تۋريزم جانە سپورت مينيسترىلىگىنىڭ مالىمەتى بويىنشا, سارى قۇرلىقتىڭ باستى باسەكەسىندە ەلىمىزدىڭ اتىنان 131 سپورتشىسى سپورتتىڭ 14 تۇرىنەن ءتۇرلى-ءتۇستى جۇلدەگە تالاسىپ كورەدى. اتاپ ايتقاندا, وتانداستارىمىز پارا جەڭىل اتلەتيكا, بوچچا, پارا پاۋەرليفتينگ, شاحمات, پارا ءجۇزۋ, پارا ۆەلوسپورت, پارا دزيۋدو, پارا كانوە, ۆولەيبولدى وتىرىپ ويناۋ, پارا تاەكۆوندو, پارا ساداق اتۋ, پارا ۇستەل تەننيسى, اكادەميالىق ەسۋ جانە پارا وق اتۋ سياقتى سپورت تۇرلەرىنەن سىنعا تۇسەدى.
«پارا ازيا ويىندارى 2010 جىلى قىتايدىڭ گۋانچجوۋ قالاسىندا ۇيىمداستىرىلعان سارى قۇرلىق باسەكەسىنەن باستاپ وتكىزىلە باستادى. ازيا ويىندارىنان كەيىن جالاۋى جەلبىرەيتىن پاراازياداعا قازاقستان قۇراماسىنىڭ سپورتشىلارى 2010 جىلدان بەرى تۇراقتى قاتىسىپ كەلەدى. بيىل دا ەلىمىزدىڭ اتىنان 131 سپورتشى 14 سپورت تۇرىنەن سىنعا تۇسەدى. بايراقتى باسەكەدە پارا سپورتشىلارىمىز ۇزدىكتەر قاتارىنان كورىنۋ ءۇشىن مەملەكەت تاراپىنان بارلىق جاعداي جاسالدى. بيىلدىڭ وزىندە ۇلتتىق قۇراما سپورتشىلارى 40-تان اسا سپورتتىق ءىس-شاراعا, 30-دان اسا وقۋ-جاتتىعۋ جيىندارىنا قاتىسىپ, بىلىكتىلىگىن شىڭدادى. ەندى وسىنداي جاۋاپتى ساتتە ايانىپ قالماي, جانكۇيەرلەردى جەڭىسپەن قۋانتادى دەگەن ويدامىن. سپورتشىلارىمىزعا ساتتىلىك تىلەيمىن!», دەدى تۋريزم جانە سپورت ءمينيسترى ەرمەك مارجىقپاەۆ.
جازعى ازيا ويىندارىندا جۇلدە العان سپورتشىلار مەن ولاردىڭ جاتتىقتىرۋشىلارىنا بەرىلگەن اقشالاي ىنتالاندىرۋ سىيلىقاقىسىنان پارا سپورتشىلاردا قۇر قالمايدى. ياعني پاراازيادا چەمپيونى اتانعان سپورتشىعا مەملەكەت تاراپىنان 10 مىڭ دوللار, كۇمىس جۇلدەگەرگە – 5 مىڭ, قولا مەدال يەگەرىنە 3 مىڭ دوللار كولەمىندە قارجىلاي سىياقى تابىستالادى. سونىمەن قاتار التىن مەدال يەگەرىن جارىسقا دايىنداعانى ءۇشىن ونىڭ جاتتىقتىرۋشىسىنا – 5 مىڭ, كۇمىس جۇلدەگەردىڭ باپكەرىنە – 3 مىڭ جانە قولا جۇلدەگەردىڭ جاتتىقتىرۋشىسىنا 2 مىڭ دوللار كولەمىندە اقشالاي ىنتالاندىرۋ بەلگىلەنگەن.
جەكسەنبى كۇنى حانچجوۋدا شىمىلدىعى تۇرىلەتىن سارى قۇرلىق جارىسىنا ازيانىڭ 43 مەملەكەتىنەن 4 مىڭعا جۋىق سپورتشى قاتىسادى دەپ جوسپارلانعان. ولار سپورتتىڭ 22 تۇرىنەن جالپى سانى 564 مەدال (پاراليمپيادالىق سپورت تۇرىنەن – 490 جانە پاراليمپيادالىق ەمەس سپورت تۇرىنەن – 74) جيىنتىعىن ءوزارا ساراپقا سالادى.
وسىدان بەس جىل بۇرىن يندونەزيانىڭ جاكارتا قالاسىندا وتكەن III پارا ازيا ويىندارىندا ەلىمىزدىڭ سپورتشىلارى تاريحي ناتيجەگە قول جەتكىزىپ, پاراازيادا تاريحىندا العاش رەت 33 مەدال (5 التىن, 15 كۇمىس, 13 قولا) جەڭىپ العان ەدى. وسى كورسەتكىشتىڭ ناتيجەسىندە, قازاقستان قۇراماسى جالپىكوماندالىق ەسەپتە 13-ورىنعا تۇراقتاعان. جەرلەستەرىمىز بۇل جۇلدەلەردى پارا ءجۇزۋ, پارا دزيۋدو, پارا پاۋەرليفتينگ, پارا جەڭىل اتلەتيكا, ۆولەيبولدى وتىرىپ ويناۋ جانە شاحمات باسەكەلەرىنەن جەڭىپ الدى.
