ۇلتتىق قۇراما ويىندارىنا بايلانىستى «قايرات» پەن «زەنيت» قىسقامەرزىمدى ءۇزىلىستى ءتيىمدى پايدالانىپ, جانكۇيەرلەرگە تاماشا ماتچ سىيلادى. 20 مىڭنان اسا جانكۇيەر تاماشالاعان ورتالىق ستاديونداعى ويىن تەڭ ەسەپپەن اياقتالدى – 2:2. اسا تارتىستى وتكەن كەزدەسۋدىڭ ەسەبىن ءبىرىنشى بولىپ «قايرات» فۋتبولشىلارى اشتى. ويىننىڭ 8-مينۋتىندا «قايراتتىڭ» برازيليالىق شابۋىلشىسى جواو پاۋلو گول سوقسا, 29-مينۋتتا قوناقتار ساپىنان الەكساندر ەروحين ەسەپتى تەڭەستىرىپ كەتتى. ءبىرىنشى تايم 1:1 ەسەبىمەن اياقتالدى.
ۇزىلىستەن كەيىن «زەنيتتىڭ» باس باپكەرى سەرگەي سەماك الاڭعا برازيليالىق ويىنشىلارىن شىعارىپ, جەڭىسكە جەتۋگە تىرىسىپ كوردى. بىراق ەكىنشى تايمداعى العاشقى گولدى دا «قايرات» فۋتبولشىلارى سوقتى. 70-مينۋتتا وفري اراد كومانداسىن ەسەپتە تاعى دا العا شىعارعانىمەن, رەسەيلىك كوماندا ماتچتىڭ اياقتالۋىنا بەس مينۋت قالعاندا تارازى باسىن قايتا تەڭەستىرىپ كەتتى. بۇل جولى گۋستاۆو مانتۋان دالدىك تانىتتى – 2:2. وسىلايشا, ەكى كلۋب اراسىنداعى ءۇشىنشى جولداستىق كەزدەسۋدە «قايرات» ءبىرىنشى رەت «زەنيتپەن» تەڭ وينادى. مۇنىڭ الدىنداعى ەكى ماتچتا دا «زەنيتتىڭ» مەرەيى ۇستەم بولعان ەدى.
