بيىل جىل باسىندا استانادا ءدال وسى «World Athletics Indoor Tour» ساناتىنداعى جارىستىڭ كۇمىس دەڭگەيلى «Astana Silver Grand Prix Meeting» ءتۋرنيرى ۇيىمداستىرىلعان بولاتىن. وسىلايشا, 2016 جىلى تۇساۋى كەسىلگەن جەلاياقتاردىڭ جارىسىن بيىل تمد ەلدەرى اراسىندا ءبىرىنشى بولىپ قازاقستان استاناسى قابىلداعانىن دا ايتا كەتكەن ءجون. الەمگە ايگىلى «گاۋھار ليگاسىنىڭ» جابىق كەشەندەگى بالاماسى رەتىندە وتكىزىلىپ كەلە جاتقان استاناداعى جارىستا الەمنىڭ 15 ەلىنەن كەلگەن 100-گە جۋىق سپورتشى باق سىناعان-دى.
2022 جىلى حالىقارالىق تۋرنير جارىس اياسىن كەڭەيتىپ, جەلاياقتار باسەكەسىن ءتورت دەڭگەيگە, ياعني التىن, كۇمىس, قولا جانە ۇمىتكەرلەر ساناتىنا ءبولىپ وتكىزە باستادى. بۇل سايىستار جارىستى ۇيىمداستىرۋ دەڭگەيىمەن جانە جۇلدە قورىمەن ەرەكشەلەنەدى.
ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا قازاقستان جەڭىل اتلەتيكا فەدەراتسياسىنىڭ اتقارۋشى ديرەكتورى پاۆەل كۋكين اتالعان جارىس 2024 جىلدىڭ 27 قاڭتارىندا استاناداعى «Qazaqstan» جەڭىل اتلەتيكا سپورت كەشەنىندە وتەدى دەپ جوسپارلانعانىن مالىمدەدى.
«قازاقستان 2024 جىلى INDOOR tour Gold LEVEL سەرياسىنىڭ جارىستارىن قابىلداۋعا دايىن. جارىس 2024 جىلدىڭ 27 قاڭتارىندا «Qazaqstan» جەڭىل اتلەتيكا ورتالىعىندا وتەدى. ەلىمىزدىڭ اتلەتتەرى وسىنداي حالىقارالىق ءىرى دودالارعا قاتىسۋ ارقىلى الەمدەگى ەڭ مىقتى سپورتشىلارمەن سايىسۋعا مۇمكىندىك الادى. ءتۋرنيردىڭ جۇلدە قورى 100 000 دوللارعا جەتەدى. جارىس جەڭىل اتلەتيكانىڭ 12 ءتۇرى بويىنشا وتەدى. اتاپ ايتقاندا, التىن دەڭگەيلى دودالاردا ەرلەر 400, 1 500 جانە 60 مەترگە كەدەرگىلەر ارقىلى جۇگىرۋ, ۇزىندىققا جانە بيىكتىككە سەكىرۋ بويىنشا جارىسسا, ايەلدەر 60, 800, 3 000, 5 000 مەترگە جۇگىرۋ, سىرىقپەن سەكىرۋ, ءۇش قارعىپ سەكىرۋ جانە يادرو لاقتىرۋ سايىستارى بويىنشا باس جۇلدەنى ساراپقا سالادى», دەدى پ.كۋكين.
التى كەزەڭنەن تۇراتىن كەلەسى جىلعى «World Athletics Indoor Tour Gold Level» جارىسىنىڭ شىمىلدىعىن قازاقستان استاناسى اشىپ بەرەدى. استانادان كەيىن بۇل جارىستار بوستون, اقش (3 اقپان, 2024), تورۋن, پولشا (6 اقپان, 2024), لەۆەن, فرانتسيا (10 اقپان, 2024), نيۋ-يورك, اقش (11 اقپان, 2024), مادريد, يسپانيا (22 اقپان, 2024), بيرمينگەم, ۇلىبريتانيا (24 اقپان, 2024) قالالارىندا جالعاسىن تابادى. رەيتينگتىك ۇپايلار ءار سانات بويىنشا ۇزدىك شىققان ءتورت سپورتشىعا بەرىلەدى.
پاۆەل كۋكيننىڭ ايتۋىنشا, مۇنداي دەڭگەيدەگى جارىستاردى وتكىزۋ وتاندىق جەلاياقتاردىڭ الەۋەتىن بايقاۋعا, حالىقتىڭ جەڭىل اتلەتيكاعا دەگەن قىزىعۋشىلىعىن ارتتىرۋعا كومەكتەسەدى.
«كەيىنگى ءتورت جىلدا ەلىمىزدىڭ جەلاياقتارى 60-تان استام رەكورد ورناتتى. بۇل ناتيجەلەر ءبىزدىڭ سپورتشىلاردىڭ دەڭگەيى ءوسىپ كەلە جاتقانىن كورسەتەدى. ۇلتتىق چەمپيوناتتارعا قاتىساتىن سپورتشىلار سانى 30%-عا ءوستى. وسى فاكتىلەردىڭ بارلىعى قازاقستاننىڭ جەڭىل اتلەتيكاسىن دامىتۋدا تاڭداعان جولىنىڭ دۇرىس ەكەنىن بىلدىرەدى», دەدى جەڭىل اتلەتيكا فەدەراتسياسىنىڭ اتقارۋشى ديرەكتورى.
