سالا مەرەكەسى قارساڭىندا ۇيىمداستىرىلعان ءىس-شاراعا توتەنشە جاعدايلار مينيسترىنەن بولەك, ءورت ءسوندىرۋ كەزىندە قازا تاپقان قۇتقارۋشىلاردىڭ تۋىستارى, ازاماتتىق قورعاۋ ورگاندارىنىڭ ارداگەرلەرى جانە جيىنعا ارنايى شاقىرىلعان قوناقتار دا قاتىستى.
جيىندا ءسوز العان س.ءشارىپحانوۆ تاۋەلسىزدىك العان كەزدەن باستاپ بۇگىنگە دەيىن قىزمەتتىك مىندەتتەرىن اتقارۋ كەزىندە ازاماتتىق قورعاۋ ورگاندارىنىڭ 69 قىزمەتكەرى قازا تاپقانىن, ولاردىڭ بارلىعى ءوز ىسىنە ادال بولعانىن اتاپ ءوتتى.
«بۇل ءورت سوندىرۋشىلەر مەن قۇتقارۋشىلار – باسقالاردىڭ ءومىرىن ساقتاپ قالۋ ءۇشىن ءوز ءومىرىن قاتەرگە تىگۋگە دايىن ەكەنىنىڭ تاعى ءبىر دالەلى. ولار – زامانىمىزدىڭ ناعىز باتىرلارى. ولاردىڭ قىزمەتى باتىلدىقتى, ادالدىقتى جانە قۇرباندىقتى قاجەت ەتەدى. ءوز ومىرىنە قاۋىپ توندىرە وتىرىپ, ۇنەمى توتەنشە جاعدايلاردىڭ ورتاسىندا بولادى, ازاماتتارىمىزدى قورعاۋ ءۇشىن وتپەن جانە ءتۇرلى اپاتتارمەن كۇرەسەدى. وسى ساياباقتاعى ەسكەرتكىش ەرلىك پەن جانقيارلىقتىڭ, باتىرلىق پەن ىسىنە ادالدىقتىڭ ماتەريالدىق بايلىقتان گورى قۇندى ەكەنىن ەسكە سالادى. قيىن ساتتەردە ادامدار بىرىگىپ, مۇمكىن ەمەس نارسەنى جاساي الاتىنىن بىلدىرەدى», دەدى توتەنشە جاعدايلار ءمينيسترى.
ارداگەرلەر كەڭەسى توراعاسىنىڭ ءبىرىنشى ورىنباسارى, تاريح عىلىمدارىنىڭ دوكتورى, پروفەسسور ومىرزاق وزعانباي ۇلى جيىنعا قاتىسىپ وتىرعان بارشا قۇتقارۋشى قىزمەت سالاسىنداعى اسكەريلەردى, جاۋىنگەرلەردى كاسىبي مەرەكەلەرىمەن قۇتتىقتاپ, الداعى ىستەرىنە ساتتىلىك تىلەدى.
«كەشەگى جاۋىنگەر جولداستارىڭىزدى ەسكە الۋ ءىس-شاراسىن وتكىزىپ جاتقاندارىڭىز, قازاقتىڭ ۇلى ويشىلى, الاش قايراتكەرى حالەل دوسمۇحامەد ۇلى ايتقانداي, ەل ءۇشىن ەڭبەك ەتكەن ادامداردىڭ ەرلىگىن ۇمىتپاۋ, ەلدىكتىڭ ايقىن بەلگىسى دەپ بىلەمىن. قانشاما ازاماتتارىمىز جۇمىس بارىسىندا ءوز ءومىرىن ەمەس, وزگە جاننىڭ اماندىعىن ويلاپ, قيىن ساتتە باسىن بايگەگە تىگىپ, ارتىنا وشپەس ءىز قالدىرىپ كەتتى. ولاردىڭ ەرلىگىن ەشقاشان ۇمىتۋعا بولمايدى. ساياباقتاعى قولىنا ءسابي ۇستاعان باتىر ازاماتتىڭ ەسكەرتكىشى سياقتى سىزدەر دە قانشاما ادامداردى قيىن ساتتە امان الىپ قالىپ جۇرسىزدەر. سوندىقتان قۇتقارۋشى قىزمەتى ەلىمىز ءۇشىن, وتانىمىز ءۇشىن وتە ماڭىزدى ماماندىقتىڭ ءبىرى دەپ ايتا الامىن», دەدى ءو.وزعانباي ۇلى.
رەسمي ءىس-شارالاردان كەيىن س.ءشارىپحانوۆ ازاماتتىق قورعاۋ ورگاندارىنا جاڭادان كەلگەن 42 قىزمەتكەردىڭ انت قابىلداۋ راسىمىنە كۋا بولدى.
ەلورداداعى «قۇتقارۋشىلار ساياباعى» ءورت سوندىرۋشىلەر مەن قۇتقارۋشىلاردىڭ, سونداي-اق قىزمەتتىك مىندەتتەرىن ورىنداۋ كەزىندە قازا تاپقان قىزمەتكەرلەردىڭ قۇرمەتىنە ارناپ وسىدان ەكى جىل بۇرىن ەل تاۋەلسىزدىگىنىڭ 30 جىلدىعىنا وراي سالىنعان ەدى. قۇتقارۋشىلار سكۆەرىنىڭ ورتالىعىندا ءورت ءسوندىرۋشى تۇرىندە جاسالعان ەسكەرتكىش بار, ول وزگەنىڭ ءومىرىن قۇتقارۋ ءۇشىن كۇن سايىن ءوز ءومىرىن قاۋىپكە تىگەتىن باتىرلارعا العىس رەتىندە ورناتىلعان. سونىمەن قاتار اۋماقتا 1964 جىلى شىعارىلعان اتس-30 ماز 205 راريتەتتى ارنايى ءورت ءسوندىرۋ ماشيناسى ورناتىلعان.
