پۋسان تۇرعىندارى 20-دان استام ەلدىڭ وكىلدەرى قاتىسقان ءىس-شاراعا ەرەكشە قىزىعۋشىلىق تانىتتى. ۇيىمداستىرۋشىلار جاعى قازاقستانعا قۇرمەت ءبىلدىرىپ, تورىنەن ورىن بەردى. جەرگىلىكتى تۇرعىندار قازاقتىڭ كادەسىيلارى مەن كىتاپتارىن ساتىپ الىپ, ۇلتتىق تاعامدارىمىزدان ءدام تاتتى. جارمەڭكەدە قازاقستان دەلەگاتسياسى 5 شاتىرعا ورنالاسىپ, كورەياداعى جالعىز قازاق ءدامحاناسى جەرگىلىكتى تۇرعىندارعا كوجە مەن قۇرت ۇسىندى.
قازاق دياسپوراسىنىڭ وكىلدەرى مەن «ارلان جەتە» تەاترىنىڭ ارتىستەرى تانىمال قازاقستاندىق ديزاينەرلەردىڭ ۇلتتىق كيىمدەرىن كيىپ ساحناعا شىقتى. كورەياداعى «نوماد» قازاقتار قاۋىمداستىعى ديرەكتورىنىڭ ورىنباسارى بالنۇر ايتباەۆا تاتۋلىق تۋى تۋرالى بايان ەتتى.
«پۋسان قالاسى مەن الماتى قالاسى اراسىندا تاتۋلاستىق پەن بىرلەستىك كەلىسىمى بار. بيىل وسى ماقساتتا ءبىرىنشى رەت ۇلتتىق ناۋرىز تويىن ۇيىمداستىرعان بولاتىنبىز. قازاق ونەرپازدارىنىڭ كورەياعا كەلۋىنىڭ تاعى ءبىر سەبەبى – مامىر ايىندا قازاقستاننىڭ پۋسانداعى باس كونسۋلدىعىنىڭ اشىلعانىنا 1 جىل تولىپ وتىر», دەدى ول.
«كورەيادا ءوزىمىزدىڭ قازاقستاندىق 30 مىڭنان استام ادام تۇرادى. سولاردىڭ مۇددەلەرىن قورعاۋ ءۇشىن سەۋلگە كوپتەگەن جۇمىسكەر كەلەتىن بولدى. ءبىر جىلدىڭ ىشىندە ءبىز قازاقتارعا 150 تۋ تۋرالى كۋالىك بەرىپ, 50 شاقتى نەكە قيدىق. سونىمەن قاتار قازاقستاننىڭ 200-گە جۋىق ازاماتىنا پاسپورت بەردىك. بيىل قىركۇيەك ايىندا الماتى مەن پۋسان اراسىنداعى مادەني جانە ەكونوميكالىق ىنتىماقتاستىق تۋرالى مەموراندۋمعا قول قويىلعانىنا 1 جىل تولادى. سوندىقتان كۇزدە پۋساندا الماتىلىقتاردىڭ تاعى ءبىر كونتسەرتى وتەدى», دەدى ەلىمىزدىڭ پۋسان قالاسىنداعى باس كونسۋلى ايان قاشاباەۆ.
