پالاتا سپيكەرى مەيماندارعا ءىلتيپات ءبىلدىرىپ, برازيليا ەلىمىزدىڭ وڭتۇستىك امەريكاداعى نەگىزگى سەرىكتەستەرىنىڭ ءبىرى ەكەنىن اتاپ ءوتتى جانە ەكى مەملەكەتتىڭ كوپجوسپارلى ىنتىماقتاستىعىنىڭ ماڭىزىنا نازار اۋداردى.
سونداي-اق سەنات توراعاسى قوس ەل اراسىنداعى ءوزارا قارىم-قاتىناستىڭ باسىم باعىتتارىنىڭ ءبىرى پارلامەنتارالىق بايلانىس ەكەنىن ايتتى. بۇگىندە اتالعان بايلانىستى دامىتۋعا ەرەكشە كوڭىل ءبولىنىپ وتىر.
«قازاقستان پرەزيدەنتى قاسىم-جومارت توقاەۆ ەلدەرىمىز اراسىنداعى دوستىق پەن ءوزارا ءتيىمدى قارىم-قاتىناستاردى ودان ءارى نىعايتۋعا باسا ءمان بەرىپ كەلەدى. كەلەشەگى زور ەكونوميكالىق بايلانىسىمىز بەلسەندى ساياسي ىنتىماقتاستىقتى نىعايتا تۇسەتىنى انىق. قازاقستان پارلامەنتىنىڭ ەكى پالاتاسىندا دا برازيليامەن دوستىق توبى قۇرىلعان. مۇنداي قادام ءبىزدىڭ ەكىجاقتى قارىم-قاتىناسىمىزعا تىڭ سەرپىن بەرەتىنى ءسوزسىز. سەنات ءوز تاراپىنان ەلدەرىمىز اراسىنداعى بايلانىستى ءارى قاراي نىعايتىپ, دامىتۋعا بەلسەندى ىقپال ەتۋگە دايىن», دەدى ماۋلەن اشىمباەۆ.
كەزدەسۋ بارىسىندا ساۋدا-ەكونوميكالىق جانە ينۆەستيتسيالىق ىنتىماقتاستىقتى كەڭەيتۋ ماسەلەلەرىن تالقىلادى. بۇل رەتتە ەكى ەلدىڭ ينۆەستيتسيالىق احۋالى ەسكەرىلە وتىرىپ, بىرلەسكەن جوبالاردى ىسكە اسىرۋعا ارنالعان ۇسىنىستار ايتىلدى.
سەنات توراعاسى سالىق كودەكسىنە ەنگىزىلگەن وزگەرىستەردى, مەملەكەت باسشىسىنىڭ باستاماسىمەن ەلىمىزدە جۇرگىزىلىپ جاتقان جانە جولداۋدا باياندالعان ماڭىزدى رەفورمالاردى اتاپ ءوتتى.
سونىمەن قاتار ماۋلەن اشىمباەۆ ورنىقتى دامۋ ماسەلەلەرىنە جانە ورنىقتى دامۋ ماقساتتارىنىڭ ىسكە اسىرىلۋىن مونيتورينگىلەۋ جونىندەگى پارلامەنتتىك كوميسسيانىڭ قىزمەتىنە جەكە توقتالدى.
ءوز كەزەگىندە برازيليا ۇلتتىق كونگرەسىنىڭ دەپۋتاتتارى اندجەلو ماريو كورونەل دە ازەۆەدو مارتينس پەن چيكو رودريگەس كوپجاقتى قارىم-قاتىناستاردى دامىتۋعا مۇددەلى ەكەندەرىن ءبىلدىرىپ, قازاقستاندا جۇرگىزىلىپ جاتقان ساياسي وزگەرىستەردىڭ تيىمدىلىگىنە نازار اۋداردى.
ايتا كەتەيىك, ەلىمىزگە ساپار اياسىندا برازيليا دەپۋتاتتارى سەناتورلارمەن دوستىق توبىنىڭ 2-وتىرىسىنا قاتىسىپ, «قورعاس» شەكارا ماڭى ىنتىماقتاستىعى حالىقارالىق ورتالىعىنىڭ جانە الماتى وبلىسىنداعى باسقا دا نىسانداردىڭ جۇمىسىمەن تانىستى.
