سۋرەت: inbusiness.kz
كەيىنگى اپتانىڭ قورىتىندىسىندا تالاپكەرلەردىڭ 67,11 %-ى شەكتى بالل جينادى. بەس ءپان بويىنشا ورتاشا بالل 63 بالدى قۇرادى. ەڭ جوعارى ناتيجە – 139 بالل. ەرەكشە ءبىلىم بەرۋ قاجەتتىلىگى بار وقۋعا تۇسۋشىلەرگە قولايلى جاعداي جاساۋدىڭ ارقاسىندا ۇبت-عا 283 تالاپكەر قاتىسقانىن ايتا كەتكەن ءجون.
تالاپكەرلەردىڭ تەست تاپسىرمالارىنىڭ مازمۇنى بويىنشا تەستىلەۋ اياقتالعاننان كەيىن 30 مينۋت ىشىندە اپەللياتسياعا بەرۋ قۇقىعى بار. تەحنيكالىق سەبەپتەر بويىنشا اپەللياتسيا تىكەلەي تەستىلەۋ كەزىندە قابىلدانادى. ناتيجەلەرى بار سەرتيفيكاتتار اپەللياتسيا قاراستىرىلعاننان كەيىن جەكە كابينەتتەردە ورنالاستىرىلادى. ۇبت بارىسىندا كالكۋلياتور, حيميالىق ەلەمەنتتەردىڭ پەريودتىق جۇيەسى (مەندەلەەۆ كەستەسى), تۇزداردىڭ ەرىگىشتىك كەستەسى تەستىلەۋ باعدارلاماسىندا قولجەتىمدى بولادى. اتاپ وتسەك, ۇمىتكەرلەر ءوتىنىش بەرۋ بارىسىندا تەستىلەۋ كۇنىن, ۋاقىتىن, پۋنكتىن وزدەرى تاڭدادى.
ۇبت-نى وتكىزۋدىڭ ءۇشىنشى اپتاسىندا 179 ەرەجەبۇزۋشىلىق انىقتالدى. 97 تالاپكەر سمارتفون, شپارگالكا باسقا دا تىيىم سالىنعان زاتتاردى الىپ كىرمەك بولعانى ءۇشىن تەستىلەۋدەن شەتتەتىلدى. تاعى 82 ادام تەستىلەۋ كەزىندە ەرەجە بۇزعانى ءۇشىن اۋديتوريادان شىعارىلدى, ولاردىڭ ناتيجەلەرى جويىلدى. وزگە ادامداردىڭ ورنىنا كىرۋ فاكتىلەرى انىقتالعان جوق.
2026 جىلى ۇلتتىق بىرىڭعاي تەستىلەۋدىڭ فورماتى وزگەرىسسىز قالادى. تالاپكەرلەر ءۇش مىندەتتى ءپاندى جانە تاڭداۋى بويىنشا ەكى بەيىندىك ءپاندى تاپسىرادى. ۇبت تاپسىرمالارىنىڭ جالپى سانى – 120. ونىڭ ىشىندە «قازاقستان تاريحى» ءپانى بويىنشا 20 تاپسىرما, «وقۋ ساۋاتتىلىعى» مەن «ماتەماتيكالىق ساۋاتتىلىق» پاندەرىنەن 10 تاپسىرمادان, سونداي-اق ەكى بەيىندىك ءپاننىڭ ارقايسىسىنان 40 تاپسىرمادان بەرىلەدى. ۇبت بويىنشا ەڭ جوعارى بالل دا وزگەرمەيدى, 140 بالدى قۇرايدى. تەستىلەۋ ۋاقىتى – 4 ساعات (240 مينۋت). بۇل رەتتە ەرەكشە ءبىلىم بەرۋ قاجەتتىلىگى بار بالالارعا ۇسىنىلاتىن قوسىمشا 40 مينۋت ۋاقىت ساقتالاتىنىن ايتا كەتۋ كەرەك. 2026 جىلعى ۇبت اياقتالعاننان كەيىن كۇنتىزبەلىك جىلدىڭ 31 قازانىنا دەيىن بەينەجازبالارعا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا ۇبت ناتيجەلەرى جويىلادى.
تاعى ءبىر ەسكەرەتىن جايت, ناۋرىزداعى ۇبت-عا شارتتى تۇردە اقىلى نەگىزدە كۇندىزگى وقۋ نىسانى بويىنشا جوعارى وقۋ ورىندارىنا قابىلدانعاندار, وتكەن جىلعى مەكتەپ تۇلەكتەرى, كوللەدج تۇلەكتەرى, قانداستار, شەتەلدە ءبىلىم العان ەل ازاماتتارى, مەكتەپ بىتىرەتىن تۇلەكتەر جوعارى وقۋ ورىندارىنا اقىلى نەگىزدە ءتۇسۋ ماقساتىندا قاتىسادى.
