جارىستىڭ ءۇشىنشى كەزەڭىندە وتانداسىمىز 16 جاستاعى رەسەيلىك ميررا اندرەەۆامەن شەبەرلىك بايقاسىپ, ءۇش سەتكە جالعاسقان تارتىستى ماتچتا جەڭىسكە جەتتى. الەمدىك رەيتينگتە 60-ورىندا تۇرعان اندرەەۆا ءبىرىنشى پارتيادا رىباكينانى ءبىراز اۋرەگە سالدى. ماتچ باستالا سالا برەيك جاساعان ميررا جەتىنشى گەيمدە دە رىباكينادان ۇپاي الىپ, ءبىرىنشى سەتتى 6:2 ەسەبىمەن ءوز پايداسىنا جازدى. ەكىنشى پارتيانى دا رەسەيلىك تەننيسشى بەلسەندى باستاپ, التىنشى گەيمنەن كەيىن 4:2 ەسەبىمەن العا شىعىپ الدى. بىراق كەيىنگى ءتورت گەيمدە ەلەنا جيناقى ويناپ, ماتچ سوڭىندا ەكى برەيكپەن جەڭىسكە جەتتى – 6:1. ال ءۇشىنشى شەشۋشى سەتتە ەلەنا ءا دەگەننەن 5:0 ەسەبىمەن العا شىعىپ, ءۇشىنشى ماتچبولىن ەيسپەن ءتامامدادى – 6:1. ەندى ەلەنا رىباكينا جارتىلاي فينالعا شىعۋ ءۇشىن الەمنىڭ ءبىرىنشى راكەتكاسى, بەلارۋس وكىلى ارينا سوبولەنكو مەن يتاليالىق ياسمين پاوليني جۇبىنىڭ جەڭىمپازىمەن وينايدى.
سونداي-اق شانحايداعى تۋرنيرگە قاتىسىپ جاتقان ميحايل كۋكۋشكين العاشقى اينالىمدا الەمنىڭ 81-راكەتكاسى الەكساندر ميۋللەردەن باسىم ءتۇسىپ, ەكىنشى كەزەڭگە شىقتى. ال دەنيس ەۆسەەۆ ءبىرىنشى اينالىمنان ارىگە اسا المادى.
