الەمدىك دوداعا جولداما بەرەتىن ىرىكتەۋ سايىستارىن ءۇشىنشى (نەگىزگى) كەزەڭنەن باستاعان جەرلەستەرىمىز ءوز توبىندا ءبىرىنشى ورىنمەن, سوڭعى ەليتالى راۋندقا شىقتى. بۇل سىندا ءبىزدىڭ جىگىتتەر ەۋروپا چەمپيوناتىنىڭ ءۇش دۇركىن قاتىسۋشىسى (ەكى رەت شيرەك فينالعا دەيىن جەتكەن) رۋمىنيا, 1989 جىلعى الەم چەمپيوناتىنىڭ كۇمىس جۇلدەگەرى جانە 1999 جىلعى ەۋروپا بىرىنشىلىگىنىڭ ءتورتىنشى ورىن يەگەرى نيدەرلاند جانە 2016 جىلى كولۋمبيادا وتكەن الەم چەمپيوناتىنىڭ قاتىسۋشىسى, كەيىنگى بەس جىلدا ەۋروپا بىرىنشىلىگىنە تۇراقتى قاتىسىپ كەلە جاتقان ازەربايجان قۇرامالارىمەن ءبىر توپتا سىنعا ءتۇسىپ جاتىر. ەۋروپا فۋتزالىنىڭ ەرەجەسى بويىنشا, بەس توپتا ءبىرىنشى ورىن العان قۇرامالار وزبەكستانداعى الەم چەمپيوناتىنا تىكەلەي جولداما السا, ەكىنشى ورىن العان ەڭ ۇزدىك ءتورت قۇراما قالعان ەكى جولدامانى ءوزارا ساراپقا سالادى.
قازاقستان ۇلتتىق قۇراماسى ەليتالى كەزەڭدەگى العاشقى ويىنىن سىرت الاڭدا نيدەرلاندپەن وتكىزىپ, 2:0 ەسەبىمەن سەنىمدى جەڭىسكە جەتسە, بۇل تۋردا رۋمىنيا ءوز الاڭىندا ازەربايجان قۇراماسىنان 3:1 ەسەبىمەن باسىم ءتۇستى. ال ەكىنشى كەزەڭدە جەرلەستەرىمىز الماتىدا رۋمىنيامەن وتكەن اسا تارتىستى كەزدەسۋدە 4:3 ەسەبىمەن جەڭىستى ج ۇلىپ الىپ, ءوز توبىندا كوشباسشىعا اينالدى. سول كۇنى ازەربايجان فۋتزالشىلارى نيدەرلاند قۇراماسىن ءىرى ەسەپپەن قاپى قالدىردى – 6:1.
جۇما كۇنى وتكەن ءۇشىنشى تۋردا رۋمىنيا ءوز الاڭىندا نيدەرلاند قۇراماسىمەن كەزدەسسە, جەرلەستەرىمىز سىرت الاڭدا ازەربايجانمەن شەبەرلىك بايقاستى. باكۋدەگى ماتچتا ريكاردو كاكا شاكىرتتەرى ءبىرىنشى مينۋتتان باستاپ دوپتى ءوز باقىلاۋىندا ۇستاپ, الاڭ يەلەرىنە شابۋىلعا شىعۋعا مۇمكىندىك بەرمەدى. بىراق العاشقى كەزەڭنىڭ بەل ورتاسىنا جەتكەندە ازەربايجان قۇراماسىنىڭ ويىنشىلارى ەكى مارتە قاۋىپتى شابۋىل جاساپ, يگيتاعا ەكى رەت سەيۆ جاساۋعا تۋرا كەلدى. تىنىمسىز شابۋىلىنىڭ ناتيجەسىندە ازەربايجاندىقتار 12-مينۋتتا اقىرى ءوز دەگەنىنە جەتتى. يگيتانىڭ قاقپانى بوس قالدىرىپ, ويىنعا ارالاسىپ كەتكەنىن قارسىلاس فۋتزالشىلار ءتيىمدى پايدالانىپ, بوس قالعان قاقپانى ءدال كوزدەدى. كەزەڭ سوڭىنا دەيىن جەرلەستەرىمىز تارازى باسىن تەڭەستىرۋگە تىرىسقانىمەن, وعان جەرگىلىكتى ويىنشىلار مۇمكىندىك بەرمەدى.
ءۇزىلىس كەزەڭىندە كاكا باپكەردەن ءتيىستى اقىل-كەڭەسىن تىڭداپ شىققان جەرلەستەرىمىزدىڭ ەكىنشى تايمدا ويىندارى تۇرلەنىپ شىعا كەلدى. 23-مينۋتتا داۋرەن تۇرساعۇلوۆتىڭ پاسىنان كەيىن ءبىرجان ورازوۆ ەسەپ ايىرماسىن قىسقارتسا, ارادا ءتورت مينۋت وتكەندە دۋگلاستىڭ اۋىتتان تەپكەن دوبى قارسىلاس ويىنشىسىنا ءتيىپ, قاقپا تورىنەن تابىلدى – 2:1.
ماتچتىڭ اياقتالۋىنا بەس مينۋت قالعاندا جەڭىلىپ جاتقان ازەربايجان قۇراماسىنىڭ باس باپكەرى الاڭعا قاقپاشىنىڭ ورنىنا بەسىنشى ويىنشىنى شىعاردى. الاڭ يەلەرى كەزەكتى ايىپ دوبىن ورىنداۋ بارىسىندا قاتەلىككە بوي الدىرىپ, دوپتى تارتىپ العان «قايرات» ويىنشىسى داۋرەن تۇرساعۇلوۆ بوس قالعان قاقپاعا ءۇشىنشى گولدى سوقسا, ويىننىڭ اياقتالۋىنا ءبىر مينۋت قالعاندا ەدسون دا بوس قاقپانى ءدال كوزدەدى. ال سوڭعى سەكۋندتاردا مانەكا ازەربايجان قۇراماسىنىڭ ەكىنشى گولىن سوقتى. قورىتىندى ەسەپ – 4:2.
ءسويتىپ, ءۇش تۋردا 9 ۇپاي جيناعان قازاقستان قۇراماسى ءوز توبىندا جەكە-دارا كوش باستاسا, نيدەرلاندتى تىزە بۇكتىرگەن رۋمىنيا (2:1) 6 ۇپايمەن ەكىنشى ورىنعا جايعاستى. ءۇش ۇپايى بار ازەربايجان ءۇشىنشى ورىنعا تۇراقتاسا, بىردە-ءبىر ۇپايى جوق نيدەرلاند سوڭعى ورىندا قالىپ قويدى. كەلەسى تۋردا قازاقستان قۇراماسى استانادا ازەربايجاندى قابىلدايدى. بۇل ويىن 11 قازانعا جوسپارلانعان. ماتچ ەلورداداعى جاقسىلىق ۇشكەمپىروۆ اتىنداعى جەكپە-جەك سارايىندا وتەدى. ال نيدەرلاند پەن رۋمىنيا امستەردامدا وينايدى.
