مۇنىڭ الدىندا بەس ويىندا جەڭىلىپ, جانكۇيەرلەرىن جەرگە قاراتقان «بارىس» حوككەيشىلەرى باس باپكەر اۋىسقان سوڭ, ەڭسە تىكتەپ كەلەدى. ءوز ايدىنىنداعى ويىندار سەرياسىندا العاش چەليابىنىڭ «تراكتورىن» تىزە بۇكتىرسە, كۇنى كەشە «دينامودان» باسىم ءتۇستى. «بارىس ارەنا» سپورت كەشەنىندە وتكەن باسەكەنىڭ نەگىزى ۋاقىتى 2:2 ەسەبىمەن تەڭ اياقتالىپ, بۋلليتتەر سەرياسىندا جەرلەستەرىمىزدىڭ باعى جاندى.
6 مىڭعا جۋىق جانكۇيەر تاماشالاعان كەزدەسۋدە «بارىس» ساپىنان ءادىل بەكەتاەۆ (4-مينۋت) پەن رايلي باربەر (10-مينۋت) مەرگەندىك تانىتسا, قوناقتاردان دجوردان ۋيل (7-مينۋت) مەن نيكيتا گۋسەۆ (35-مينۋت) مەرگەندىگىمەن كوزگە ءتۇستى. كەزدەسۋدىڭ نەگىزگى كەزەڭى تەڭ ەسەپپەن اياقتالعان سوڭ ويىن وۆەرتايمعا ۇلاستى. بىراق قوسىمشا ۋاقىتتا دا كوماندالار شايبا سوعا المادى. ءسويتىپ, جەڭىمپاز بۋلليتتەر سەرياسىندا انىقتالدى. بۇل سىندا ەلوردالىق كلۋبتىڭ جولى بولدى – 3:2. ەندى «بارىس» كەلەسى ويىنىن بۇگىن ءياروسلاۆلدىڭ «لوكوموتيۆ» كومانداسىمەن, 15 قازاندا ماگنيتوگورسكىنىڭ «مەتاللۋرگ» كلۋبىمەن وتكىزەدى.
