فوتو: istockphoto.com
قىلمىستىق راقىمشىلىق شەڭبەرىندە قىلمىستىق تەرىس قىلىقتار, ونشا اۋىر ەمەس جانە اۋىرلىعى ورتاشا قىلمىستاردىڭ جەكەلەگەن ساناتتارى قامتىلادى. بۇل رەتتە كەيبىر سوتتالعاندارعا نەگىزگى جازانىڭ وتەلمەگەن بولىگىن قىسقارتۋ قاراستىرىلعان.
الدىن الا ەسەپ بويىنشا, قىلمىستىق راقىمشىلىق 16,5 مىڭ ادامعا قاتىستى قولدانىلۋى مۇمكىن. ونىڭ ىشىندە شامامەن 15 مىڭ سوتتالعان جانە 1,5 مىڭ تەرگەۋ ساتىسىنداعى ازامات بار. تەك ىشكى ىستەر مينيسترلىگى جەلىسى بويىنشا اكىمشىلىك راقىمشىلىق جالپى سوماسى 17 ملرد تەڭگەدەن اساتىن شامامەن 1 ميلليون اكىمشىلىك ايىپپۇلدى قامتيدى.
امنيستيا كىمدەرگە قولدانىلادى؟
الايدا راقىمشىلىق بارلىق قۇقىق بۇزۋشىلىقتارعا بىردەي جۇرمەيدى. ول قايتالانعان قۇقىق بۇزۋشىلىقتارعا جانە سوتتاردىڭ قاراۋىنداعى ىستەرگە قولدانىلمايدى.
سونىمەن قاتار قوعامدىق قاۋىپسىزدىككە, ازاماتتاردىڭ ءومىرى مەن دەنساۋلىعىنا قاۋىپ توندىرەتىن قۇقىق بۇزۋشىلىقتار ءۇشىن سالىنعان ايىپپۇلدار كەشىرىلمەيدى. جول قوزعالىسى قاۋىپسىزدىگىنە قاتىستى ورەسكەل زاڭ بۇزۋشىلىقتار دا راقىمشىلىقتان تىس قالادى. ولاردىڭ قاتارىندا ماس كۇيىندە كولىك جۇرگىزۋ, ەسىرتكىلىك ماساڭدىقتاعى جۇرگىزۋشىلەردىڭ ارەكەتتەرى, قارسى جولاققا شىعۋ جانە باسقا دا اۋىر جول ەرەجەسىن بۇزۋ فاكتىلەرى بار.
سونداي-اق قارۋ-جاراق پەن ەسىرتكىنىڭ زاڭسىز اينالىمى, دەنساۋلىق ساقتاۋ, سانيتاريالىق-ەپيدەميولوگيالىق قاۋىپسىزدىك جانە دەربەس دەرەكتەردى قورعاۋ سالالارىنداعى قۇقىق بۇزۋشىلىقتارعا راقىمشىلىق قولدانىلمايدى.
اكىمشىلىك راقىمشىلىق ايىپپۇل سالىنعان ازاماتتارعا قولدانىلادى
قازاقستاندا العاش رەت اكىمشىلىك راقىمشىلىق جاساۋ تەتىگى ەنگىزىلمەك. جاڭا نورما اكىمشىلىك قۇقىق بۇزۋشىلىق تۋرالى كودەكسكە ەنگىزىلەتىن وزگەرىستەر اياسىندا جۇزەگە اسىرىلادى.
راقىمشىلىق اكىمشىلىك ايىپپۇل ارقالاعان ازاماتتار مەن بىرقاتار كاسىپ يەلەرىنە قاتىستى قولدانىلادى. اتاپ ايتقاندا, ونىڭ اياسىندا جەكە كاسىپكەرلەر, نوتاريۋستار, جەكە سوت ورىنداۋشىلارى, ادۆوكاتتار جانە زاڭ كونسۋلتانتتارى قامتىلادى.
راقىمشىلىققا ىلىگەتىن ازاماتتار قالاي تاڭدالادى؟
جاڭا ءتارتىپ بويىنشا راقىمشىلىق اۆتوماتتى تۇردە راسىمدەلەدى. ارنايى اقپاراتتىق جۇيە زاڭدا كورسەتىلگەن تالاپتارعا سايكەس كەلەتىن ازاماتتاردىڭ ءتىزىمىن قالىپتاستىرادى. شەشىم ەلەكتروندى فورماتتا قابىلدانىپ, ازاماتتارعا SMS-حابارلاما نەمەسە تسيفرلىق سەرۆيستەر ارقىلى جەتكىزىلەدى. وسىلايشا, ازاماتتارعا راقىمشىلىق الۋ ءۇشىن مەملەكەتتىك ورگاندارعا ارنايى بارىپ, ءوتىنىش بەرۋدىڭ قاجەتى بولمايدى.
ەسكە سالا كەتەيىك, بۇگىن ءماجىلىستىڭ جالپى وتىرىسىندا راقىمشىلىقتان بولەك, كەدەن مەن نوتارياتتىق قىزمەت, پسيحولوگيالىق قىزمەت, تەحنيكالىق جانە كاسىپتىك ءبىلىم بەرۋ جۇيەسىن جەتىلدىرۋ ماسەلەلەرىنە قاتىستى زاڭ جوبالارى قارالىپ جاتىر.
