سپورتتى دامىتۋ ديرەكتسياسىنىڭ ءباسپاسوز قىزمەتىنىڭ مالىمەتى بويىنشا, حالىقارالىق كونكيشىلەر وداعىنىڭ (ISU) «چەللەندجەر» ساناتىنا ەنەتىن دەنيس تەندى ەسكە الۋعا ارنالعان بيىلعى جارىسقا جەر-جاھاننىڭ 25 ەلىنەن كەلەتىن 130-دان اسا دارىندى سپورتشى قاتىسادى دەپ جوسپارلانىپ وتىر. اتاپ ايتقاندا, ولاردىڭ قاتارىندا كەيىنگى جىلى حالىقارالىق جارىستاردا ءتاۋىر ناتيجە كورسەتىپ جۇرگەن وتانداسىمىز, ەل بىرىنشىلىگىنىڭ بىرنەشە دۇركىن چەمپيونى دياس جيرەنباەۆ, 2017 جىلعى ەۋروپا جاستار وليمپياداسىنىڭ قولا جۇلدەگەرى جانە 2020 جىلعى جاسوسپىرىمدەر اراسىنداعى الەم چەمپيوناتىنىڭ قاتىسۋشىسى گرۋزيالىق نيكا ەگادزە, 2021 جىلعى «CS Warsaw Cup» ءتۋرنيرىنىڭ چەمپيوندارى – ديانا دەۆيس پەن گلەب سمولكين (گرۋزيا), ەستونيالىق تالانتتى سپورتشى ارلەت لەۆاندي جانە تاعى باسقا مانەرلەپ سىرعاناۋشىلار بار. سونىمەن قاتار بۇل دودادا داڭقتى جاتتىقتىرۋشى ەتەري تۋتبەريدزەنىڭ نيكولاي موروزوۆ, روستيسلاۆ سينيتسىن جانە مارينا زۋەۆا سياقتى شاكىرتتەرى دە ونەر كورسەتەدى.
تۋرنير ەرەجەسى بويىنشا سپورتشىلار ءوزارا جەكەلەي سىن (ەرلەر, ايەلدەر) مەن مۇزدا بيلەۋ سايىستارىنان ۇزدىكتەردى انىقتاپ, ISU رەيتينگىندە جاعدايلارىن جاقسارتۋ ءۇشىن قاجەتتى ۇپايلارىن جيناۋعا تىرىسادى. سونىمەن قاتار جۇلدەگەرلەر ۇيىمداستىرۋشىلار تاراپىنان قارجىلاي سىياقىعا دا يە بولادى.
جارىس باعدارلاماسى بويىنشا, ءتۋرنيردىڭ سوڭعى كۇنىندە مانەرلەپ سىرعاناۋ سپورتىنىڭ جانكۇيەرلەرى الەمدىك دەڭگەيدەگى سپورتشىلاردىڭ قاتىسۋىمەن دەنيس تەننىڭ تۋعانىنا 30 جىل تولۋىنا وراي ۇلكەن گالا-شوۋدىڭ كۋاسى بولادى. بۇل كەشتە 2003 جىلعى الەم چەمپيونى, ءتورت قۇرلىق بىرىنشىلىگىنىڭ ءۇش دۇركىن جەڭىمپازى كانادالىق شە-لينن بۋرن, بىرنەشە ماڭىزدى ءتۋرنيردىڭ جۇلدەگەرى فرانتسيالىق ماري-پەر لەرە جانە دەنيس تەن اكادەمياسىنىڭ تالانتتى تۇلەكتەرى دە ءوز ونەرلەرىن ورتاعا سالادى.
بيىل ءتورتىنشى مارتە وتكەلى جاتقان دەنيس تەندى ەسكە تۇسىرۋگە ارنالعان ISU باعدارلاماسىنا ەنگەن حالىقارالىق تۋرنير 2019 جىلدان بەرى ەلىمىزدە ءداستۇرلى تۇردە وتكىزىلىپ كەلەدى. بۇل سايىستىڭ تۇساۋى العاش رەت دەنيس تۋىپ-وسكەن الماتى قالاسىندا كەسىلسە, كەيىنگى جارىس 2021 جىلى استانادا ۇيىمداستىرىلدى. ال بىلتىرعى ءتۋرنيردى الماتى قالاسى قايتا قابىلداعان ەدى. جارىستى ۇيىمداستىرۋشىلار بيىلعى باسەكەنى استانادا وتكىزۋدى ءجون ساناعان ەكەن.
بىلتىرعى الماتىدا وتكەن دودادا ۇلتتىق قۇراما سپورتشىلارىنان جەكەلەي سىندا دياس جيرەنباەۆ قىسقا جانە ەركىن باعدارلامانى قوسقاندا تەك گرۋزيالىق نيكا ەگادزەگە ەسە جىبەرىپ, ەكىنشى ورىنعا تابان تىرەگەن ەدى. ال ايەلدەر اراسىندا كورەيالىق مينچە كيم ەشكىمگە دەس بەرمەسە, قىزدار سايىسىندا 16 جاستاعى وتانداسىمىز اننا لەۆكوۆەتس تە جالپى ەسەپتە ەكىنشى ورىنعا تۇراقتاپ, ءتۋرنيردىڭ كۇمىس جۇلدەگەرى اتانعان.
وسى ورايدا دەنيس تەن «ISU Challenger» سەرياسىنداعى تۋرنيرلەردە 3 مارتە جەڭىسكە جەتكەنىن ايتا كەتكەن ءجون. داڭقتى جەرلەسىمىز 2009, 2014 جانە 2015 جىلدارى حورۆاتيادا وتكەن «Zlatna pirueta Zagreba» (Golden Spin of Zagreb) تۋرنيرىندە باس جۇلدەنى جەڭىپ العان ەدى.
«ISU Challenger Series» تۋرنيرلەرى 2014 جىلدان باستاپ قىركۇيەك پەن جەلتوقسان ايلارى ارالىعىندا وتكىزىلەدى. ءبىر ايتا كەتەرلىگى, حالىقارالىق كونكيشىلەر وداعى (ISU) جىل سايىن «چەللەندجەر» ساناتىنداعى جارىستار ءتىزىمىن قايتا بەكىتىپ وتىرادى.
