كورەيادا وتكەن جاسوسپىرىمدەر اراسىندا ەكىنشى ساناتتاعى «ITF Juniors – J300 WANJU» تۋرنيرىندە جەرلەسىمىز ءامىر ومارحانوۆ تاماشا ونەر كورسەتىپ, باسەكەنىڭ باس جۇلدەسىن جەڭىپ الدى. وتانداسىمىز بايراقتى دودانىڭ ءۇشىنشى اينالىمدا جاسوسپىرىمدەر اراسىنداعى الەمنىڭ 45-ءشى, وسى جارىستىڭ راكەتكاسى جارىس قوجايىنى دجانگجۋن كيمدى 6:7, 7:6, 6:3 ەسەبىمەن قاپى قالدىرسا, شيرەك فينالدا تاعى ءبىر كورت يەسى يۋن سۋن يونگتى جارىس جولىنان ىعىستىردى – 6:3, 6:3. جارتىلاي فينالدا الەمنىڭ 41-راكەتكاسى اۋستراليالىق حايدەن دجونەستەن باسىم تۇسسە (6:1, 6:0), فينالدا ۇندىستاندىق يۋۆان ناندالدى جەڭدى – 6:2, 6:2. وسىلايشا, ءامىر ومارحانوۆ «ITF Juniors» جارىسىنداعى ءتورتىنشى تيتۋلىنا قول جەتكىزدى.
ال ازەربايجان استاناسى باكۋدە جالاۋى جەلبىرەگەن 14 جاسقا دەيىنگىلەر اراسىنداعى «Tennis Europe» تۋرنيرىندە كريستينا كۋرۋچەنكو كۇمىس جۇلدەگە يە بولدى. باس جۇلدە ءۇشىن وتكەن سايىستا ول رەسەيلىك يۋليا مياكوتكيناعا جول بەردى – 2:6, 1:6. ال لينارا بولەشەۆا دايانا جاقىپباەۆامەن بىرگە جۇپتىق باسەكەنىڭ فينالىندا رەسەيلىكتەر – يۋ.مياكوتكينا مەن اليسا تەرەنتەۆا جۇبىنان باسىم تۇسسە (6:3, 5:7, 17:15), تاعى ءبىر وتانداسىمىز ميحايل ميششەنكو رەسەيلىك ياكوۆ گرىزنوۆپەن بىرگە سوڭعى سىندا رەسەيلىكتەر – تيمۋر گوردەەۆ پەن الەكسەي يليننەن ايلاسىن اسىردى – 6:7, 6:2, 10:8.
