ءوز ايدىنىنداعى ويىندار سەرياسىنىڭ كەيىنگى ەكى كەزدەسۋىندە جەڭىسكە جەتىپ, جانكۇيەرلەرىن قۋانتقان «بارىس» حوككەيشىلەرى ءۇشىنشى ماتچتا ءىرى ەسەپپەن جەڭىلىپ قالدى. ولار استاناداعى «بارىس ارەنا» سپورت كەشەنىندە وتكەن كەزدەسۋدە «باتىس» كونفەرەنتسياسىندا كوش باستاپ كەلە جاتقان «لوكوموتيۆ» ۇجىمىنا 0:6 ەسەبىمەن جول بەردى.
كەزدەسۋدىڭ العاشقى ەكى بولىگىندە «بارىس» ويىنشىلارى نەبارى ەكى شايبا وتكىزىپ العانىمەن, ءۇشىنشى كەزەڭدە «لوكوموتيۆ» حوككەيشىلەرى ءبىزدىڭ قاقپامىزعا ءتورت شايبا ەنگىزىپ, جەرلەستەرىمىزدى تىرپ ەتكىزگەن جوق. بۇل ماتچتا ياروسلاۆل كومانداسى ساپىنان دانيل بۋت پەن پاۆەل كراسكوۆسكي ءدۋبلدىڭ اۆتورى اتانسا, ماكسيم شالۋنوۆ جانە دانيل تەسانوۆ ءبىر-ءبىر مارتە مەرگەندىگىمەن كوزگە ءتۇستى. وسىلايشا, «لوكوموتيۆ» بۇل جەڭىسىنەن كەيىن 29 ۇپايمەن كوشباسشىلىعىن ودان ءارى نىعايتسا, «بارىس» «شىعىس» كونفەرەنتسياسىندا 15 ۇپايمەن 10-ورىنعا تۇراقتادى.
