وتكەن تۋردا ماسكەۋ وبلىسىنىڭ «ۆيتياز» كومانداسىنان وۆەرتايمدا (3:2) جەڭىلگەن سوڭ «بارىس» كومانداسىنىڭ باسشىلىعى اندرەي سكابەلكانى قىزمەتىنەن بوساتىپ, بەلارۋس مامانىنىڭ ورنىنا وتاندىق جاتتىقتىرۋشى عالىم مامبەتاليەۆتى باس باپكەردىڭ مىندەتىن اتقارۋشى ەتىپ تاعايىنداعان بولاتىن. مامبەتاليەۆ كلۋب تىزگىنىن ۇستاعان كۇننىڭ ەرتەسىنە قحل-دەگى العاشقى رەسمي ويىنىن چەليابىنىڭ «تراكتورىمەن» وتكىزىپ, «بارىسقا» جەڭىس سىيلادى. ەلورداداعى «بارىس ارەنا» سپورت كەشەنىندە وتكەن تارتىستى ماتچتا جەرلەستەرىمىز قارسىلاستارىنان 2:1 ەسەبىمەن باسىم ءتۇستى.
6 مىڭعا جۋىق جانكۇيەر تاماشالاعان ويىننىڭ ەسەبىن ايدىن يەلەرى اشتى. العاشقى كەزەڭ اياقتالار تۇستا «بارىس» كلۋبىنىڭ 19 جاستاعى تاربيەلەنۋشىسى مەرگەندىك تانىتىپ, سپورت كەشەنىنە جينالعان جانكۇيەرلەردى قۋانتسا, ۇزىلىستەن كەيىن اركادي شەستاكوۆ سان باسىمدىعىن ءتيىمدى پايدالانىپ, ەسەپتى 2:0-گە جەتكىزدى. ەكىنشى كەزەڭنىڭ سوڭىندا قوناقتار ساپىنان چارلز روبينسون دالدىك تانىتىپ, ەسەپ ايىرماسىن قىسقارتقانىمەن, ءۇشىنشى كەزەڭدە ەسەپ وزگەرىسسىز قالدى. وسىلايشا, «بارىس» قازان ايىنداعى العاشقى جەڭىسىنە قول جەتكىزدى. ەندى ەلوردا كومانداسى كەلەسى ويىنىن بۇگىن «بارىس ارەنادا» ماسكەۋدىڭ «ديناموسىمەن» وتكىزەدى.
