ارماۆير قالاسىنداعى «ارماۆير ستەديۋم» ستاديونىندا وتكەن باسەكەدە ماديار كەمبىلوۆ جاتتىقتىراتىن قازاقستان ۇلتتىق قۇراماسىنىڭ قىزدارى 2:1 ەسەبىمەن جەڭىسكە جەتتى. كەزدەسۋدىڭ 27-مينۋتىندا جەرلەستەرىمىزدەن اسەلحان تۇرلىبەكوۆا مەرگەندىگىمەن كوزگە ءتۇسىپ, ويىننىڭ ەسەبىن اشتى. ەكىنشى تايمنىڭ 54-مينۋتىندا الاڭ يەلەرى ساپىنان ۆەرونيكا اساتريان جەرگىلىكتى جانكۇيەرلەردى قۋانتىپ, تارازى باسىن تەڭەستىرگەن ەدى. الايدا ارمەنيالىقتاردىڭ قۋانىشى كوپكە سوزىلعان جوق. ارادا ءۇش مينۋت وتكەندە ارايلىم ورىنباساروۆا قازاقستان قۇراماسىنىڭ جەڭىس گولىن سوقتى.
مۇنىڭ الدىندا ەلىمىزدىڭ قىزدار قۇراماسى ەستونيا فۋتبولشىلارىمەن جاسىل الاڭدا جولىعىپ, 0:0 ەسەبىمەن تەڭ تۇسكەن ەدى. وسىلايشا, ەكى ماتچتا ءتورت ۇپاي جيناعان ماديار كەمبىلوۆ شاكىرتتەرى ءوز توبىندا كوش باستادى. جەرلەستەرىمىز كەيىنگى كەزدەسۋلەرىن 26, 31 قازان كۇندەرى وتكىزەدى. العاش ءوز الاڭىمىزدا يزرايل قۇراماسىن قابىلداسا, كەيىننەن تەل-اۆيۆكە ساپار شەگەدى.
