
ءمينيستردىڭ ايتۋىنشا, بۇگىندە ازاماتتىق قورعاۋ ورگاندارىندا 27 مىڭنان اسا ادام قىزمەت ەتەدى.
«الماتى وبلىسىنىڭ تالعار, قارعالى وزەندەرىندە سۋ تاسقىنىنا قارسى كوكساراي (سىرداريا وزەنىندە) جانە استانادا اعىن سۋعا قارسى رەتتەگىشتەر مەن سەلدى ۇستاپ تۇراتىن بوگەتتەر سالىندى. قازىرگى تاڭدا اقساي, ەنيساي, قورعاس وزەندەرىندە 4 ينۆەستيتسيالىق جوبا ىسكە اسىرىلىپ جاتىر. بۇلاردىڭ اياقتالۋى 2025 جىلعا جوسپارلانعان. سونداي-اق ءبىزدىڭ قۇتقارۋشىلارىمىز تۇركيا مەن اۋعانستانداعى جويقىن جەر سىلكىنىسىنىڭ سالدارىن جويۋعا قاتىسا وتىرىپ, حالىقارالىق دەڭگەيدە ءوز كاسىبيلىگىن دالەلدەدى. قيىن ەكسترەمالدى جاعدايلاردا جانە جەراستى دۇمپۋلەرىنىڭ جالعاسۋىنا قاراماستان, قۇتقارۋشىلار ۇيىندىلەردى بولشەكتەپ, ادامداردى ەۆاكۋاتسيالاۋ جانە قۇتقارۋ, زارداپ شەككەن ادامدارعا مەديتسينالىق كومەك كورسەتۋ جۇمىستارىن جۇرگىزدى», دەدى سپيكەر.
رەسمي ستاتيستيكا بويىنشا جىل سايىن ەلىمىزدە ورتا ەسەپپەن 18 مىڭنان اسا تابيعي جانە تەحنوگەندىك سيپاتتاعى توتەنشە جاعداي, ونىڭ ىشىندە 15 مىڭ ءورت تىركەلەدى ەكەن.
