جارىستىڭ ءۇشىنشى كەزەڭىنەن باستاپ كوشباسشىعا تيەسىلى كوك جەيدەنى كيگەن «Astana Qazaqstan Team» ۆەلوشاباندوزى ىستانبۇلدا مارەسىنە جەتكەن سەگىزىنشى كەزەڭگە دەيىن جالپى ەسەپتە الدىنا جان سالعان جوق. 130,5 شاقىرىمعا جالعاسقان ۆەلوكوپكۇندىكتىڭ سوڭعى كەزەڭىندە بەلگيالىق يەسپەر فيليپسەن («Alpecin-Deceuninck») جەڭىسكە جەتسە, ەكىنشى جانە ءۇشىنشى ورىنداردى «استانانىڭ» نيدەرلاندتىق وكىلى كەيس بول مەن يتاليالىق دجوۆانني لوناردي («EOLO-Kometa») يەلەندى.
«استانا» كاپيتانى الەكسەي لۋتسەنكو بۇل كەزەڭدە مارە سىزىعىن سەگىزىنشى بولىپ كەسسە دە, جالپى ەسەپتىڭ قورىتىندىسى بويىنشا جەڭىس تۇعىرىنا كوتەرىلدى. ونىڭ ۋاقىت كورسەتكىشى – 30 ساعات 6 مينۋت 58 سەكۋند. لۋتسەنكودان 26 سەكۋندقا قالىپ قويعان گەرمانيالىق «Bora-Hansgrohe» كومانداسىنىڭ وكىلى بەن تسۆيحوفف ەكىنشى ورىندى ەنشىلەسە, قولا جۇلدە تاعى ءبىر «استانا» كومانداسىنىڭ ۆەلوشاباندوزى حارولد تەحاداعا (كولۋمبيا) بۇيىردى. «استانانىڭ» وزگە وكىلدەرىنىڭ ناتيجەسىنە توقتالار بولساق, جالپى ەسەپتە كەيس بول – 55, ميكەلە گادزولي (يتاليا) – 79, گلەب سىريتسا (رەسەي) – 101 جانە مارك كاۆەنديش ( ۇلىبريتانيا) 130-ورىنعا يە بولدى.
